पहिरो पीडितका घर प्रदेश सरकारले बनाउने

कान्तिपुर संवाददाता

रुपन्देही — गुल्मीको सत्यवतीका गाउँपालिकामा पहिरोले घरबासविहीन भएका परिवारको पुनर्वासको जिम्मा प्रदेश सरकारले लिने भएको छ । मुख्यमन्त्री शंकर पोखरेलले भूगर्भविद्को प्रतिवेदन, पहिरोले बस्नै नमिल्ने गरी भत्किएका घरपरिवार र प्रदेश सरकारको अध्ययन टोलीले दिने प्रतिवेदनका आधारमा वास्तविक पीडित पहिचान गरी पुनर्वासका लागि पहल गर्ने बताएका हुन् । 

प्रभावित गाउँका नेकपाका नेताको प्रतिनिधि मण्डल बिहीबारदेखि प्रदेश सरकारका मुख्यमन्त्रीसहित अन्य मन्त्रीसँगको भेटघाटमा छ । भेटकै क्रममा स्थानीय सरकारले जग्गा व्यवस्थापन गरेको खण्डमा सरकारले आवास योजनामार्फत पुनर्वासको जिम्मा लिने मुख्यमन्त्रीले बताएको टोलीका संयोजक एवं विपत् व्यवस्थापन तथा पुनःस्थापना सहजीकरण उपसमिति संयोजक अमर सिजापतीले बताए ।

मुख्यमन्त्रीका प्रेस सल्लाहकार शेरबहादुर केसीका अनुसार मुख्यमन्त्री पोखरेलसहित सिंगो प्रदेश सरकार नै पहिरो प्रभावितको उद्धार, राहत तथा पुर्नस्थापनामा गम्भिर छ । ‘प्रभावितको पूर्ण तथ्यांक आएपछि पुर्नस्थापनाका लागि योजना बनाउने सरकारको तयारी छ,’ उनले भने, ‘विस्थापितका लागि एकिकृत बस्ती निर्माण गर्न प्रदेश सरकार र स्थानीय सरकारले संयुक्त योजना गराउने गरी छलफल चलिरहेको छ ।’

स्थानीय सरकारले जग्गा व्यवस्थापन गर्न सके प्रदेश सरकारले आवास निर्माण गर्ने मुख्यमन्त्रीको धारणा रहेको उनले बताए । पहिरोबाट विस्थापितका लागि सत्यवती गाउँपालिका–४ लिम्घामा वडाकै पहलमा जग्गा व्यवस्थापनको काम भईरहेको वडा अध्यक्ष दानबहादुर रानाले बताए । ‘नजिकैको बारीमा एकिकृत बस्ती बसाउने गरी तयारी र छलफल भईरहेको छ,’ उनले भने, ‘एक साता भित्रै टुंगो लगाउँदैछौं ।’ लिम्घामा ३ घर पूर्ण क्षति र २१ घरमा बस्न नमिल्ने गरी क्षति भएका छन् । त्यस्तै ५५ घर उच्च जोखिममा छन् ।

त्यस्तै पहिरोबाट बढी प्रभावित भएको सत्यवती–३ ठुलो लुम्पेकमा पनि एकिकृत बस्तीका लागि सत्यवती–१ अस्लेवा र लुम्पेककै अर्को स्थानमा स्थानान्तरणका लागि प्रयास भईरहेको वडा अध्यक्ष रुकबहादुर रानाले बताए । ‘अस्लेवाको रामवारी वा लुम्पेककै चेमी, पाँहदीमा हुन सक्छ कि भनेर प्रयास गर्दै छौं,’ उनले भने, ‘गाउँका धेरै घर जोखिममा रहेकाले सुरक्षित स्थानमा एकिकृत बस्ती व्यवस्थापनका लागि पहल भईरहेको छ ।’ पहिरोले लुम्पकेमा १८ घर पूर्ण क्षति र ३ सय ७ घर उच्च जोखिममा छन् ।

प्रकाशित : श्रावण २५, २०७६ ०९:०७
प्रतिक्रिया
पठाउनुहोस्

साइक्लिङमा सोख

कान्तिपुर संवाददाता

नेपालगन्ज — नेपालगन्जका व्यवसायी सुरेन्द्र कार्की बजार आसपास नियमित साइकलमै यात्रा गरिरहेका हुन्छन् । पेट्रोल नचाहिने, स्वास्थ्य र वातावरणका लागि पनि उपयोगी भएकाले साइकल यात्रालाई महत्त्व दिएको कार्कीले बताए । ‘गर्मी मौसममा गाउँको जनजीवन नियाल्दै साइक्लिङ गर्दा छुट्टै आनन्द हुन्छ ।’

अहिले बाँकेका युवादेखि व्यवसायी, स्वास्थ्यकर्मी, सञ्चार उद्यमीमा साइक्लिङको सोख बढ्दो छ । धेरै युवाको रोजाइ अन्य बिलासिताका मोटरसाइकल र कारभन्दा साइकल रहन थालेका छ । कार्कीका अनुसार साइकिलिङ एरोबिक्स क्याटेगोरीको गेम हो । यो पुरै स्वाससँग सम्बन्धित हुन्छ । ‘सामान्य अवस्थामा भन्दा साइकल चलाउँदा १० प्रतिशत बढी अक्सिजन प्राप्त हुन्छ,’ उनले भने, ‘यस्तो अवस्थामा सामान्य ध्यानको विधि पनि थपे साइकिलिस्टका लागि थप उपयोगी हुन्छ ।’

नेपालगन्जमा साइक्लिङ ‘क्रेज’ बढेपछि यहाँका युवाले नेपालगन्ज साइक्लिङ क्लब स्थापना गरेका छन् । त्यसले साइक्लिङलाई थप विस्तार गर्दै छ । २०७५ सालमा ११ जनाबाट सुरु भएको नेपालगन्ज साइक्लिङ क्लबमा पछिल्लो समय सदस्य थपिदैं ४५ जना पुगेका छन् । सबै सदस्यले नियमित साइक्लिङ गर्छन् ।

हरेक दिन नियमित साइक्लिङ गर्नेको संख्या थपिंदै गएको क्लबका संस्थापक टिएस ठकुरीले बताए । ‘नियमित १५ जनासम्मले साईक्लिङ गर्छन्,’ उनले भने, ‘समय र अवस्था अनुसार संख्या थपघट हुने गर्छ ।’ शुरुमा सानो समूहभएपनि फाईदा देखिएपछि क्लबमा सदस्य बढ्दै छन् । क्लबमा शुरुमा सदस्य बनाउन ठुलै कसरत गर्नुपरे पनि पछिल्लो समय स्वतस्फुर्त रुपमा सदस्य बढदै गएको सदस्य सतीश निरौलाले बताए। ‘मोटरसाइकलको जादुमा परेका बाँकेका युवालाई हामीले हेलमेट लगाएर साइकल चलाउन हौस्यायौं,’ उनले भने, ‘साइक्लिङले नेपालगन्जमा माउन्टेन बाइक पनि बिक्री हुन थालेका छन् ।

नेपालगन्जमा अहिले २५ हजारदेखि १ लाख ५० हजार रुपैयाँसम्मका माउन्टेन बाइक बिक्रीका लागि राखिएका नेपालगन्ज बाइसाइकल प्रालिका प्रबन्धकसमेत रहेका उनले बताए । एक वर्षको अवधिमा १ लाख ५० हजारका चार् माउन्टेन बाइक बिक्री भएको ऊनले सुनाए ।

साइक्लिङको त्रेज बढेपछि नेपालगन्जमा साइकल लेनको माग भएको छ । नेपालगन्ज उपमहानगरपालिकाका प्रमुख धबलशमशेर राणा र उपप्रमुख उमा थापा दुवैले साइकल लेन बनाउने प्रतिबद्धता जनाएको क्लबका सचिव गगन थापाले बताए ।

प्रकाशित : श्रावण २५, २०७६ ०९:०६
पूरा पढ्नुहोस्
प्रतिक्रिया
पठाउनुहोस्