विद्युत् पोल नसार्दा सडक अलपत्र

अमृता अनमोल

बुटवल — बिजुलीका पोल नसार्दा बेलवास–बेथरी सडक निर्माण अलपत्र परेको छ । चालु आर्थिक वर्षमा पूरा गर्ने लक्ष्यसहित तीन वर्षअघि निर्माण सुरु भएको थियो । २१ किलोमिटर दूरीको सडकको दोहोरो भागमा १ सय ७७ वटा पोल छन् । नयाँ मापदण्डअनुसारका पोल बनाउन विद्युत् कार्यालयले सिफारिस गरेको छ ।

त्यसअनुसार अब २ सय २३ नयाँ पोल गाड्नुपर्छ । यस क्षेत्रका अन्य सडकमा रकम दिएपछि विद्युत् कार्यालय आफैंले पोल व्यवस्थापन गरिदिन्छ । यो सडकमा भने विद्युत्ले पोल सारिदिन नसक्ने बताएको छ । पोल सार्ने अन्योलले सडक निर्माण नै अलपत्र परेको छ । डिभिजन सडक कार्यालय बुटवलले निर्माणको जिम्मा लिएको मार्ग अहिले प्रदेश मातहत आएको छ ।

सडक निर्माणमा चालु आर्थिक वर्षमा ३० करोड रुपैयाँ विनियोजन भएको छ । पर्यटन मार्ग हेर्ने जिम्मा पाएको प्रदेशको शिवपुर डिभिजन कार्यालयका इन्जिनियर गिरीशनन्दन पोरसले विद्युत् व्यवस्थापनको कुरा टुंगो नलाग्दा निर्माण सुरु नभएको बताए ।

अहिले सडकमा सात मिटरका पोल छन् । नियमतः ११ हजार भोल्टमा ११ मिटरको विद्युत् पोल राख्नुपर्छ । चार सय भोल्टमा आठ वा नौ मिटरको पोल चाहिन्छ । विद्युत् वितरण केन्द्र बुटवलले नयाँ सडक बनाउँदा सबै पोल ११ मिटरका राख्न सिफारिस गरेको छ ।

सडकले भने चलनचल्तीको कामचलाउ पोलको प्रस्ताव गरेको छ । निर्माण सुरु हुँदा नै विद्युत्ले त्यस मापदण्डअनुसारको इस्टिमेटसमेत पठाएको थियो । कार्यालय प्रमुख सञ्जयकुमार मिश्रले सडकले विद्युत् कार्यालयको मुख ताक्दा समस्या भएको बताए । ‘अहिले त्यहाँ भएका धेरै पोल जीर्ण छन् । मापदण्डअनुसारका पनि छैनन्,’ उनले भने, ‘तिनलाई सडकले मापदण्ड पुर्‍याएर व्यवस्थापन गर्नुपर्छ ।’

यस आयोजनामा विद्युत्, पानी, टेलिफोन, क्षतिपूर्तिलगायतमा १ करोड ५३ लाख रुपैयाँ विनियोजन भएको छ । विद्युत् कार्यालयले सिफारिस गरेका पोल बनाउँदा र सार्दा अनुमानित खर्चमा दोब्बर बढ्छ । अर्थात् विद्युत्मा मात्रै १ करोड ८२ लाख रुपैयाँ खर्च हुन्छ । रकम धेरै लाग्ने र आफैंले विद्युत् व्यवस्थापन गर्नुपर्ने भएकाले जटिलता थपिएको इन्जिनियर पोरसले बताए ।

सडकमा खानेपानी र कुलो व्यवस्थापन अर्को समस्या छ । खानेपानीका लागि बुटवल उपमहानगरपालिका र उपभोक्तालाई जिम्मा दिएर व्यवस्थापनको प्रयास थालिएको छ । कुलो व्यवस्थापन गर्न चालु आर्थिक वर्षमा मात्रै प्रदेश सरकारले एक करोड रकम विनियोजन गरेको छ । तर विद्युत् व्यवस्थापनका लागि लाग्ने रकम र कामको टुंगो अझै लागेको छैन ।

प्रकाशित : भाद्र ३, २०७६ ०९:४५
प्रतिक्रिया
पठाउनुहोस्

बेसहारालाई गाउँपालिकाको सहयोग

माधव अर्याल

पाल्पा — रैनादेवी छहरा गाउँपालिका–४, छहराका ७० वर्षीय दिलबहादुर कामी यतिबेला खुसी छन् । उनको दुई महिनाअघिसम्म खरले छाएको चुहिने झुप्रो थियो । अहिले नयाँ घरमा बसेका छन् । 

रैनादेवी छहरा गाउँपालिकाको एक लाख रुपैयाँभन्दा बढी सहयोगमा ओत लाग्ने गतिलो घर पाएको कामीले सुनाए । ‘०७२ सालको भूकम्पपछि बिस्तारै घर जीर्ण बन्दै गयो,’ उनले भने, ‘त्यसपछि खरको छानो फेर्न पनि उपाय भएन ।’

छोराहरू भारततिर बस्छन् । घरमा श्रीमान्/श्रीमतीमात्र छन् । पानी पर्दा भाँडा थापेर र छाता ओढेर बस्नुपर्थ्यो । यति मात्र होइन, रातभरि नसुतेरै धेरै वर्ष बिताएको उनले सुनाए । ‘हाम्रो घरमा आम्दानी केही छैन,’ उनले भने, ‘हामीलाई कसैले सहयोग पनि गरेन ।’ छोराहरूले नहेर्दा जीर्ण र चुहिएको घरमा बस्नुपरेको उनले सुनाए ।

वडाध्यक्ष विष्णुप्रसाद पोखरेल घुम्दै गएका बेला उनले घरका लागि गुनासो राखे । पोखरेलले गाउँ कार्यपालिकाको बैठकमा कुरा राखेपछि अहिले नयाँ घर बनेको हो । ‘कार्यपालिकाको बैठकमा कुरा राखेपछि गाउँपालिकाले सहयोग गर्ने निर्णय भयो,’ वडाध्यक्ष पोखरेलले भने, ‘प्रधानमन्त्री रोजगार कार्यक्रमको काम सकेपछि उनै श्रमिकलाई प्रयोग गरेर १७ दिनमा घर तयार भयो ।’ गाउँपालिकाको बजेटमा कामदार मात्र उनीहरूलाई प्रयोग गरेर घर बनाएको उनले सुनाए ।

‘हामीले विपन्न असहायका लागि सहयोग गर्ने कोष बनाएका छौं,’ प्रमुख प्रशासकीय अधिकृत ज्ञानुराम पन्थीले भने, ‘सोही अनुसारको बजेट परिचालन गरिएको हो ।’ गाउँपालिका अध्यक्ष रामबहादुर कार्कीले यसअघि पनि ज्येष्ठ नागरिकलाई सम्मान, बालबालिका, अपांगता भएकालाई पढ्नमा सहयोग गरेको बताए ।

यसअघि पनि गाउँपालिकाले बाबुआमाको मृत्युपछि बेसहारा बनेका तीन बालकलाई विद्यालय जाने वातावरण मिलाएको थियो । गाँसबासको व्यवस्था गरेपछि उनीहरू दैनिक विद्यालय गएका छन् । रैनादेवी छहरा–४, बिसाउना गाउँका खिमबहादुर बिटालु र आमा टेककुमारी बिटालुका तीन छोरालाई गाउँपालिकाले विद्यालयमा अध्ययन गर्ने वातावरण मिलाएको वडाध्यक्ष पोखरेलले बताए ।

बाबुआमाको मृत्युपछि आठ वर्षका विशाल, नौ वर्षका सुसन र १० वर्षका सुशील सडक बालबालिकाको अवस्थामा पुगेका थिए । उनीहरूको अवस्था दयनीय देखेपछि उनीहरूका काका चन्द्र बिटालुले गाउँ ल्याएका थिए । उनीहरूको पालनपोषण र पढाइका बारेमा गाउँपालिकाको वडामा समस्या राखेपछि वडा कार्यालयले उनीहरूको पढाइको व्यवस्था गरेको हो ।

खान र ओढ्ने, बिछ्याउने कपडा वडा कार्यालयले व्यवस्थापन गरेको छ । उनीहरूलाई नजिकको विद्यालयमा भर्ना गरेको छ । पोसाक, झोला र स्टेसनरी पनि वडाले दिएको छ । बालकलाई विद्यालय तहको शिक्षाका लागि वडाले सहयोग गर्नेछ । गत वर्ष भदौ महिनादेखि गाउँकै सल्लेरी प्राथमिक विद्यालयमा उनीहरू भर्ना भएका हुन् ।

आमाबुबा गुमाएर आर्थिक अवस्था कमजोर भएका हुन् वा बेसहारा जोसुकै नसक्नेलाई सहयोग गर्नु स्थानीय सरकारको कर्तव्य भएको गाउँपालिका उपाध्यक्ष चेतकुमारी थापाले बताइन् । यसअघि पनि गाउँपालिकाले दुई जना अपांगता भएका बालबालिकालाई सहयोग गरेको उनले बताइन् ।

ज्येष्ठ नागरिकलाई सम्मान गर्ने, अपांगता भएका, बेसहारालाई सहयोग गर्ने काममा कुनै कमी नहुने उनले सुनाइन् । रैनादेवी छहरा–४ का कक्षा ८ मा पढ्ने अपांगता भएका विजय सोमैलाई मासिक ६ सय भत्ता प्रदान गर्दै आएको छ ।

कक्षा १० का पदम रास्कोटीलाई पनि विद्यालयमा भर्ना गर्दै आर्थिक सहयोग गरेको उनले बताइन् । छहराकै सल्लेधारामा अध्ययन गर्ने विधान पोखरेललाई पनि वडाले पोसाक, कापी, कलम सहयोग गरेको छ ।

प्रकाशित : भाद्र ३, २०७६ ०९:४१
पूरा पढ्नुहोस्
प्रतिक्रिया
पठाउनुहोस्