अनुशासित चालकलाई सम्मान

कान्तिपुर संवाददाता

पाल्पा — तानसेन नगरपालिका ६ बर्तुङका चालक तथा गाडीधनी जुद्धबहादुर कार्कीलाई नचिन्ने कमै छन्  । जिल्लाको रामपुर क्षेत्रमा कार्कीको गाडी चलाउने तरिका अरूको भन्दा फकर छ  ।

(पाल्पा) -तानसेन नगरपालिका ६ बर्तुङका चालक तथा गाडीधनी जुद्धबहादुर कार्कीलाई नचिन्ने कमै छन् । जिल्लाको रामपुर क्षेत्रमा कार्कीको गाडी चलाउने तरिका अरूको भन्दा फकर छ । उनले चलाएको बसमा बसेपछि यात्रा सुरक्षित हुन्छ भन्ने विश्वास छ । कच्ची तथा साँघुरो सडकमा उनले सधैं सुरक्षित यात्रा गराए ।


‘रामपुरको सडक ओटासिल भएपछि चलाएको छैन,’ उनले भने, ‘कच्ची र अप्ठेरो बाटो हुँदा गुडाएँ ।’ उनले सुरक्षित चलाउने विश्वासले त्यही गाडीमा यात्रा गर्ने धेरै थिए । अहिले तानसेन–बुटवल खण्डमा गाडी चलाउँछन् । कार्कीलाई जिल्ला प्रहरी र ट्राफिकले सम्मान गरेका छन् । पाका र गाडी चलाउने शैली फरक भएकाले दुर्घटना गराएका छैनन् । अनुशासित चालकका रूपमा आफ्नो स्थान बनाएका छन् । ‘अहिलेसम्म सुरक्षित यात्रा गराएको छु,’ उनले भने, ‘धेरै वर्ष भयो तर पनि त्यस्तो अवस्था आएको छैन ।’


उनी मात्र होइन किरण राउत क्षत्री सुरक्षित गाडी चलाउने चालकमा दरिएका छन् । युवाले तीव्र गतिमा चलाउने आरोपबाट मुक्त छन् । ‘अनुशासित भएर चलाएको छु,’ उनले भने, ‘आगामी दिनमा पनि सुरक्षित यात्रा गराउने प्रतिबद्धता छ ।’ उनलाई पनि सम्मानित गरिएको हो । जिल्लाको रामपुर, बाकामलाङ, ग्रामीण भेगका साथै पक्की सडकमा चलाउने केही चालक छनोट गरेर सम्मान गरेको हो । चालक–सहचालकलाई जिम्मेवार, पेसाप्रति सम्मान र उनीहरूलाई सचेत गराउन सम्मान गरिएको प्रहरी प्रमुख एसपी विश्वमणि पोखरेलले बताए ।


उनका अनुसार लामो समयदेखि चालकको काम गर्दै आएका उत्कृष्ट चालक र ट्राफिक व्यवस्थापनमा सहयोग गर्ने व्यक्तित्वलाई सम्मान गरेको हो । ट्राफिक व्यवस्थापनमा सहयोग पुर्‍याएका टीका पौडेललाई नगद र प्रमाणपत्रबाट सम्मान गरिएको छ । कार्की र राउत क्षत्रीसहित मीनबहादुर गुरुङ, चन्द्रबहादुर घर्ती, बलनारायण श्रेष्ठ, शिवबहादुर घर्ती र ऋषिराम भट्टराईलाई उत्कृष्ट चालकका रूपमा सम्मान गरिएको छ ।


चालक भइसकेपछि कुनै दुर्घटना नगराएका, सडक अनुशासन र ट्राफिक नियम पालना गरेकालाई सम्मान प्रदान गरिएको ट्राफिक प्रहरी प्रमुख डम्बर गिरीले बताए । उनका अनुसार आगामी दिनमा उत्कृष्ट चालक सम्मान कार्यक्रमलाई निरन्तरता दिइनेछ । यातायात व्यवसायी महासंघका प्रदेश संयोजक डिलबहादुर ढुंगानाले यस्तो कदमले चालकको मनोबल बढ्ने र अन्य चालकलाई पनि सही काम गर्दा पुरस्कृत भइन्छ भन्ने भावना जागृत हुने बताए । ‘पुरस्कार र दण्ड जरिवानाले अनुशासित बनाउन मद्धत गर्छ,’ उनले भने, ‘यस्तो कामलाई निरन्तरता दिनुपर्छ ।’


सहायता कक्ष
तानसेन बसपार्कसहित विभिन्न स्थानमा यात्रु सहायकता कक्ष सुरु गरिएको छ । यात्रुको सुरक्षित यात्राका लागि जिल्लाका तानसेनबाहेक रामपुर बसपार्क, आर्यभञ्ज्याङ, हार्थाेक, छहरा, ताँहु, सराई लगायतका स्थानमा यात्रु सहायता कक्ष सुरु भएको हुन् । बसपार्कमा राखेको कक्षको एसपी पोखरेलले उद्घाटन गर्दै यात्रुलाई सुरक्षित रूपमा यात्रा गराउन सहयोगीको भूमिका निर्वाह हुने बताए ।


