डेंगुका बिरामी बढे

रुपन्देहीमा ४८, परासी पश्चिममा ३१, पाल्पामा ६, कपिलवस्तुमा ३, दाङ र बाँकेमा २/२ एवं गुल्मी र बर्दियामा १/१ जनामा डेंगुको संक्रमण देखिएको छ 
अमृता अनमोल

बुटवल — प्रदेशका विभिन्न जिल्लामा डेंगुको संक्रमण बढ्दै गएको छ । सामाजिक विकास मन्त्रालयको स्वास्थ्य महाशाखाका अनुसार शुक्रबारसम्म प्रदेशमा ९४ जनामा डेंगुको संक्रमण फेला परेको छ । 

ZenTravel

प्रदेशभरिमा सबैभन्दा धेरै ४८ बिरामी रूपन्देहीमा भेटिएका छन् । परासी पश्चिममा ३१, पाल्पामा ६, कपिलवस्तुमा ३, दाङ र बाँकेमा २/२ एवं गुल्मी र बर्दियामा एक/एक जनामा डेंगुको संक्रमण देखिएको छ ।

Meroghar


डेंगु बढ्दै गएपछि स्वास्थ्य संस्थामार्फत नागरिकलाई सचेत रहन आग्रह गरिएको महाशाखा प्रमुख उमाशंकर चौधरीले बताए । जोखिम बढेका स्थानमा स्थानीय तहको सहकार्यमा लामखुट्टे ‘खोज र नष्ट गर’ अभियान थाल्ने तयारी गरेको उनले बताए । डेंगुसँगै भाइरल ज्वरोका बिरामीको संख्यासमेत दैनिक बढेको छ ।

लुम्बिनी प्रादेशिक अस्पतालका मेसु डा. कृष्ण खनालले बिरामी बढ्दै गए डेंगु परीक्षणका लागि किटको अभाव हुने बताए । चिकित्सकका अनुसार लामखुट्टेको वृद्धि र फोहोर तथा टायरको उचित व्यवस्थापन नहुँदा डेंगु र ज्वरोका बिरामी बढेका हुन् ।

लुम्बिनी मेडिकल कलेज प्रभासमा उपचारका लागि आएकामध्ये साउनमा दुई र भदौमा चार जनामा डेंगुको संक्रमण देखिएको कलेजका सूचना अधिकारी कृष्णप्रसाद पराजुलीले बताए । पाल्पामा गत वर्ष पनि सात जनामा डेंगु देखिएको थियो । स्वास्थ्य कार्यालय रूपन्देहीका प्रमुख केयरसिंह गोदारका अनुसार विभिन्न अस्पतालमा उपचार गराइरहेका थप २४ जना संक्रमित छन् । डेंगुकै आशंकामा उनीहरूको उपचार भइरहेको भए पनि पुष्टि हुन बाँकी रहेको उनले बताए ।

विद्यालय बन्द
पाल्पाको पूर्वखोला गाउँपालिका–३, रिङनेरहको अर्खलडाँडामा चार दिनदेखि फैलिएको भाइरल ज्वरोले गाउँ नै प्रभावित भएको छ । विद्यार्थी नै बिरामी परेपछि दुई दिनदेखि विद्यालय बन्द छ । अर्खलडाँडामा केही दिनयता मौसमी भाइरल ज्वरोको प्रकोप देखिएको वडाध्यक्ष नीलकण्ठ भट्टराईले बताए ।

कोरङ्गा र अर्खलडाँडा गाउँका २० बढी घर परिवारमा भाइरल ज्वरोको प्रकोप देखिएको उनले बताए । भाइरल प्रभावित क्षेत्रमा गाउँपालिकाको स्वास्थ्य शाखा र रिङनेरह स्वास्थ चौकीबाट गाउँमै शिविर राखेर बिहीबार उपचार गरिएको थियो । स्वास्थ्य शाखाका प्रमुख मोहन ढकालका अनुसार ७३ जनालाई गाउँमै पुगेर उपचार गरिएको छ ।

टोलीले ४३ जना पुरुष, ३० जना महिलाको स्वास्थ्य परीक्षण गरेको थियो । यसमा १८ जना विद्यार्थी प्रभावित भेटिएको उनले बताए । ‘रुघाखोकी, ज्वरो, टाउको दुख्ने समस्या बढी देखिएको छ,’ उनले भने, ‘सिंगो गाउँका बालबालिकादेखि वृद्धवृद्धासम्म प्रभावित भएका छन् ।’

गाउँका अधिकांश बालबालिका बिरामी परेको र भाइरल अन्यलाई सर्ने भएकाले जनउज्ज्वल आधारभूत विद्यालय शुक्रबारलाई बिदा दिइएको छ । मौसमी रुघाखोकी, ज्वरो र भाइरलमा उपचारपछि केही सुधार आएको गाउँपालिका अध्यक्ष नुनबहादुर थापाले बताए ।

