दुई जनाको ज्यान लिने बाघ नियन्त्रणमा 

कमल पन्थी

बर्दिया — बर्दिया राष्ट्रिय निकुञ्जले दुई जनाको ज्यान लिने बाघलाई सोमबार बिहान नियन्त्रणमा लिएको जनाएको छ । शुक्रबार र आइतबार बाघले दुई जनाको ज्यान लिएपछि निकुञ्जका प्राविधिक, नेपाली सेनासहित चार वटा हात्तीले घाइते अवस्थाको बाघलाई नियन्त्रणमा लिएको सहायक संरक्षण अधिकृत अशोककुमार भण्डारीले बताए ।

बाघलाई नियन्त्रणमा लिएर निकुञ्जको मुख्यालयमा ल्याउन लागिएको छ। उक्त बाघलाई भुरीगाउॅ नजिक बर्दिया निकुञ्जबाट नियन्त्रणमा लिएको हो। नियन्त्रणमा लिएको बाघ आपसमा जुँधेर घाइते भएको आशंका गरिएको छ।

बाघले आइतबार बिहान एक बृद्धलाई आक्रमण गरि मारेको थियो। ठाकुरबाबा नगरपालिका—१ खानेपानी टोल भुरीगाउॅमा बाघले आक्रमण गर्दा ७० वर्षिय पहरिया थारुको मृत्यु भएको थियो।

घरमा पालेको संगुरलाई आहारा दिने समय विहान करिब ७ बजे बाघले आक्रमण गर्दा थारुको मृत्यु भएको हो। चार दिन अघि गेरुवा गाउॅपालिका—४ मा घास काट्न सामूदायिक वनमा जादा स्थानीय रामकली शाहीलाई बाघले आक्रमण गरि मारेको थियो।

प्रकाशित : भाद्र ९, २०७६ १०:०२
प्रतिक्रिया
पठाउनुहोस्

फोहोर व्यवस्थापनमा लापरबाही

प्रकाश बराल

बागलुङ — कालीगण्डकी करिडोरको छेवैमा बागलुङ नगरपालिकाले ५ वर्षदेखि फोहोर फालेको छ । सदरमुकामबाट दक्षिणतर्फ जाने सयौंले यो बाटो हिँड्दा दुर्गन्धले नाक थुन्नुपर्छ ।

दिगो व्यवस्थापनका लागि व्यवस्थित ल्यान्डफिल्ड साइट बनाउने योजना तुहिएपछि नगरपालिकाले यहाँ फोहोर फाल्दै आएको हो । दुर्गन्धित वातावरण संरक्षणका लागि भने कुनै काम गरेको छैन । बजेट अभाव देखाएर वडा १ को खुतुर्केमा फोहोर फालिरहेको हो । वरिपरि पर्खाल लगाएर फालिएको फोहोरले करिडोरसहित कालिका मन्दिरको छेउसम्म दुर्गन्ध फैलिएको छ । मालढुंगा बस्तीमा पनि असर पुगेको छ ।

स्थायी ल्यान्डफिल्डको डिजाइन गरेपछि सरकारसँग माग गरेको बजेट नपाएर निर्माणको काम रोकिएको थियो । स्थानीय तह गठनपछिका ३ वटा बजेटले पनि फोहोर व्यवस्थापनलाई सम्बोधन नगरेको भन्दै स्थानीयले जनप्रतिनिधिप्रति आक्रोश पोखेका छन् । ‘फोहोर सडकछेउमा फालिएकाले दुर्गन्ध फैलिएको छ,’ वडा १ का रणबहादुर बोहोराले भने, ‘दिगो व्यवस्थापन नगरी आलेटाले काम भयो ।’

गत आर्थिक वर्षको नीति कार्यक्रममा आधुनिक पद्धतिद्वारा फोहोरमैला व्यवस्थापन गर्न वैकल्पिक ऊर्जा प्रवर्द्धन केन्द्र र फोहोरमैला व्यवस्थापन विभागको सहकार्यमा बायोग्यास उत्पादन प्रणाली प्लान्ट कार्यान्वयनमा ल्याउने उल्लेख थियो । तर काम भएको छैन । नगरप्रमुख जनकराज पौडेलले तत्कालै अर्को विकल्प नभेटेकाले करिडोर नजिकै फालेको बताए । ‘विकल्पको खोजीमा छौं,’ उनले भने, ‘विकल्प भेटेपछि व्यवस्थापनको काम गर्छौं । दिगो समाधानका लागि दाताको खोजीमा छौं ।’

धौलागिरी फोहोर व्यवस्थापन तथा सरसफाइ सहकारीले बजार क्षेत्रको फोहोर उक्त स्थानमा लगेर फाल्छ । धौलागिरी अञ्चल अस्पतालले पनि फोहोर व्यवस्थापनमा लापरबाही गरेको छ । औषधिजन्य फोहोर जथाभावी फाल्ने र जलाउने गरिएको प्राकृतिक स्रोत व्यवस्थापनका शोधार्थी प्रकाश थापाले बताए । उनले भने, ‘मानव स्वास्थ्यमा असर पर्ने गरी औषधि डढाइएको छ ।’

अस्पतालमा जम्मा भएको फोहोर र मिति सकिएको औषधि खुला रूपमा डढाउने गरिएको र यसले दुर्गन्ध फैलिएको छ ।

प्रकाशित : भाद्र ९, २०७६ ०९:५८
पूरा पढ्नुहोस्
प्रतिक्रिया
पठाउनुहोस्