८४ वर्षमाथिकालाई घरमै उपचार

अस्पताल पुगेर औषधि ल्याउन सक्ने अवस्था नभए पनि स्वास्थ्यकर्मीहरू घरमै आएपछि धेरै सजिलो
हरि गौतम

(रुकुम पूर्व) — भूमे गाउँपालिका २ स्थित काँक्री स्वास्थ्य चौकीले ८४ वर्षमाथिका ज्येष्ठ नागरिकको घरमै उपचार सेवा थालेको छ । साबिकको काँक्री गाविस तथा हालको भूमे गाउँपालिकाका १ र २ वडाका ज्येष्ठ नागरिकले घरघरमै नियमित स्वास्थ्य सेवा पाइरहेका हुन् । स्वास्थ्यकर्मी ज्येष्ठ नागरिकको घरमै पुगेर स्वास्थ्य चेकजाँच, उपचार, परामर्शका साथै नि:शुल्क औषधिसमेत वितरण गर्छन् । 

रुकुम पूर्व भूमे गाउँपालिका २, को स्वास्थ्य चौकी काँक्रीमा कार्यरत स्वास्थ्यकर्मीहरू घरमै पुगेर ज्येष्ठ नागरिकको उपचार गर्दै । तस्बिर : हरि/कान्तिपुर 

स्वास्थ्यकर्मीहरू एक महिनामा दुईपटक ज्येष्ठ नागरिकका घरमै पुगेर उनीहरूको अवस्थाका बारेमा जानकारी लिनुका साथै उपचार र परामर्श दिने गरेका छन् । ‘यस स्वास्थ्य चौकीको कार्यक्षेत्रभित्रका ८४ वर्षमाथिका ज्येष्ठ नागरिकको स्वास्थ्य चेकअप गर्न घरघर पुगिरहेका छौं,’ स्वास्थ्य चौकी इन्चार्ज सञ्जीव खड्काले भने, ‘स्वास्थ्य चेकअपका साथै सरसल्लाह, परामर्श र नि:शुल्क औषधि वितरण गरिरहेका छौं ।’ प्रदेश ५ सरकारको सामाजिक विकास मन्त्रालयको स्वास्थ्य कार्यक्रमअन्तर्गत ज्येष्ठ नागरिकलाई घरघरमै पुगेर उपचार गर्न थालिएको उनले बताए ।

भूमे गाउँपालिकाका पञ्चासे, लुकुम, काँक्री, खाबाङ, गाबाङ, सैपातुङका विभिन्न टोलमा पुगेर ज्येष्ठ नागरिकको उपचार गर्ने गरिएको हो । स्वास्थ्यकर्मीहरू स्वास्थ्य चौकीदेखि चार घण्टासम्मको पैदल दूरी पार गरेर ज्येष्ठ नागरिकको उपचारमा जाने गरेका छन् । स्वास्थ्य चौकी काँक्रीको कार्यक्षेत्रभित्र १३ जना ८४ वर्षमाथिका ज्येष्ठ नागरिक छन् । घरघर पुगेर उपचार गर्दा उनीहरू खुसी भएको स्वास्थ्यकर्मीहरूले बताए । घरमै बसीबसी स्वास्थ्य चेकजाँच, सरसल्लाह, परामर्शका साथै नि:शुल्क औषधि पाइने भएपछि ज्येष्ठ नागरिक खुसी भएका हुन् । घरमै आएर स्वास्थ्य अवस्थाबारे जानकारी लिने, सरसल्लाह दिने र आवश्यक परे औषधिसमेत नि:शुल्क पाइने भएपछि खुसी लागेको भूमे–२, गाबाङकी ८६ वर्षीया तिर्सना रोकाले बताइन् । आँखा दु:ख्ने र खोकी लाग्ने समस्याले आफू ग्रस्त भएको उनले सुनाइन् । ‘अस्पतालका नानीबाबुहरू आएर हालखबर सोध्नु हुन्छ, नाडी छाम्नु हुन्छ, चेक गर्नुहुन्छ,’ उनले भनिन्, ‘अलिअलि औषधि पनि दिनु भएको छ । यो औषधिले रोग केही बिसेक भएको छ ।’ हिंडडुल गर्न नसक्ने अवस्थामा अस्पताल पुगेर औषधि ल्याउन सक्ने अवस्था नभए पनि स्वास्थ्यकर्मीहरू घरमै आएपछि धेरै सजिलो भएको उनले सुनाइन् ।