प्रकाशित : भाद्र २१, २०७६ १०:२८
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

खसीको मासु अभाव

कान्तिपुर संवाददाता

नेपालगन्ज — चाडपर्व नजिकिँदै गर्दा खसीको मासुको मूल्यवृद्धि भएको छ । मूल्यवृद्धिसँगै मासु अभाव देखिन थालेको छ । भारतबाट सहजै आयात रोकिएपछि मूल्य बढेको हो । 

वैशाखयता मात्रै दुईपटक यहाँ मासुको मूल्य बढेको छ । वैशाखमा प्रतिकिलो ६ सयबाट ७ सय रुपैयाँ पुगेको थियो भने अहिले ७ सयबाट ८ सय रुपैयाँ पुर्‍याइएको छ । अहिले बजारमा भारतबाट खसी ल्याउन प्रतिबन्ध छ ।

‘खसी ल्याउन पाइँदैन, चाडबाड नजिकिँदै गएपछि बजारमा खसीको मासुको माग बढ्न थालेको हो,’ मासु व्यवसायी सगदिक कुरेसीले भने, ‘पर्व नजिकिएकाले मासुको मूल्य अझै बढ्न सक्छ ।’ भारतबाट सहजै रूपमा आयात हुँदा प्रशस्त मात्रामा सस्तो मूल्यमा खसी पाइने भएकाले मासुको मूल्य कम थियो । अहिले भारतबाट आयतमा रोक लाग्नु र मासुको माग धान्न आन्तरिक रूपमा सहजै खसीबोका उपलब्ध नहुँदा मूल्यवृद्धिसँगै अभाव देखिन थालेको हो ।

‘नेपालगन्जमा बजारको माग धान्ने खसी उपलब्ध छैनन्, पाइए पनि जिउँदो खसी भारतमा भन्दा धेरै महँगो छ,’ नेपालगञ्ज रामबागको मासु बधशालामा मासु व्यवसाय गर्दै आएका कुरेसीले भने, ‘महँगो खरिद गर्नुपर्दा बिक्री मूल्य पनि बढेको हो ।’ भारतबाट आयात असहज भएपछि सीमावर्ती जिल्लामा खसी तस्करी पनि बढेको छ । पछिल्ला दिनमा प्रहरीले पटकपटक भन्सार छलेर ल्याइएका खसीबोका नियन्त्रणमा लिएर नेपालगञ्ज भन्सार कार्यालय पठाएको थियो ।

भारतबाट खसी ल्याएर सीमावर्ती गाउँमा जम्मा गर्ने र स्थानीय तहबाट कागज बनाएर अन्य जिल्लामा पठाउने गरेको कार्यालयले जनाएको छ । अहिले नेपालगञ्जमा दुब्लो पातलो खसीको जिउँदो मासु प्रतिकिलो ५ सय ८० रुपैयाँ, मध्यम खालको ६ सय रुपैयाँ र राम्रो हट्टाकट्टा र मोटो खसीको जिउँदो मासुको मूल्य ६ सय ५० रुपैयाँसम्म छ । नजिकिंदै गरेको दसैंमा चाहिनेजति खसी नआए प्रतिकिलो ९ सय रुपैयाँसम्म पुग्ने व्यवसायीले बताए ।

दसैंको समयमा नेपालगञ्जमा दैनिक १० हजार किलोसम्म खसीको माग हुने गर्छ । मासु व्यवसायी हनिफ कुरेसीले भारतबाट खसीबोका नआए मूल्य अझै बढ्ने बताए । उनका अनुसार अहिले गैरकानुनी बाटोबाट केही मात्रामा खसी भित्रिरहेका छन् । सहजै रूपमा आउन भन्सारमा रोक लगाइएको छ । दसैंको समयमा भारतबाट खसी नआए जिउँदो खसीकै मूल्य प्रतिकिलो ७ सय रुपैयाँसम्म पुग्ने उनले बताए ।

नेपालगञ्जको रामबागस्थित मासु बधशालाबाट नियमित रूपमा मासुको प्रयोग गर्दै आएका नेपालगञ्ज उपमहानगरपालिका–१० का भक्तराज गिरीले खसीको मासुको मूल्य लगातार बढिरहेको बताए । ‘हरेक पर्वमा मासुको मूल्य बढ्दै गएको छ,’ उनले भने, ‘स्थानीय उत्पादन न्यून छ, आयात रोकिएको छ ।’ त्यसले कम आम्दानी हुनेलाई मासु प्रयोगमै समस्या आउन थालेको उनले बताए ।

प्रकाशित : भाद्र २१, २०७६ १०:२७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×