फलफूल तथा तरकारी हाट : बाग्दुलामै व्यवस्थित संकलन केन्द्र

कान्तिपुर संवाददाता

प्यूठान — जनप्रतिनिधि आएको २ वर्षपछि प्यूठान नगरपालिकाले बाग्दुला क्षेत्रमा फलफूल तथा तरकारी पसल व्यवस्थापन गर्ने योजना अघि सारेको छ । नगरपालिकाको ७ र ८ वडाको सीमा क्षेत्र बाग्दुला–खलंगा सडक छेउका झुप्राझुप्री हटाएर व्यवस्थित तरकारी हाट बजार बनाउने भएको हो ।

किनमेल गर्न आउने ग्राहकको भीड र सवारी साधनको चाप भएकाले सडक आसपासका झुप्राझुप्री र टहरालाई हटाएर व्यवस्थित गर्न लागिएको नगरपालिकाले जनाएको छ । १० वर्षका लागि जग्गा लिजमा लिएर ठेक्कामार्फत संकलन केन्द्र निर्माण गरिएको हो । निर्माणको काम लगभग अन्तिम चरणमा पुगेको नगरपालिकाले जनाएको छ ।

नगर प्रमुख अर्जुनकुमार कक्षपतिका अनुसार पहिलो चरणमा प्रदेश सरकारको २५ लाख र नगरपालिकाको आन्तरिक स्रोतबाट जम्मा गरिएको २० लाख रुपैयाँ खर्च गरेर २६ सटर निर्माण गरिएको हो । जिल्लाका स्थानीय तहहरूको केन्द्रमा पुग्ने मुख्य द्वार मानिने बाग्दुलामा निकै भीड हुन्छ । नौबहिनीको बाहाने, झिमरुकको मच्छी, गौमुखीको ठूलाबेसी लिवासे, मल्लरानीको केन्द्र खलंगा जाने मुख्य द्वार बाग्दुला भएकाले यहाँ भीड बढी हुने गरेको हो ।

‘बाग्दुला पुलचोक क्षेत्रको अव्यवस्थित बजारले धेरै समस्या निम्त्याएको छ,’ नगर प्रमुख कक्षपतिले भने, ‘सडक छेउका झुप्राझुप्री र टहरा हटाउने योजनासहित संकलन केन्द्र निर्माण गर्न लागिएको हो ।’ उनले सबभन्दा पहिले सडक क्षेत्रको १५ मिटर दायाँबायाँ लगतकट्टा गर्ने प्रक्रिया पूरा गरी थुप्रा/टहरा हटाइने बताए । ‘सडक छेउमा बसेकालाई लक्षित गरेर संकलन केन्द्र बनाउन लागेका हौं,’ उनले भने, ‘निर्माणको काम सकिएपछि सूचना निकालेर दसैंलगत्तैबाट संकलन केन्द्रमा फलफूल र तरकारी व्यापार सुरु हुनेछ ।’ संकलन केन्द्रलाई बहुउपयोगी बनाउने विषयमा समेत स्थानीय अगुवासँग छलफल भइरहेको उनले बताए ।

बाग्दुला पुलचोक नामले परिचित यो ठाउँमा जिल्लाका ग्रामीण भेगमा गाडी पुगेपछि चहलपहल बढेको स्थानीय बताउँछन् । यहाँ रहेका तरकारी र फलफूल पसललाई व्यवस्थित गरिए सवारी चाप घट्ने स्थानीय प्रमोद पोख्रेलले बताए । पुलचोक बजार आसपासमा जनज्योति सामुदायिक विकास केन्द्रले निर्माण गरेका सडकछेउका सटर भाडामा लिएर फलफूल र तरकारी व्यापारीले व्यापार गर्दै आएका छन् । यस्तै केही वर्षअघि निर्माण भएको प्रतीक्षालयमै स्वर्गद्वारी यातायात व्यवसायी समिति र नमस्ते यातायात प्रालिले टिकट काउन्टर खोलेका छन् । सडक छेउमा रहेका पसलमा किनबेच गर्ने, टिकट काट्ने यात्रुको भीडले सवारी आवागमनमा समस्या भएको स्थानीय जुमानसिंह जीसीले बताए ।

