मापदण्ड विपरीतका संरचना भत्काइँदै

कान्तिपुर संवाददाता

बर्दिया — सदरमुकाम गुलरियाको बजार क्षेत्रमा हुलाकी आयोजनाअन्तर्गत सडक निर्माण सुरु भएको छ । मापदण्ड विपरीतका संरचना भत्काउँदै सडकको काम भइरहेको हो । 

दसैंअगावै सदरमुकाम क्षेत्रमा कालोपत्रे गर्ने लक्ष्यसहित कामलाई तीव्रता दिइएको छ । तुलापुरदेखि जिल्ला प्रहरी कार्यालयसम्म मापदण्ड विपरीतका दर्जनौं घर, पसल भत्काएर सडक फराकिलो पार्ने काम भइरहेको छ । जिल्ला प्रहरी कार्यालयदेखि भन्सार रोडका घर/पसल पनि मंगलबारदेखि भत्काउन सुरु गर्ने नगरपालिकाले जनाएको छ ।

जिल्ला प्रशासन कार्यालयमा प्रमुख जिल्ला अधिकारी रामबहादुर कुरुम्बाङको अध्यक्षतामा हुलाकी सडक आयोजना प्रमुख युवराज पोखरेल, निर्माण व्यवसायी, गुलरिया नगरपालिकाका प्राविधिक टोलीसहित बसेको बैठकले दसैंअगावै हुलाकी सडकको काम सम्पन्न गर्ने सहमति गरेको हो । गुलरियाको तुलापुरदेखि नेपाल–भारत सीमाको सुरजपुरसम्म करिब ५ किमि सडक एक महिनाभित्र कालोपत्रे गर्ने सहमति भएको प्रमुख जिल्ला अधिकारी कुरुम्बाङले बताए ।

अहिले विद्युत्, टेलिफोन र खानेपानीका लाइन विस्तार गर्ने काम भइरहेको छ । मापदण्ड विपरीतका सडक भत्काउन थालेपछि सदरमुकाम अस्तव्यस्त भएको छ । तर, पुरानो बजार भन्सार रोडका ९५ प्रतिशत संरचना नभत्काइएका कारण काममा अवरोध आएको छ । सडक मापदण्ड अनुसार भन्सार रोडका ९९ प्रतिशत संरचना भत्काउनुपर्ने हुन्छ ।

मापदण्ड विपरीतका संरचना भत्काउँदै काम सुरु गर्ने आयोजनाले जनाएको छ । विद्युत् र टेलिफोन लाइन विस्तार गर्ने क्रममा ती संरचना नभत्काइए सडक निर्माणमा अवरोध आउने स्थानीय गणेश यादवले बताए । नगरपालिकाको अगुवाइमा स्थानीय प्रशासनले सडक निर्माण भएको दिनदेखि मापदण्ड विपरीतका संरचना भत्काउँदै आएको छ ।

ठेकेदार कम्पनीले गत साउन महिनाभित्र सडक निर्माण गर्ने सम्झौता थियो । गुलरिया नगरपालिकाले १२/१२ मिटर सडकको मापदण्ड तोकेको भन्दै पुरानो बजार भन्सार रोडका व्यवसायी र घरधनीले मुआब्जा माग गर्दै सर्वोच्च अदालतमा मुद्दा दायर गरे पनि कुनै आदेश नआएपछि काम सुरु गरिएको ठेकेदार कम्पनीले जनाएको छ ।

ठेकेदार कम्पनी गणपति निर्माण सेवाले वेलवा चोकदेखि मूर्तिहा सीमासम्म करिब १८ किमि सडक निर्माण गरी कालोपत्रे गर्ने सम्झौता गरेको हो । ग्रामीण क्षेत्रमा ७ किमि चौडा कालोपत्रे बनाउने सम्झौता छ भने सहरी क्षेत्रमा भने १३ मिटर चौडा कालोपत्रे निर्माण हुने सम्झौतामा उल्लेख छ ।

दुई वर्षअघि हुलाकी सडक आयोजनाअन्तर्गत सुरजपुर–मधुवन नगरपालिका–८, भुरीगाउॅ–८ र वेलवा–राजापुर खण्डमा ठेक्का सम्झौता भएको थियो । १८ किमि हुलाकी सडक करिब २५ करोड ३१ लाख ८५ हजार (भ्याटबाहेक) मा साउनको तेस्रो साताभित्र सम्पन्न गर्ने सम्झौता भएको थियो ।

निर्माण व्यवसायी गणपति निर्माण सेवाका सञ्चालक तुलसी भण्डारीका अनुसार संरचना नभत्केका कारण आयोजनाले म्याद पनि थपेको छैन । नगरप्रमुख मुक्तिनाथ यादवले दसैं अगावै सदरमुकामभित्र हुलाकी सडक निर्माणका लागि कर्मचारी र प्राविधिक टोली परिचालन गरिएको बताए ।

प्रकाशित : भाद्र २४, २०७६ १०:०१
ADVERTISEMENT
प्रतिक्रिया
पठाउनुहोस्
ADVERTISEMENT

