खानेपानीका लागि साढे ३१ करोडको आयोजना

काशीराम डाँगी

रोल्पा — रोल्पा सदरमुकाम लिबाङमा सहरी खानेपानी तथा सरसफाइ आयोजना सुरु हुने भएको छ । करिब ४ वर्षअघि थालिएको पहलको अन्तिम सम्झौता भएपछि काम अघि बढेको हो । 

लिबाङमा एसियाली विकास बैंक (एडीबी) को आर्थिक सहयोगमा सदरमुकामसहित तीनवटा वडामा ठूलो लगानीमा खानेपानी तथा सरसफाइ आयोजना सुरु गर्न रोल्पा नगरपालिका र सहरी खानेपानी तथा सरसफाइ आयोजना विभागबीच निर्माण सम्झौता भएको छ । आउँदो आर्थिक वर्षदेखि सुरु भई तीन वर्षभित्र उक्त आयोजना सम्पन्न हुने नगरले जनाएको छ ।

रोल्पा नगरका प्रमुख पूर्ण केसी, स्थानीय उपभोक्ता समितिका अध्यक्ष लीलाधर आचार्य र सहरी खानेपानी तथा सरसफाइ विभागका अधिकारीबीच आयोजना छिट्टै सुरु गर्ने सहमति भएको छ । आयोजना सम्पन्न गर्न ३१ करोड ५२ लाख ४२ हजार ९ सय ६४ रुपैयाँ खर्चने सहमति भएको नगरले जनाएको छ । आयोजनाबाट शुद्ध र भरपर्दो रूपमा खानेपानी पाउन नगरवासीलाई सजिलो हुने नगर प्रमुख केसीले बताए ।

वर्षौंदेखि खानेपानीको समस्या बेहोर्दै आएका लिबाङवासी बृहत् खानेपानी परियोजना सञ्चालन हुने भएपछि खुसी भएका छन् । यसअघि परियोजनाले ‘फिजिबिलिटी सर्भे’ गर्न र स्थानीय उपभोक्ताबाट रकम संकलन गर्न ढिलाइ गरेको थियो । आयोजनाको ‘सर्भे रिपोर्ट (डीपीआर) गर्न समय लागेका कारण आयोजना सुरु हुन केही वर्ष ढिलो भएको उपभोक्ता समितिका अध्यक्ष आचार्यले बताए । ‘आयोजना सुरु हुने निश्चित भयो । नगरवासीलाई पानीको समस्या पर्दैन,’ उनले भने ।

स्थानीय तहले मुहान दर्ता गर्दा र उपभोक्ता समिति दर्ता गर्दा बढी समय लागेको उनले बताए । आयोजनाको प्रावधानअनुसार योजना सुरु हुने स्थानीय तहबीच सहकार्य गर्न कुल लगानीको २५ प्रतिशत म्याचिङ फन्ड बजेट राख्नुपर्ने हुन्छ । उपभोक्ताले ५ प्रतिशत बेहोर्नुपर्ने प्रावधान छ ।

आयोजना सञ्चालन हुने रोल्पा नगरपालिकाका–१, २ र ४ मा करिब १ हजार २ सय घरधुरी छन् । आयोजनाको सुरुवाती कार्य थाल्दा एडीबीले ४० करोड ऋण लगानी गर्ने धारणा सार्वजनिक गरेको थियो । रोल्पामा सुरु भएको यो तेस्रो चरणको साना सहरी आयोजना हो ।

विभागले यसअघि रुकुम र सल्यानस्थित दोस्रो चरणअन्तर्गतको साना सहरी परियोजनाको कार्य सम्पन्न गरिसकेको छ । नगरपालिका घोषणा गरिएका स्थानको सहरी विकास गर्ने उद्देश्यले सरकारले एसियाली विकास बैंकबाट ऋण लिएर पनि यस्ता आयोजना सञ्चालन गर्दै आएको छ ।

रोल्पा नगरपालिकामा खानेपानी र सरसफाइका थुप्रै समस्या छन् । हाल पाइप व्यवस्थापन, बजार सरसफाइलगायत समस्या छन् । लामो समय लिबाङ बजार खानेपानी उपभोक्ता समितिका अध्यक्ष रहिसकेका रोल्पा नगरपालिका–१० का वडाध्यक्ष मानबहादुर खत्रीले स्थानीय उपभोक्ता अनुशासनहीन भएकाले पाइप व्यवस्थापन गर्न नसकिएको बताए । ‘बजारभित्र मात्रै खानेपानीका करिब ५ सय धारा वितरण गरिएको छ,’ उनले भने, ‘लिबाङ बजारमा दैनिक करिब २ लाख १० हजार लिटरभन्दा बढी पानी खपत हुन्छ ।’

प्रकाशित : असार ३१, २०७६ ०९:२६
प्रतिक्रिया
पठाउनुहोस्

उपप्रमुखबिनै नगरसभा

कान्तिपुर संवाददाता

कपिलवस्तु — बुद्धभूमि र कपिलवस्तु नगरपालिका उपप्रमुखले पाँचौं नगरसभा बहिष्कार गरेका छन् । आइतबार भएको नगरसभा दुवैले बहिष्कार गरेका हुन् । 

बुद्धभूमि नगरपालिका उपप्रमुख मीरा चौधरीले प्रमुख केशवकुमार श्रेष्ठले एकलौटी र मनोमानी तरिकाले कार्यक्रम र बजेट विनियोजन गरेकाले नगरसभा बहिष्कार गरेको बताइन् । ‘उपप्रमुखका सानातिना कुराको पनि सुनुवाइ हुँदैन,’ उनले भनिन्, ‘त्यस्तो कार्यक्रममा बस्नुको औचित्य देखिनँ ।’

सभामा गएर नोट अफ डिसेन्ट लेखेर फर्किएको उनले बताइन् । कार्यक्रममा उपस्थित भए पनि बजेट सार्वजनिक हुँदा उनी बाहिरिएकी थिइन् । प्रमुख केशवकुमार श्रेष्ठले भने नगरले सम्मान गर्दा गर्दै पनि उपप्रमुख चौधरी अर्कैको कुराले बहकिएको बताए । ‘हामीले सम्मान गरेकै छौं,’ उनले भने,‘हामी मिलेर काम गर्न तयार छौं ।’
बुद्धभूमिको सभा नेकपाका ४ वडाध्यक्ष र १५ नगर सदस्यले पनि बहिष्कार गरेका छन् । २, ३, ९ र ६ का वडाध्यक्ष र नगर सदस्यले विज्ञप्ति निकालेर बहिष्कार गरेका हुन् । उनीहरूले नगरसभा विधिविधानविपरीत भएकाले बहिष्कार गरेको बताए । सभाले आगामी आवका लागि ८६ करोडको बजेट पारित गरेको छ ।

कपिलवस्तु नगरपालिका उपप्रमुख लक्ष्मी गुप्ताले पनि नगरसभा बहिष्कार गरेकी छन् । स्थानीय सरकार संचालन ऐन दफा ६६ अनुसार बजेट संकलन तथा दफा ६७ अनुसार बजेट तर्जुमा बैठक नै नबसी गर्न लागेकाले आफूले बहिष्कार गरेको उनले बताइन् । उनीबाहेक अन्य सबै उपस्थित थिए । ‘उपप्रमुख गुप्ताले बहिष्कार गरेकी छैनन्,’ नगर प्रमुख किरण सिंहले भने, ‘अनुपस्थित मात्रै भएकी हुन् ।’ सभाले आगामी आवका लागि ८९ करोडको बजेट पारित गरेको छ ।

प्रकाशित : असार ३१, २०७६ ०९:२५
पूरा पढ्नुहोस्
प्रतिक्रिया
पठाउनुहोस्