भूमे गाउँपालिका अध्यक्ष रामसुर बुढा मगरले स्वास्थ्य चौकी काँक्रीले गएको चैत महिनादेखि यसको सुरुवात गरेको बताए । ‘स्वास्थ्य चौकीमा कार्यरत स्वास्थ्यकर्मीहरू घरघरमै पुगेर ज्येष्ठ नागरिकको उपचार गरेका छन्,’ उनले भने, ‘यसबाट नागरिकमा आशाको सञ्चार भएको छ । स्थानीय सरकारप्रति विश्वास जागेको छ ।’

प्रकाशित : आश्विन ३, २०७६ १०:२२
प्रतिक्रिया
पठाउनुहोस्

वर्षाले जतासुकै पहिरो

माधव अर्याल

(पाल्पा) — यहाँको पूर्वखोला गाउँपालिका ५, वीरकोटस्थित वीरकोट–बर्दले खण्डमा पहिरो खसेपछि विगत ५ दिनदेखि सडक पूर्ण रूपमा अवरुद्ध छ । लामो तथा छोटो दूरीका सवारी साधन चल्न सकेका छैनन् । यस क्षेत्रका विद्यार्थीलाई विद्यालय जान समस्या भएको छ ।

पाल्पाको पर्यटकीय क्षेत्र तानसेन–रानीमहल खण्डको हात्तीढुंगानजिकै बिहीबार खसेको पहिरो ।  तस्बिर : माधव/कान्तिपुर

अविरल वर्षासँगै पहिरो खसेपछि सडक अवरुद्ध भएको हो । वर्षा नरोकिएको र ढुंगा खसिरहेको हुँदा सडकमा यात्रा गर्न समस्या भएको स्थानीय सीमा श्रेष्ठले बताइन् । पहिरोले सडक अवरुद्ध भएपछि विद्यार्थी विकल्पका रूपमा साँघुरो र झन्डै एक घण्टा लामो दूरीको बाटोबाट विद्यालय पुग्ने गरेको जनकल्याण आधारभूत विद्यालयका शिक्षक जीनबहादुर सारुले बताए ।

सडक बन्द हुँदा सिंगो गाउँ प्रभावित भएको छ । ३५ बढी घरधुरी रहेको भैसादी, आफरडाँडालगायत गाउँका स्थानीयलाई आवतजावत गर्न समस्या भएको छ । उता, फोक्सिङकोटका बासिन्दाले १५ दिनदेखि सवारी साधनमा यात्रा गर्न पाएका छैनन् । उनीहरूलाई पहिरोले नाकाबन्दी लगाएको स्थानीय एवत सारुले बताए । अघिल्लो शुक्रबारदेखि सवारीका साधन चल्न नसकेको उनले सुनाए । फोक्सिङकोट वडा कार्यालयबाट बाहिर जान ५ नाका छन् । तर, अहिले कुनै पनि सुचारु हुन नसकेको उनले बताए । पूर्वी नाका रिमीघाको लभडाँडामा पहिरोले नाकाबन्दी गरेको छ । स्थानीय र ताहुँ प्रहरी चौकीका प्रहरी जवानहरूसमेत आएर पहिरो सफा गरे पनि सडक खुल्न सकेको छैन ।

अर्को मूख्य नाका पश्चिम रानीबासको पुछार लम्भारमा सिरानदेखि बर्खे भल पस्दा बाटो भ्वाङ परेको छ । पश्चिमको अर्कै नाका छ । हुँगीको असेर्दी जोड्ने नाका पनि पहिरोले समस्या पारेको छ । झर्लेङ भएर राम्दी निस्कने नाकामा पनि पहिरोले सवारी साधन चल्न सक्ने अवस्था छैन । स्थानीयबाट उठाएको पैसाले खनेको बाटो बिगारिदिएको स्थानीयले बताए । वैकल्पिक नाका गाबुडाँडा झेस्काङ हुँदै अँगाहाखोला झर्ने नाकामा पनि पहिरोले हिंड्न सकिने अवस्था छैन ।

