बस्ती र फाँटतिर सोझियो झिमरुक

कान्तिपुर संवाददाता

प्यूठान — झिमरुक नदी बस्ती र खेततर्फ सोझिएपछि प्यूठान नगरपालिका–४ र ७ वडा आसपासका स्थानीय चिन्तित बनेका छन् । दुई दिनयता परेको झरीसँगै झिमरुकमा शनिबार पानीको सतह बढेको छ ।

फाँट कटान गर्दै नदी बस्तीतर्फ सोझिएपछि वर्ष दिन खाने धान खेत नोक्सान गर्नुका साथै बास बगाउने चिन्ताले स्थानीयलाई पिरोलेको हो ।

प्यूठान नगरपालिकाको सत्तरी फाँटतर्फ झिमरुक नदीले कटान गर्न सुरु गरेपछि स्थानीयको चिन्ता बढेको रोहणीराज पोख्रेलले बताए । गत वर्ष यही स्थानबाट नदी खेत र बस्तीतर्फ सोझिएपछि तटबन्धको माग गरे पनि सुनुवाइ नभएकाले अहिले यस्तो अवस्था आएको उनले सुनाए । नदीले झिमरुक करिडोर कटान गरेर क्वाडेकुलो बाँध हुँदै बस्तीतिर पस्न थालेको पोख्रेलले बताए । ‘स्थानीय भेला भएर नगरपालिका र सिंचाइ विकास तथा जल उत्पन्न प्रकोप नियन्त्रण कार्यालयमा झिमरुकको बहाव फर्काउन अनुरोध गरेका छौं,’ उनले भने ।

एउटै स्थानबाट बर्सेनि नदीले कटान गर्दा पनि सरोकारवाला निकायले ध्यान नपुर्‍याउँदा समस्या भएको प्यूठान नगरपालिका–४ का केशव कार्कीले बताए । ‘पुरानो तटबन्ध जीर्ण भएकाले कटान गर्दै नदी बस्तीतर्फ पस्न लागेको छ,’ उनले भने, ‘अन्य स्थानमा तारजाली लगाए पनि सत्तरी फाँट क्षेत्रमा नलगाएका कारण यस्तो भएको हो ।’

सत्तरी फाँटमा नदी पस्यो भने खलंगा जोडने बिजुवारको झोलुंगे पुल, बिजुवार खेलकुद मैदान, नेकपाको कार्यालय, प्यूठान नगरपालिकाको भवन, निर्माणाधीन वृद्धाश्रम भवन र यस आसपासको क्षेत्रको खेत र बस्तीमा धेरै क्षति पुर्‍याउने प्यूठान नगरपालिका प्रमुख अर्जुनकुमार कक्षपतिले बताए ।

दिन प्रतिदिन झिमरुक नदी फाँटतर्फ सोझिन थालेपछि आफूहरू गम्भीर बनेको उनले सुनाए । कटान क्षेत्रको अवलोकन गरेर नदी तर्काउन शनिबारबाट दुईवटा एक्साभेटर प्रयोग भएको उनले बताए । ‘बर्खामा तटबन्धन गर्न सकिने अवस्था रहेन,’ नगर प्रमुख कक्षपतिले भने, ‘त्यसैले नदी पसेर क्षति नहोस् भनेर झिमरुको बहाव परिवर्तन गर्न लागेका हौं ।’

प्रकाशित : भाद्र ९, २०७६ ०९:५३
प्रतिक्रिया
पठाउनुहोस्

पासागाड पुल ५ वर्षदेखि अलपत्र

‘दैनिक डोजर लगाएर ट्र्याक नबनाए यातायातका साधन वारपार हुन सक्दैनन्, ‘जबरजस्ती खोलामा गाडी गुडाउँदा फस्ने र बगाउने डर उस्तै’
भीमबहादुर सिंह

जाजरकोट — छिन्चु–जाजरकोट खण्डमा यातायात सञ्चालन भएको ११ वर्ष बित्यो । सडक कालोपत्र भएको पनि ४ वर्ष बितेको छ । तर उक्त सडकमा पर्ने पासागाड खोलामा पुल निर्माण ५ वर्षदेखि अलपत्र छ । 

पुल निर्माणका लागि ५ वर्षअघि ठेक्का सम्झौता भएको थियो । खलंगाको प्रवेशद्वार मानिने खोलामा पुल बन्न ढिलाइ हुँदा स्थानीयले सास्ती भोगिरहेका छन् । पुल नहुँदा वर्षायाममा पटकपटक यातायात सेवा अबरुद्ध हुने गरेको छ । खोलामा आएको बाढीका कारण यात्रुलाई आवजावतमा सास्ती भएको हो । पुल नबन्दा बाढी आएको बखत रातभर सवारी साधन खोला किनारमा राखेर बस्नुपर्ने बाध्यता भएको चालक भीमबहादुर बुढाले बताए । ‘दैनिक डोजर लगाएर ट्र्याक नबनाए यातायातका साधन वारपार हुन सक्दैनन्,’ उनले भने, ‘जबरजस्ती खोलामा गाडी हाल्दा फस्ने र बगाउने समस्या छ ।’

पासागाड खोलामा गलत डिजाइनका कारण ५ वर्षदेखि पुल अलपत्र परेको हो । सडक विभाग र आईएमई आरसी कन्सल्टेन्सी ललितपुरको लापरवाहीको कारण पुल निर्माण अलपत्र परेको हो । परामर्शदाता कम्पनीले ७ लाखको लागतमा पुलको डिजाइन बनाएको कार्यालयले जनाएको छ । २ वर्षमै निर्माण सम्पन्न गर्नुपर्ने पुलको काम अझै सुरु भएको छैन । परामर्शदाताले हचुवामा गरेको डिजाइनका कारण पुल निर्माण कार्य हुन नसकेको सडक डिभिजन कार्यालय, चौरजहारीका डिभिजन प्रमुख नरेन्द्र भट्टले बताए ।

पुल निर्माणका लागि ५ वर्षअघि ३ करोडमा लुम्बिनी(आशिष जेभी निर्माण सेवा काठमाडौंले सडक विभागसँग सम्झौता गरेको थियो । पुल निर्माणस्थलको भौगोलिक अवस्था र डिजाइनबिच तालमेल नमिल्दा काम सुरु नभएको डिभिजन प्रमुख भट्टले बताए । उनका अनुसार सम्झौता अनुरुपको लागत र निर्माण कार्यको तालमेलसमेत मिलेको छैन । ‘पुलको डिजाइन एक छ, निर्माणस्थलको लोकेसन अर्को छ,’ उनले भने, ‘त्यसैले निर्माणमा समस्या देखियो ।’ परामर्शदाता कम्पनीले ४६ मिटर लम्बाइको पुल डिजाईन गरेको छ । तर पासागाड खोलामा सर्भे गर्दा २५ मिटरभन्दा लामो दूरी नभेटिएको उनको भनाइ छ ।

प्राविधिकले ३ वर्षअघि निर्माण कम्पनीलाई निर्माणस्थल देखाउने क्रममा गलत डिजाइन भएको पत्ता लागेको हो । सडक विभागलेे फेरि डिजाइन गरेर ठेक्का सम्झौताअनुरूप भुक्तानी दिने निश्चित भए तत्काल कार्य सुरु गर्ने कम्पनीले जनाएको छ । आईएमई आरसी कन्सल्टेन्सीलाई नै पुलको ‘रि–डिजाइन’ गर्न लगाएर पुल निर्माण प्रक्रिया अधि बढाउन लागेको डिभिजन प्रमुख भट्ट बताउँछन् । २ साताभित्र रि–डिजाइन स्वीकृतिका लागि विभागमा पेस हुने उनले दाबी गरे । ‘डिजाइन परिवर्तन हुन्छ,’ उनले भने, ‘तर ठेक्का रकम परिवर्तन हुदैन ।’

प्रकाशित : भाद्र ९, २०७६ ०९:५२
पूरा पढ्नुहोस्
प्रतिक्रिया
पठाउनुहोस्