उपचाररत बाघको मृत्यु

आहारा अभावमा मानिसलाई नै आक्रमण गरेर ज्यान लिएको थियो । ठाकुरबाबा नगरपालिका–१ बर्दिया निकुञ्जको डुम्रेनी मन्दिर क्षेत्रबाट बाघलाई नियन्त्रणमा लिइएको थियो । सुंगुर, बंगुरलाई आहारा दिइरहेका स्थानीय ७० वर्षीय पहारिया थारूलाई बाघले आक्रमण गरेर मारेको थियो ।

नियन्त्रणमा लिएको बाघ निकै लामो समयदेखि भोको र बिरामी भएको निकुञ्जका कर्मचारीको अनुमान छ । बाघको फोक्सोमा गिर्खा भएको, दाँत भाँच्चिएको, जताततै घाउ भएपछि किरा लागेको र लामो समय भोकभोकै हुँदा मृत्यु भएको निकुञ्जका सहायक संरक्षण अधिकृत अशोककुमार भण्डारीले बताए ।

१० दिनअघि गेरुवा गाउँपालिका–४ मा घाँस काट्न सामुदायिक वनमा जाँदा स्थानीय रामकली शाहीको बाघको आक्रमण परी मृत्यु भएको थियो । उक्त बाघ अहिलेसम्म नियन्त्रणमा आएको छैन । नरभक्षी बाघ फेला नपरेपछि स्थानीय त्रासमा छन् ।

गेरुवा तटीय क्षेत्रका बासिन्दा दिउँसो वन नजिकबाट हिंड्न छाडेको स्थानीय लक्ष्मण थारूले बताए । बाघले सामान्यतः खाना नपाएर, मानिससँग जम्काभेट हुँदा, बच्चा (डमरु) लाई खतरा महसुस भएको अनुभव गरेमा आक्रमण गर्ने राष्ट्रिय प्रकृति संरक्षण कोषका संरक्षण अधिकृत श्याम थापाले बताए ।

आव ०५०/५१ मा निकुञ्जको बाघले ६ जनाको ज्यान लिएको थियो । निकुञ्ज प्रशासनले ६ जनाको ज्यान लिने नरभक्षी बाघलाई नियन्त्रणमा लिई ललितपुरको जाउलाखेलस्थित चिडियाखानामा पठाएको थियो । ०५३ सालमा सरकारले मध्यवर्ती क्षेत्र घोषणा गरेपछि हालसम्म ८ जनाको बाघ आक्रमणमा परी ज्यान गएको निकुञ्जले जनाएको छ । बर्दिया राष्ट्रिय निकुञ्जमा पछिल्लो गणनाअनुसार ८७ बाघ छन् ।

पूर्वपश्चिम राजमार्ग, साबिक शिवपुर, नेउलापुर, ठाकुरद्वारा, सूर्यपटुवा र गेरुवा गाविसको मध्यवर्ती क्षेत्रमा बाघले सर्वसाधारणमाथि आक्रमण गर्ने गरेको छ ।

बर्दिया राष्ट्रिय निकुञ्जबाट ६ महिनाअघि निस्केको एउटा बाघ गेरुवा गाउँपालिका–४ स्थित शान्तिपुर धकनिया खेतमा राखिएको विद्युतीय पासोमा परेर मारिएको थियो ।

बाघको संरक्षणका लागि बर्सेनि ठूलो धनराशि खर्च हुने गरेको निकुञ्जका सहायक संरक्षण अधिकृत भण्डारीले बताए । ‘निकुञ्जको आधाभन्दा बढी बजेट बाघको आहारा, घाॅसे मैदान, पानी पोखरी, वन्यजन्तु र मानवबीचको द्वन्द्व रोक्नमै खर्च हुन्छ,’ उनले भने, ‘यसरी करिब १८ करोड रुपैयाँ वन्यजन्तुको संरक्षणमा खर्च हुने गरेको छ ।’