हरेक वर्ष सडक खन्नका लागि जिल्लाका सबै स्थानीय तहले करोडौं रकम खर्च गर्छन् । दुई–चार घरपरिवार भएको स्थानमा समेत भोटको प्रभाव पार्न लाखौं खर्चेर बनाएका सडक अहिले कामै नलाग्ने भएका छन् । अविरल वर्षाले जिल्लाका ग्रामीण क्षेत्रमा जाने सबैजसो सडक सवारी साधन चल्नै नसक्ने अवस्थामा छन् । पानीले सडक बगाएपछि यात्रु, बिरामी र अन्य मानिसले सास्ती बेहोर्नु परेको रानीमहल जाने सडकछेउका होटल व्यवसायी सुशील कुँवरले बताए । सदरमुकाम तानसेनदेखि पश्चिम छहरा जाने बाटो हिलाम्य छ । बाँसटारी–खहरे–झडेवा सडक पनि उस्तै छ । आर्यभन्ज्याङदेखि रामपुर, निस्दी र पूर्वखोला जाने बाटोसमेत क्षतविक्षत छ । लसुनेदेखि रम्भाको पाँच सय मिटर सडकसमेत अवरुद्ध छ ।

अधिकांश गाउँपालिका केन्द्र पुग्ने सडक भत्किएका छन् । हिउँदको समयमा करोडौं रकम खर्च गरेर बाटो खन्ने र वर्षाको भेलले बगाउँदा जनता सडक सञ्जालबाट टाढा भएका हुन् । रम्भा गाउँपालिकाले गत वर्ष खनेका कुनै पनि सडकमा अहिले गाडी गुड्न सकेका छैनन् ।

पूर्वखोला गाउँपालिकाको केन्द्र, रिङनेरह जाने सडक पनि वर्षा हुनासाथ बन्द छ । तानसेन हुँदै हुमिन–रिङनेरह जाने सडकको स्तरोन्नतिको काम भए पनि पानी पर्नासाथ सडक बिग्रेको छ । निस्दी, माथागढी, तिनाउ, रिब्दीकोट, रम्भा, पूर्वखोला, रैनादेवी छहराले लाखौं खर्चेर बनाएर सडकमा अहिले गाडी गुड्नै मुस्किल पर्ने गरी बिग्रिएका छन् ।

बिहीबारदेखि एकतर्फी
तीन दिनदेखिको अविरल वर्षाले सिद्धार्थ राजमार्गलगायत जिल्लाका अधिकांश सडक अवरुद्ध भएकामा बिहीबारदेखि एकतर्फी खुलेका छन् । सिद्धार्थ राजमार्गको राम्दीदेखि सिद्धबाबा क्षेत्रका दर्जनौं स्थानमा पहिरो गएको छ । सिद्धबाबा, झुम्सा, आर्यभन्ज्याङलगायत स्थानमा पहिरो खसेकामा प्रहरीले एकतर्फी सडक सुचारु गरिएको जनाएको छ । प्रहरी कार्यालयका सूचना अधिकृत कृष्णप्रसाद सापकोटाका अनुसार अर्घाखाँची जाने सडकको बतासे र रामपुर जाने सडकको जब्गादीनजिक बाहेक अन्यत्र बिहीबारदेखि सडक एकतर्फी खुलेको छ ।

झुम्सा, दोभान, सिसुवालगायत स्थानमा खसेको पहिरो हटाउने कार्य सकिएको छ । प्रहरी र सडक डिभिजनले डोजर, स्काभेटर लगाएर एकतर्फी चलाएका हुन् । राजमार्गको आर्यभन्ज्याङलगायत स्थानमा पहिरो खसेको छ । जिल्लाको पूर्व भेग जोड्ने आर्यभन्ज्याङ–रामपुर सडक खण्डको जब्गादीबाहेक सिलुवाको बासुका, सानो गल्धा, बैछाप, रामपुरको गिजिनडाँडालगायत स्थानमा अविरल वर्षाले पहिरो खसेपछि बाटो एकतर्फी भएको छ । जिल्लाकै रम्भाको हुँगी असेर्दीस्थित रामपुर–पीपलडाँडाअन्तर्गत कालीगण्डकी करिडोरमा पहिरो खसेको छ । यहाँ डोजर लगाएर एकतर्फी बनाइएको छ । तानसेन–तम्घास सडकअन्तर्गत विभिन्न स्थानमा पहिरो खसेको छ । तानसेनबाट हार्थोक–बतासे सडकमा पनि पहिरो खसेको छ ।

प्रकाशित : आश्विन ३, २०७६ १०:२१
पूरा पढ्नुहोस्
प्रतिक्रिया
पठाउनुहोस्