दुई मोटरसाइकल ठोक्किँदा दुई जनाको मृत्यु
दाङ — पूर्वपश्चिम राजमार्ग अन्तर्गत दाङको देउखुरीमा सोमबार राति मोटरसाइकल दुर्घटना हुँदा दुई जनाको मृत्यु भएको छ ।
लमहीबाट भालुबाङतर्फ गैरहेको रा३प २०६१ र विपरित दिशाबाट आउँदै गरेको लु१९प ५५०६ नम्बरको मोटरसाइकल राप्ती गाउँपालिका–८ पिपरीमा ठोक्किँदा मोटरसाइकलमा सवार दुईजनाको मृत्यु भएको हो ।
मोटरसाइकल ठोक्किएको अवस्थामा पश्चिमबाट पूर्वतफै गैरहेको ना६ख ६७७४ नम्बरको ट्रकले थप ठक्कर दिएपछि उनीहरुको मृत्यु भएको प्रहरीले जनाएको छ ।
मृत्यु हुनेमा रा३प २०६१ नम्बरको मोटरसाइकल चालक लमही नगरपालिका ४ का २८ वर्षीय डाक्टर विनय चौधरी र पछाडि बसेका घोराही उपमहानगरपालिका–१५ का २६ वर्षीय बालकृष्ण भण्डारी रहेका छन् ।
दुर्घटनामा गम्भीर घाइते दुवै जनाको उपचारका क्रममा राति लमही अस्पतालमा मृत्यु भएको जिल्ला प्रहरी प्रवक्ता डिएसपी विनोदविक्रम शाहले बताए ।
लु१९प ५५०६ नम्बरको मोटरसाइकल चालक राप्ती–८ का २७ वर्षीय दिपक मरासिनी घाइते भएको र उनको स्थानीय क्लिनिकमा उपचार भइरहेको उनले जानकारी दिए । मोटरसाइकल ठोक्किएको अवस्थामा थप ठक्कर दिने ट्रक नियन्त्रणमा रहेको र चालक फरार रहेको उनले बताए ।
प्रकाशित : भाद्र १७, २०७६ ०९:२६