स्थानीय तहमा नियमविपरीत भुक्तानी

माधव अर्याल

पाल्पा — आन्तरिक लेखा परीक्षण नहुँदा स्थानीय तहमा नियमविपरीत भुक्तानी भइरहेको छ । यसरी भुक्तानी गरेकामा हरेक वर्ष महालेखा परीक्षकको कार्यालयले गल्ती औंल्याउने गरेको छ । तैपनि, स्थानीयले तहले सुधार गर्न सकेका छैनन् ।

गत आवमा महालेखा परीक्षकले तानसेन नगरपालिकाका विभिन्न शीर्षकमा ५० बढी गल्ती औंल्याएको थियो । त्यसअघिका वर्षमा यस्ता गल्ती झन् धेरै थिए । नगरपालिकाले महालेखालाई दिएको जवाफ झाराटराई रहेको पाइएको छ ।

विभिन्न शाखासँग नियमित गरिने र गरिँदै आएको भन्ने जवाफ पठाएर अनियमितता ढाकछोपको प्रयास गरिएको छ । नगरपालिकाको लेखा समिति सक्रिय नभएकाले आन्तरिक लेखा परीक्षण भएको छैन । लेखा समितिले देखाएका गल्तीसमेत सुधार गरिएको छैन । ‘लेखा समिति नाम मात्रको रहेको हामी पनि स्वीकार्छौं,’ नगरपालिकाका लेखा समिति संयोजक महेश्वर श्रेष्ठले अघिल्लो नगरसभामा बुझाएको प्रतिवेदनमा उल्लेख छ, ‘जसले गर्दा गल्तीलाई सुधार्नेभन्दा ढाकछोप गर्ने चलन छ ।’

नगरपालिकाद्वारा सञ्चालित योजनामा बेरुजु, काम पूरा नभएर पनि भुक्तानी, कर्मचारी, जनप्रतिनिधिले पेस्की लिएर फर्स्योट नहुनु र कागजपत्रसमेत दुरुस्त नहुनुलगायत गल्ती महालेखा परीक्षकको कार्यालयले औंल्याएको छ । नगरपालिकाले विकास निर्माणका काममा समेत अनियमित ढंगले खर्च गर्दै आएको देखिएको महालेखाले जनाएको हो ।

महालेखा परीक्षक कार्यालयले विभिन्न ऐन, नियम एवं कार्यविधिमा उल्लेख भएका कार्यालयको कामसँग सम्बन्धित आन्तरिक नियन्त्रणको व्यवस्थाको कार्यान्वयन गर्नुपर्ने उल्लेख गरेको छ । दैनिक तथा भ्रमण भत्ता खर्चको बिल भुक्तानी गर्दा भ्रमण प्रतिवेदन संलग्न नगरी भुक्तानी लिएर अनियमितता गरेको महालेखाले औंल्याएको छ ।

नगरपालिकाले भने आगामी दिनमा दैनिक तथा भ्रमण भत्ता खर्चको बिल भुक्तानी गर्दा प्रतिवेदन संलग्न गरी भुक्तानी गर्ने बेहोराको जवाफ दिएको छ । लेखा अधिकृत दिवाकर अर्यालले विगतमा भएका गल्तीलाई सुधारेर लैजाने बताए । तानसेन नगरपालिकाले मूल्य नखुलेको पुराना सामानको मूल्य कायम गरी जिन्सी अद्यावधिकै नगरेको महालेखा परीक्षणले औंल्याएको छ ।

तानसेनले जिन्सी खाता अद्यावधिक र प्रमाणित गरेर राखेको छैन । नगरपालिकाले अभिलेख गर्ने र जिन्सी खाता प्रमाणित गर्छौं भन्ने प्रतिबद्धताको जवाफ महालेखालाई दिएको छ । राजस्व असुली र दाखिलामा समेत नगरपालिका चुकेको देखिएको छ । साबिकको गाविसबाट नगरपालिकामा जोडिन आएका वडालाई राजस्व असुली र दाखिला व्यवस्थित गरी व्यवसाय दर्ता, नक्सापासलगायत नियमानुसार गर्न महालेखाले निर्देशन दिएको छ ।

तानसेन नगरपालिकाले वार्षिक खरिद योजना तयार नगरेर गल्ती गरेको उसले औंल्याएको छ । सार्वजनिक खरिद नियमावली, २०६४ को नियम ८ (१) ले सार्वजनिक निकायले १० लाख रुपैयाँभन्दा बढी रकमको खरिद गर्नुपर्ने भएमा आगामी आवको अनुमानित वार्षिक कार्यक्रम तथा बजेट तयार गर्नुपर्छ । आगामी आवमा गर्ने वार्षिक खरिद योजना तयार गर्नुपर्ने हुन्छ ।

कार्यालयले विगतमा १० लाखभन्दा बढी रकमको खरिद कार्य गरेको छ । तर, वार्षिक खरिद योजना तयार गरेको नपाएको प्रतिवेदनमा उल्लेख छ । नगरपालिकालाई प्राप्त हुने आय रकमको दोहोरो लेखा प्रणालीका आधारमा अभिलेख राख्न महालेखाको सुझाव छ ।

प्रकाशित : भाद्र २४, २०७६ १०:०१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT