लुम्बिनीमा वर्षावास सुरु

वर्षावासका बेला साँझ–बिहान ध्यान बस्ने र परित्रान पाठ गर्ने गर्छन् । त्यस बेला बुद्ध गुन, धर्म गुन, संग गुन र धर्म देशना गर्दै पूजाआजा गरिन्छ । 
कान्तिपुर संवाददाता

लुम्बिनी — स्वदेशी एवं विदेशी भिक्षु/भिक्षुणीले यहाँ तीनमहिने वर्षावास सुरु गरेका छन् । बुद्धस्थलमा वर्षावास बस्न यसपटक थाइल्यान्डबाट १२ भिक्षु आएका छन् । बुद्ध धर्मावलम्बीका लागि वर्षावास महत्त्वपूर्ण पर्व हो ।

अखिल नेपाल भिक्षु महासंघका अध्यक्ष भिक्षु मैत्री महास्थवीरले लुम्बिनीस्थित नव मैत्री महाविहारमा बुधबार यसको शुभारम्भ गरेका हुन् । उनीसँगै शिष्यहरू श्रामनेर पिय रतन, कोण्डन्य, शारद, वाप्प र स्पर्ण वर्षावास बसेका छन् । उनलाई वर्षावासको निम्तो दिन बुटवलबाट उपासक/उपासिका लुम्बिनी पुगेका थिए ।

महाविहारमा पूजा/आराधना गरेर भिक्षुलाई निम्तो दिए । उनीहरूको निम्तो स्वीकार गर्दै भिक्षु र श्रामनेरले वर्षावास थाले । बुद्ध धर्ममा असारदेखि असोज पूर्णिमासम्मलाई वर्षावास भनिन्छ । लुम्बिनीको राजकीय थाई विहारमा ११ भिक्षु र म्यानमारको गोल्डेन टेम्पलमा २ जना भिक्षु वर्षावास बसेका छन् । त्यस्तै श्रीलंका विहारमा १ भिक्षु र महाबोधी सोसाइटीमा २ भिक्षु वर्षावास बसेका छन् । थेरावाद विहारमा ३ भिक्षु वर्षावास बसेका छन् ।

कपिलवस्तुको तिलौराकोटमा ४, निग्रोधाराममा ४ र नवलपरासीको रामग्राममा ४ थाई भिक्षु वर्षावास बसेका छन् । विभिन्न ४ मुलुकका ३६ भिक्षु/भिक्षुणी लुम्बिनी, रामग्राम र कपिलवस्तुमा वर्षावास बसेका छन् ।

‘राजकुमार सिद्धार्थले २९ वर्षको युवा अवस्था बिताएको तिलौराकोटमा वर्षावास बस्न बैंककबाट आएको छु,’ थाई भिक्षु फ्रा सुरापोनले भने, ‘राम्रो ध्यानलाभ गर्दैछु ।’ यहाँबाट प्राप्त हुने सद्भाव, करुणा र भ्रातृत्वलाई थाइल्यान्डमा लगेर बाँडने उनले प्रण गरे । वर्षावास बस्दा आफूले गरेको कमजोरी र त्रुटिमा क्षमादान पाउने हुँदा भिक्षु–भिक्षुणी वर्षावास बस्ने लुम्बिनी बौद्ध विश्व विद्यालयका उपप्राध्यापक भिक्षु श्रीवजिरप्रेमले बताए ।

वर्षावासका बेला साॅझ–बिहान ध्यान बस्ने र परित्रान पाठ गर्ने गर्छन् । त्यस बेला बुद्ध गुन, धर्म गुन, संग गुन र धर्म देशना गर्दै पूजाआजा गरिन्छ । वर्षावासका बेला बिहान एक छाक खाना खाने गर्छन् । सकेसम्म स्थानीयसँग भिक्षा मागेर खाने गर्छन् । ३ महिनापछि फेरि वर्षावासका लागि निम्तो दिने उपासक/उपासिका आएर भिक्षुलाई चिवर (पहेंलो वस्त्र) दान गर्छन् । त्यसपछि वर्षावास पूरा हुन्छ ।

प्रकाशित : श्रावण ३, २०७६ ०९:४८
प्रतिक्रिया
पठाउनुहोस्

नहरमा पानी छोडियो

कान्तिपुर संवाददाता

बर्दिया — यहाँस्थित बबई सिँचाइ आयोजनाले नहरमा पानी छाडेको छ । पूर्वतर्फको नहरमा यसपटक पानी छाडिएको हो । आयोजनाको मूल बाँधबाट पश्चिम २८ र पूर्वतर्फ ३४ किलोमिटर दूरीसम्म पानी पुगेको छ । जिल्लामा रोपाइँ सकिन लागे पनि सिँचाइका लागि पानी आवश्यक छ ।

केही दिन वर्षा भएपछि बबईमा पानी बढेको छ । त्यसले सबै क्षेत्रको नहरमा पानी पुगेको हो । बढैयाताल गाउँपालिकामा रहेको कच्ची नहरमा पनि पानी छ । यसअघि पानी नभएर नहर सुक्खा थियो । अहिले बबईमा पानीको मात्रा ३० क्युमेक्सभन्दा बढी छ । वर्षा हुनुअघि ५ क्युमेक्स थियो ।

आयोजनाका प्रमुख कुञ्जनभक्त श्रेष्ठले पानी बढेपछि मूल र शाखा नहरमा पानी पुगेको बताए । ‘पूर्व–पश्चिम सबैतिरका नहरमा पानी छाडेका छौं । रोपाइँ गर्न सहज भएको छ,’ उनले भने, ‘मूल नहरमा पानीको समस्या छैन । शाखा नहरमा माथिका किसानले पानी छेक्ने गरेकाले तलाका किसानलाई ढिलो पानी पुग्ने समस्या छ ।’

आयोजनाका कर्मचारीले सबैतिर पुग्ने गरी नहरमा पानी छाडेका छन् । ‘हामीले सबैतिर पानी पुग्ने गरी मिलाएका हुन्छौं । तर, किसानले भने बढी पानी प्रयोग गर्दा समस्या हुने गरेको छ,’ उनले भने । आयोजनाले ५ महिना पानी दिने र बाँकी समय मर्मतको काम गर्दै आएको छ । बबईमा पानीको मात्रा कम भएकाले सबैतिर पठाउन समस्या हुने गरेको हो ।

आयोजनाबाट जिल्लामा ३६ हजार हेक्टरमा सिंचाइ हुने लक्ष्य छ । पश्चिम क्षेत्रमा भने बढी सिंचाइ हुने गरेको छ । आयोजनाका लागि अहिलेसम्म ४ अर्बभन्दा बढी लगानी भइसकेको छ । आयोजनाका लागि आवश्यक पर्ने पानीका लागि भेरी बबई डाइभर्सन आयोजना सुरु गरिएको छ । ६ महिनापछि पहिलो चरणमा भेरीको पानी बबई हुँदै खेतमा पुग्नेछ । पहिलोपल्ट भेरीबाट बबई नदीमा ८ देखि १०घनमिटर प्रतिसेकेन्ड पानी छोडिनेछ ।

पानीले बर्दियामा बाह्रै महिना सिंचाइ हुने लक्ष्य छ । भेरीको पानी सुरुङमार्फत बर्दियाको चेपाङस्थित बबई नदीमा खसाउने तयारी छ । मूल गेटको पूर्वीतर्फको पदनहा, बानियाभार, मगरागाडी, धधबार महममदपुर, कालिका, मैनापोखर, सोरहवा, जमुनी र बाँसगढी नगरपालिकाका र पश्चिमतिर नेउलापुर, बगनाहा, ढोढरी, सूर्यपटुवा, ठाकुरद्वारा नगरपालिका लगायत मधुवन नगरपालिका र गुलरिया नगरपालिकामा समेत सिंचाइ हुने आयोजनाको दाबी छ ।

प्रकाशित : श्रावण ३, २०७६ ०९:४७
पूरा पढ्नुहोस्
प्रतिक्रिया
पठाउनुहोस्