नगरपालिकाले गत वर्ष सडक छेउमा रहेका झुप्राझुप्री हटाउने निर्णय गरे पनि व्यापारीले अटेर गरेका थिए । व्यापारीको वैकल्पिक व्यवस्थाका लागि संकलन केन्द्र निर्माण गरिएको नगरपालिकाको भनाइ छ । फलफूल तथा तरकारी संकलन केन्द्र निर्माणले बाग्दुला पुलचोक बजार व्यवस्थित हुने स्थानीय नेगनसिंह कुँवरले बताए । सडक छेउमा रहेका झुप्रा हटाएपछि बाग्दुला बजारको रौनक बदलिने नगरपालिकाले जनाएको छ । संकलन केन्द्रमा अहिले २६ स्टल, शौचालय निर्माण भइरहेको प्रमुख कक्षपतिले बताए । जस्तापाताको छानो लगाएर स्टल निर्माण भएको छ । स्टलहरूमा रंगरोगन, गेट निर्माणलगायतको काम सकिएपछि स्टल बुकिङ खुला गरिनेछ ।

प्रकाशित : आश्विन २, २०७६ १०:३१
प्रतिक्रिया
पठाउनुहोस्

जनचेतनाले घट्दै कुपोषण

कान्तिपुर संवाददाता

बर्दिया — सचेतनासँगै निगरानी बढाइएसँगै यहाँका ११ महिनामुनिका बालबालिकामा कुपोषण घट्दै गएको छ । गाउँघर क्लिनिक, स्वास्थ्य चौकीमा समेत बालबालिकाको निगरानी गरिन थालिएको हो ।

कुपोषण घटउना अभिभावकहरूलाई खानपिनदेखि सरसरफाइबारे जानकारी दिने गरिएको हो । नियमित खानपिनमा अभिभावकहरूले ध्यान दिन थालेसँगै कुपोषणमा पनि कमी आउन थालेको हो । जिल्ला स्वास्थ्य कार्यालय बर्दियाका अनुसार ११ महिनामुनिका बालबालिकाको कुपोषितदर अहिले साढे ४ प्रतिशतमा झरेको छ ।

०७४ मा ४ दशमलव ८ र ०७३ मा ५ दशमलव २ प्रतिशत बालबालिकामा कुपोषण देखिएको थियो । जिल्ला स्वास्थ्य कार्यालयका प्रमुख गोकर्ण गिरीले गाउँघर क्लिनिक, स्वास्थ्य चौकी र प्राथमिक स्वास्थ्य केन्द्रका स्वास्थ्यकर्मी, गाउँबस्तीमा रहेका स्वयंसेवीकाहरूले पनि निगरानी गर्ने तथा कुपोषणबारे जानकारी दिने गरेको बताए । ‘गाउँघर क्लिनिकमा पनि ११ महिनामुनिका बालबालिकाको तौल लिएर जाँच गर्दै आएका छौँ ।

तौल नपुगेका बालबालिकाका अभिभावकलाई पोषण खानेकुराबारे जानकारी दिन्छौं,’ उनले भने, ‘अभिभावकहरूले पोषणबारे जानकारी पाएपछि कुपोषणको अवस्थामा सुधार भइरहेको छ ।’ बर्दियामा एक जिल्ला अस्पताल, प्राथमिक स्वास्थ्य केन्द्र ३ र ३० स्वास्थ्य चौकी छन् । ती सबै ठाउँमा कुपोषण जाँचको व्यवस्था मिलाइएको छ । त्यसबाहेक प्रत्येक महिनामा गाउँमै क्लिनिक सञ्चालन हुने गरेको छ । बच्चा तौल गर्न आउने सबै बच्चाका अभिभावकलाई स्वास्थ्यकर्मीहरूले सुझाव दिने गरेका छन् । ६ महिनाको पुगेपछि बच्चालाई आमाको दूधबाहेक थप पोषिलो खाना खुवाउनुपर्ने जानकारी अभिभावकलाई नहुँदा वा जानेर पनि लापरवाही गर्दा बालबालिका कुपोषणको सिकार हुने गरेका छन् ।

नेपालमा २७ प्रतिशत बालबालिका कुषोषित भएको अभिलेख छ । त्यस्तै ंसन २०११ मा सार्वजनिक गरिएको नेपाल डेमोग्राफिक हेल्थ सर्भेले ४१ प्रतिशत बालबालिकामा पुड्कोपनको समस्या छ । त्यस्तै २९ प्रतिशत बालबालिकाको उमेरअनुसार तौल नबढेको, ११ प्रतिशतमा ख्याउटे, ४६ प्रतिशतमा रक्तअल्पताको समस्या छ ।

प्रकाशित : आश्विन २, २०७६ १०:३०
पूरा पढ्नुहोस्
प्रतिक्रिया
पठाउनुहोस्