नेकपाको जिल्ला नेतृत्व चयनप्रति केन्द्रीय सदस्यको आपत्ति 

नेकपाको अध्यक्षमा रोशनबहादुर गाहा मगर
नारायण शर्मा

नवलपरासी — पूर्वी नवलपरासीमा नेकपाको अध्यक्षमा रोशनबहादुर गाहा मगर चयन भएपछि जिल्लाभित्र नेकपाको राजनीति एकाएक तातेको छ । 

नेकपाका शक्तिशाली केन्द्रीय सदस्य तिलक महतको कडा आपत्तिबीच रोशन गाह जिल्ला अध्यक्षमा चयन भएको विषय यहाँको राजनीतिमा अर्थपूर्ण मानिएको छ।

संघीय सांसद तथा नेकपाका केन्द्रीय सदस्य तिलक महत आफ्ना बलिया प्रतिस्पर्धी रोशन बहादुर गाहालाई पार्टीको जिल्ला अध्यक्षमा ल्याउँदा आफू कमजोर हुने भन्दै माओवादीका कुनै नेतालाई जिल्ला अध्यक्ष बनाउने र आफू जिल्ला इन्चार्ज हुने दाउमा थिए।

प्रधानमन्त्री तथा पार्टी अध्यक्ष केपी ओली निकटमानिने महतको कडा विरोध र असहमतिबीच गाहले पार्टी अध्यक्षको पद खोसेर लिएको भन्दै जिल्लामा चर्चा सुरु भएको छ।
पछिल्लो समय महत र गाह पानी बाराबारको स्थितिमा छन्।

गत शनिबार प्रधानमन्त्री केपी ओली कावासोतीमा सरकारी कार्यालयको उद्घाटन समारोहको मञ्चमा बोलाउँदा समेत रोशन गाह, अर्का प्रभावशाली जिल्ला नेता जीवन श्रेष्ठ (नेकपा एमालेका जिल्ला पार्टी सचिव) र अर्का प्रदेशसभा सदस्य जनकलाल श्रेष्ठ मञ्चमा नगएर आम कार्यकर्ता बस्ने लहरमा भुइमा राखिएको कुर्चिमा बसेका थिए। ३ जना सांसदलाई मञ्चमा पटक पटक बोलाउदापनि नगएर तल्लो रो मा बसेका थिए।

प्रधानमन्त्री सहभागी त्यो कार्यक्रममा सांसद महतले नवलपरासीमा भएका अहिले सम्मका सबै विकासका काम आफू एक्लैले गरेको भन्ने अभिव्यक्ति दिएको भन्दै त्यसमा असहमति जनाउँदै ती जिल्ला नेता मञ्चमा नगएका हुन्।
पछिल्लो राजनीतिमा यहाँका चर्चित नेता तथा पूर्वसांसद जीवन श्रेष्ठ, रोशन गाहा र अर्का प्रदेश सभा सदस्य जनकलाल श्रेष्ठ एउटा खेमा रहेका छन् भने तिलक महत एक्लिएका छन्। ती सबै पूर्व एमालेका जिल्ला नेता हुन्।
पूर्व सांसद र प्रदेशसभा सदस्य समेत रहेका गाहा पूर्व एमालेका जिल्ला अध्यक्ष समेत हुन्। गाहा २०७४ को निर्वाचनमा नवलपुर क्षेत्र नंबर १ ख बाट प्रदेशसभामा निर्वाचित भएका थिए। मतदाता र कार्यकर्ताबीच लोकप्रिय रहेका गाहलाई प्रदेश सभा सदस्य हुँदाहुँदै उनैलाई जिल्ला अध्यक्ष नदिन पार्टी अध्यक्ष केपी ओलि निकट मानिने महत अन्तिमसम्म पनि लागेको पार्टी स्रोतले दाबी गरेको छ।

स्थानीय तहमा पनि भागबण्डा
आठ वटा स्थानीय तह रहेको नवलपुरमा पूर्व एमालेलाई पाँच अध्यक्ष र पूर्व माओवादीलाई तीन अध्यक्ष दिने सहमति भएको छ।

पूर्व एमालेले गैंडाकोट नगरपालिका, कावासोती नगरपालिका, बुलिङटार गाउँपालिका, बौदीकाली गाउँपालिका, विनयी त्रिवेणी गाउँपालिकाको अध्यक्ष पाउने भएको छ भने पूर्व माओवादीले देवचुली नगरपालिका , मध्यबिन्दू नगरपालिका र हुप्सेकोट गाउँपालिकाको अध्यक्ष पाउने भएको छ।