कक्षमा ट्राफिक प्रहरी, जनपथ प्रहरी र नागरिकको सक्रियता रहनेछ । चाडपर्वको समयमा अत्यधिक सवारी साधन गुड्छन् । दुर्घटना नहोस् भनेर चालक, सहचालक र यात्रुलाई सहयोग गर्ने उनले बताए । कक्षबाट जनचेतना फैलाउने, गन्तव्यमा पुग्न बाधाअवरोध नहोस् भन्ने चाहनासहित सहायता कक्ष सुरु गरेको एसपी पोखरेलले बताए ।

प्रकाशित : आश्विन २४, २०७५ ०९:४०
प्रतिक्रिया
पठाउनुहोस्

विकट गाउँ झिलिमिली

ठाकुरसिंह थारु

नेपालगन्ज — बाँकेको विकट राप्ती सोनारी गाउँपालिका १ खासकुश्मामा पहिलोपटक मंगलबारबाट बिजुली बलेको छ  । विद्युत् विस्तारपछि त्यस क्षेत्रका सर्वसाधारणको बत्ती बाल्ने सपना पूरा भएको हो  ।

गाउँमा बिजुली पुग्न सकिएको थिएन । मंगलबार खासकुश्मास्थित डेढ सय सर्वसाधारणका घरमा बिजुली पुगेको हो ।


केही दिनमै बाँकी चार सय घरमा बिजुली पुग्नेछ । त्यसका लागि चार सय बिद्युत् मिटर वितरण गरिसकिएको छ । ऊर्जा, जालस्रोत तथा सिँचाइमन्त्री वर्षमान पुनले बिजुली बालेर उद्घाटन गरेका हुन् । विकट क्षेत्रमा पहिलो पटक बिजुली बाल्न विद्युत् प्राधिकरणका प्रबन्ध निर्देशक कुलमान घिसिङ पनि मन्त्रीसँगै आएका थिए । मन्त्री पुनले राप्ती सोनारी र त्यसभन्दा बढी पछाडि परेको नरैनापुर गाउँपालिकाका सबै बस्तीमा विद्युत् पुर्‍याउने प्रतिबद्धता जनाए ।


नरैनापुर गाउँपालिकाका सर्वसाधारण अझै टुकीको भरमा छन् । त्यस क्षेत्रमा विद्युत् विस्तारको काम दुई दशकअघि सुरु गरिएको थियो । पछिल्लो नौ वर्षदेखि वनले रूख काट्न अनुमति नदिएको जनाउँदै काम रोकिँदै आएको थियो । वर्तमान सरकारले विद्युत् विस्तारका लागि रूख काट्न बाटो खोलिदिएपछि बिजुलीको सपना पूरा हुने भएको हो ।


खासकुश्मामा दसैंअघि नै बिजुली बाल्ने गरी कामलाई तीव्रता दिइएको थियो । नरैनापुरमा आगामी वैशाखसम्म विद्युत् विस्तार भइसक्ने छ । संघीय सांसद महेश्वर गहतराजले आउने नयाँ वर्षसम्म बिजुली बाल्ने लक्ष्यसहित काम सुरु गरिएको बताए । उनका अनुसार विभिन्न कारणले रोकिएको विद्युत् विस्तारको कामले गति लिएको छ । राप्ती पारि विद्युत् विस्तारका लागि १३ वटा ट्रान्सफर जडान भइरहेका छन् । ‘दसैंसम्म खासकुश्मामा बिजुली बाल्न सफल भएका छौं । अन्य क्षेत्रमा पनि विस्तार हुन्छ,’ उनले भने ।


गत साउन १४ गते बसेको मन्त्रिपरिषद्को बैठकले विद्युत् विस्तारको बाटो खुला गरेको थियो । उक्त निर्णयपछि नेपालगन्ज एयरपोर्टदेखि र राप्तीसोनारी गाउँपालिकाको फत्तेपुर क्षेत्रको वन हुँदै विद्युत् विस्तारको काम सुरु भएको थियो । कोहलपुरबाट धामपुरसम्म ३३ केभी प्रसारण लाइनको अनुमति दिने निर्णय गरेको हो । तर उक्त लाइन विस्तारका लागि दुई वर्षको अवधि भए पनि पाँच वर्षसम्म पूरा हुनसकेको थिएन । पछिल्लो पल्ट त्यहाँबाट ११ हजार केभी प्रशासण लाइनबाट नरैनापुरसम्म विद्युत् वितरण गर्ने गरी तयारीको भइरहेको छ ।


राप्तीपारि विद्युतीकरणका लागि ३३ केभी लाइन विस्तारमा बिनौना(फत्तेपुर–गंगापुर, कटकुइँया–मटैया–कालाफाँटा–लक्ष्मणपुर, कोहलपुर–धामपुर र नरैनापुर–वैजापुर तथा धामपुरमा सबस्टेसन गरी ५ भागमा बाँडिएको छ । कोहलपुरदेखि राप्तीपारि धामपुरसम्म विद्युत् पोल जडान भइसकेको छ । बिजुली विस्तारमा ढिलाइ भएको र विद्युतका पोल ढल्न थालेपछि सर्वसाधारण निराश थिए । नौ वर्षयता विद्युत् विस्तारको काम ठप्प थियो ।

प्रकाशित : आश्विन २४, २०७५ ०९:४०
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT