सामाजिक अभियानमा युवा

विभिन्न जिल्लामा गठन भएका स्काई क्लबहरुमार्फत युवाहरु सामाजिक काममा सक्रिय भएका हुन् ।
कान्तिपुर संवाददाता

(दाङ) — युवाहरू बिग्रिए, कुलतमा लागे भन्ने गुनासा निकै सुन्न पाइन्छ तर यही भीडमा समाज बदल्न सक्रिय युवाहरूको पनि कमी छैन । तिलोत्तमा नगरपालिका–१७ रूपन्देहीकी रोश्नी कुँवरले गाउँकै आफूले पढेको विद्यालय प्रांगणमा पानी जमेको देखिन् ।

विभिन्न जिल्लाका युवाहरू बुटवलमा भेला भएर सामाजिक अभियानका कामबारे छलफल गर्दै । तस्बिर : दुर्गालाल केसी/कान्तिपुर 

पानी पर्दा विद्यार्थी जुत्ता/चप्पल बोकेर हिंड्नुपर्ने । विद्यार्थीले हातमा चप्पल होइन, झोला बोक्नुपर्छ भन्ने उद्घोष गर्दै उनले अन्य युवा साथीहरूका साथ इँटा बोकेर खाल्डा पुर्न थालिन् । युवाहरूको पहलमा विद्यालयप्रांगण हिंड्न लायक भयो ।

शुद्धोधन गाउँपालिका–७ रूपन्देहीकी सुनीता चौधरी लागूपदार्थ दुर्व्यसनविरुद्ध सडक नाटक लिएर गाउँगाउँ पसिन् । ‘युवाहरू लागूपदार्थ दुर्व्यसनमा फसिरहेको पाइन्छ । उनीहरूलाई समयमै सचेत नगराए गलत बाटोमा लाग्छन्,’ उनले भनिन्, ‘हामीले यसविरुद्ध गाउँगाउँमा अभियान चलाइरहेका छौं । यसले अभिभावकलाई पनि सचेत बनाएको छ ।’

शुद्धोधनकै सन्ध्या करणले पढ्न नपाएका बालबालिकालाई विद्यालय पठाउन सहयोग गरिन् । अछिता शुक्लले लामो समयदेखि नागरिकता नपाएका मधेसी समुदायलाई प्रशासनसँग सहजीकरण गरेर नागरिकता दिलाइन् । पुनिता हरिजनको समूह बालविवाह न्यूनीकरण अभियानमा लागेको छ । ‘मधेसी समुदायमा सानैमा विवाह गर्ने चलन छ,’ उनले भनिन्, ‘पढ्ने कुरालाई महत्त्व दिइँदैन । हामीले छोरीलाई विवाह गरिदिने होइन, स्कुल पठाउनुपर्छ भनेर घरदैलो अभियान चलाएका छौं ।’

तिलोत्तमा–११ की आशा भुसालको युवा समूहले अनाथ आश्रममा गएर असहायलाई कपडा वितरण गर्‍यो । सुन्दरबजार, लमजुङका कुमार कार्कीको समूहले समाजमा भएका विकृतिविरुद्ध अभियान चलाइरहेको छ । बेंसी सहरकी सिर्जना बसौला समाजमा भएका विभिन्न समस्यामाथि नियमित बहस चलाउँछिन् । नेपालगन्जकी श्वेता गुरुङ अन्तर्राष्ट्रिय बालमैत्री स्थानीय शासनको सम्मेलनमा सहभागी भएर उत्कृष्ट भइन् । चित्रमार्फत बालमैत्री नेपालको परिकल्पना गरेर उनी १४ वटा देशलाई पछि पार्दै प्रथम भएकी थिइन् । नवलपरासीको सुनवलकी पूजा बस्यालको समूहले १५ वर्षीया बालिकाको विवाह रोक्यो ।

सियारी–२, रूपन्देहीकी मान्ती कुर्मीले असहाय वृद्धालाई नियमित औषधि ल्याइदिन सहयोग गर्छिन् । यसका साथै स्वास्थ्य शिविर, दुर्घटना न्यूनीकरण सचेतना, गाँजाको बोट फँडानी, चेतनामूलक होर्डिङ बोर्ड राख्ने, धार्मिक सद्भाव, प्रहरी–नागरिक साझेदारी, क्यान्सरपीडितलाई राहत संकलन, वृक्षरोपण, पोलमा बत्ती जडान, किशोरीलाई आत्मरक्षा तालिम, मधेसी समुदायमा नागरिकता र जन्मदर्ता लिन सहयोगजस्ता कार्यक्रम पनि युवा समूहहरूले गरेका छन् ।

विभिन्न जिल्लामा गठन भएका स्काई क्लबहरूमार्फत युवाहरू सामाजिक काममा सक्रिय भएका हुन् । वर्ल्ड भिजनले युवाहरूको आर्थिक सशक्तीकरणमा टेवा पुर्‍याउन ज्ञान, सीप दिने उद्देश्यले क्लबहरू गठन गरेको थियो । क्लबमा आबद्ध युवाहरूले सामाजिक विकृतिविरुद्धका अभियानलाई पहिलो प्राथमिकता दिएर काम गरेका छन् । अन्तर्राष्ट्रिय युवा दिवसको अवसर पारेर क्लबमा आबद्ध युवाहरूले बुटवलमा आफ्ना कामको समीक्षा गरेका छन् । विभिन्न जिल्लाका कामको अनुभव सुन्दै थप नयाँ कार्यक्रमको पनि योजना बनाएको उनीहरूले बताए ।

प्रकाशित : भाद्र ४, २०७६ १०:१७
प्रतिक्रिया
पठाउनुहोस्

अनियमित विद्युत्ले समस्या

कान्तिपुर संवाददाता

प्यूठान — जिल्लामा विद्युत् नियमित नहुँदा जनताले ज्यादै दु:खकष्ट भोग्नुपरेको भन्दै मंगलबार प्यूठान र स्वर्गद्वारी नगरपालिकाका प्रमुखले संयुक्त रूपमा प्रमुख जिल्ला अधिकारीमार्फत ऊर्जा, जलस्रोत तथा सिँचाइ मन्त्रालयमा ध्यानाकर्षण पत्र पठाएका छन् । 

‘जिल्लामै विद्युत् उत्पादन भएर पनि विद्युत् अनियमितका कारण धेरै दु:ख भोग्नुपरेको छ,’ स्वर्गद्वारी नगरपालिकाका प्रमुख नेत्रबहादुर रोकायाले भने, ‘हामीले प्राकृतिक न्यायको अधिकारसमेत प्रयोग गर्न पाएनौं ।’ प्यूठानमा विद्युत् प्रसारणसँग सम्बद्ध बुटवल पावर कम्पनी र नेपाल विद्युत् प्राधिकरण प्यूठानले गडबडी पत्ता लगाई नियमित विद्युत् आपूर्तिको व्यवस्था मिलाउन तत्परता देखाउनुपर्ने उनले बताए । जिल्लामा विद्युत् अनियमितताले चौतर्फी समस्या पारेको छ । छिनमै विद्युत् जाने र छिनमै आउने समस्याले उपभोक्ता समस्यामा परेका हुन् । कलकारखाना, कुटानी पिसानी मिल, सञ्चारगृह सबै क्षेत्रले समस्या भोग्दै आएका छन् ।

नेपाल विद्युत् प्राधिकरण केन्द्रीय प्रसारण लाइनमार्फत आउने लाइनमा हुने गडबडीले गर्दा धेरै समस्या देखिएको बुटवल पावर कम्पनी झिमरुक जलविद्युत् केन्द्र प्यूठानले जनाएको छ । दाङको लमहीस्थित केन्द्रीय प्रसारण लाइनबाट झिमरुकलाई विद्युत् आएपछि झिमरुक उत्पादन केन्द्रबाट विद्युत् पठाउने गरिन्छ । तर उताबाट विद्युत् नियमित नहुँदा विद्युत् पठाउन नसकिएको झिमरुक जलविद्युत् उत्पादन केन्द्रका प्रमुख श्याम थापाले बताए । ‘प्यूठानको खलंगा अर्घाखाँची लाइनमा पटकपटक टिप जाने समस्या छ । यसलाई सुधार गर्नुपर्छ,’ उनले भने, ‘अर्घाखाँचीमा ब्रेकर फेर्दा टिप जाने आउने भइरहेको हो ।’ प्राधिकरणले लमहीस्थित केन्द्रीय प्रसारण लाइनबाट १ लाख ३२ हजार भोल्टेज क्षमताको पावर लाइन प्यूठानमा पठाएमात्रै झिमरुक पावर हाउसको मेसिन चलाउन सकिन्छ । तर कहिलेकाहीं थोरै भोल्टेज आउँदा मेसिन चलाउन समस्या हुने गरेको थापाले बताए । रोल्पा, प्यूठान र अर्घाखाँचीमा दिउँसोमा करिब ५ र रातिमा ९ मेगावाट विद्युत् खपत हुँदै आएको छ ।

झिमरुकस्थित जलविद्युत् उत्पादन केन्द्रले जेठ/असार महिनाबाहेक अन्य समयमा आफैंले विद्युत् उत्पादन गर्छ । ३० वर्षअघि निर्माण भएको केन्द्रबाट वर्षातको समयमा १२ मेगावाट विद्युत् उत्पादन गर्ने क्षमता छ । ‘पानी पर्याप्त भएको समयमा दैनिक १२ मेगावाट विद्युत् उत्पादन हुन्छ,’ केन्द्र प्रमुख थापाले भने, ‘सुक्खा समयमा निकै कम उत्पादन हुन्छ ।’ प्यूठानस्थित जसपुर दारिमचौरमा रहेको केन्द्रको उत्पादन गृहमा झिमरुक खोलाको पानीलाई भूमिगत माध्यमबाट ल्याई विद्युत् उत्पादन गरिएको छ ।

सबैतिर विद्युत् नियमित नभएको गुनासो आएको नेपाल विद्युत् प्राधिकरण बिजुवारका सुपरभाइजर भोजराज आचार्यले बताए । झिमरुक जलविद्युत्को ब्रेकरमा समस्या, अर्घाखाँचीको लाइनमा समस्या र केन्द्रीय प्रसारणमा हुने गडबडीले गर्दा विद्युत् नियमित नभएको उनको भनाइ छ । विद्युत् अनियमितताबारे विद्युत् प्राधिकरण प्यूठान शाखा र बुटवल पावर कम्पनी झिमरुक वितरण केन्द्रलाई पहल थाल्न निर्देशन दिएको प्रमुख जिल्ला अधिकारी कृष्णप्रसाद पन्थले बताए ।

प्रकाशित : भाद्र ४, २०७६ १०:१५
पूरा पढ्नुहोस्
प्रतिक्रिया
पठाउनुहोस्