नेकपाका नेता बालकृष्ण रानाभाटका अनुसार गाउँपालिकाका वडाहरु पूर्व एमालेले ६७ प्रतिशत र पूर्व माओवादीले ३३ प्रतिशत पाउने सहमति भएको छ भने नगरपालिकाका वडाहरुमा पूर्व एमालेले ५७ प्रतिशत र पूर्व माओवादीले ४३ प्रतिशतको आधारमा सहमति भएको छ।

प्रकाशित : वैशाख ९, २०७६ १४:४७
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

ललिता निवासको जग्गा सरकारी हो, व्यक्तिको हुनै सक्दैन : देउवा

अर्जुन राजवंशी

बिर्तामोड — नेपाली कांग्रेसका सभापति शेरबहादुर देउवाले ललिता निवासको जग्गामा व्यक्तिको नाम जोडिन नमिल्ने बताए । उनले ललिता निवासको जमिन सरकारले अधिग्रहण गरिसकेको जमिन भएको स्पष्ट पारे । पूर्व प्रधानमन्त्री समेत रहेका देउवाले अधिग्रहण गरेको जमिन सरकारी बाहेक अन्यको हुनै नसक्ने दाबी गरे ।

उनले उक्त जमिन सरकारी नभए सुवर्ण शम्शेरको छोरा-नातिको हुनुपर्ने जिकीर गरे । 'प्रधानमन्त्री निवास बालुवाटारको ललिता निवास र सभामुख निवास रहेको जमिन सुवर्ण शम्शेरको हो । सरकारले उक्त जमिन अधिग्रहण गरेर प्राप्त गरिसकेको छ,' देउवाले भने, 'सरकारले अधिग्रहण गरिसकेको जमिन कसरी व्यक्तिको हुन्छ ? यदी व्यक्तिको नाममा हुन्छ भने त्यो जमिन सुवर्ण शम्शेरका छोरा-नातिको नाममा हुनुपर्ने हो । अन्यको नाममा के आधारले हुन्छ ?'

सोमबार झापाको चन्द्रगढी विमानस्थलमा प्रेस युनियनले आयोजना गरेको पत्रकार भेटघाटमा बोल्दै देउवाले सरकार अधिनायकवाद लाद्नेतर्फ अग्रसर भएको आरोप लगाए । उनले स्वतन्त्र प्रेसमाथि अंकुश लगाउन खोजेको, जथाभावी पत्रकार पक्राउ गर्न थालेको, सेना परिचालनको अधिकार प्रधानमन्त्री मातहत ल्याउन खोज्नु अधिनायकवादको संकेत भएको दाबी गरे । पत्रकारको प्रश्नमा सभापति देउवाले भोट नदिने अनि, कांग्रेस कमजोर प्रतिपक्षी भयो भनेर आलोचना गर्नुको तुक नरहेको भन्दै कटाक्ष गरे । 'भोटको बेलामा कांग्रेसलाई भोट नदिने । अनि, अहिले कांग्रेसको प्रतिपक्षी भूमिका कमजोर भयो भनेर आलोचना गर्ने ?,' उनको प्रश्न थियो ।

देउवाले पार्टी विधानअनुसार बाँकी रहेका समितिहरु सबैको सहमतिमै गठन गर्ने बताए । उनले संघीय संरचनाअनुसार गठन गर्न बाँकी प्रदेशलगायत समितिहरु पार्टीभित्रका सबै पक्षको सहमतिमै गठन गरेर अघि बढ्ने विश्वास दिलाए । तर, पार्टी विधानअनुसार गठन गर्न बाँकी सबै समितिहरु आगामी महाधिवेशन अगावै गर्ने कि अहिलेकै अवस्थामा अघि बढ्ने भन्नेबारे अहिलेनै आफूले केही भन्न नसक्ने बताए ।

'विधानअनुसार समितिहरु गठन गर्न जरुरी छ । ती समितिहरु गठन गर्दा सबैलाई समेटेरै गठन गर्ने हो । तर, समितिहरु महाधिवेशन अगावै गठन गर्ने कि महाधिवेशनसम्म यसरी नै अघि बढ्ने भन्ने कुरा संक्रमणकालीन अवस्थामा रहेकाले अहिले नै यो विषयमा म केही भन्दिन ।'

प्रकाशित : वैशाख ९, २०७६ १४:२५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×