सरकार व्यवस्थापनमा सहयोग गर्ने संस्थालाई आर्थिक अनुदान दिने प्रदेश सरकारको निर्णय

घनश्याम गौतम

रुपन्देही — प्रदेश ५ को बुधबारको मन्त्रिपरिषद्को बैठकले प्रदेश सरकार र प्रदेशसभा सचिवालय व्यवस्थापनका लागि भौतिक पूर्वाधार सहयोग गर्ने संघसंस्थालाई आर्थिक सहयोग अनुदान दिने निर्णय गरेको छ ।

सरकारका प्रवक्ता एवं भौतिक पूर्वाधार विकास मन्त्री वैजनाथ चौधरीका अनुसार प्रदेशसभा सचिवालय र बैठक सञ्चालनका लागि पूर्वाधार उपलब्ध गराउने उद्योग वाणिज्य संघलाई ४० लाख, प्रदेश सरकारका उच्च पदस्थ कर्मचारीको आवास व्यवस्थापनमा भवन उपलब्ध गराउने बुटवल टेक्निकललाई १० लाख, बालमन्दिरलाई २ लाख, महिला मगर संघलाई १ लाख र महिला जेसीजलाई १ लाख रुपैयाँ एकमुष्ट अनुदान सहयोग उपलब्ध गराउने निर्णय गरेको हो ।

वाणिज्य संघलाई बालमन्दिर परिसरमा हल निर्माण गर्न, बुटवल टेक्निकल शिक्षालयलाई आफ्नै भौतिक पूर्वाधारका लागि अनुदान उपलब्ध गराइएको हो ।

त्यस्तै, मन्त्रीपरिषद बैठकले प्रदेश ५ को सरकारलाई सल्लाह सुझाव दिने गरी संघीय सरकारकै ढाँचामा प्रदेश मन्त्रीपरिषद समिति पनि बनाउने निर्णय गरेको छ ।

त्यस्तै प्रादेशिक योजना आयोगमा दुई सदस्य थप गर्ने निर्णय पनि गरेको छ । यसअघि एक महिला सहित दुई सदस्य हुने व्यवस्था गरेकोमा निर्णय परिवर्तन गर्दै १ महिलासहित ४ सदस्यको व्यवस्था गरेको हो ।

सरकारको बुधबारको बैठकले दाङको शान्तिनगर गाउँपालिकाको केन्द्र सार्ने गाउँपालिकाको दुई तिहाईको निर्णय अनुमोदन गर्दै केन्द्र सार्न संघीय सरकारलाई सिफारिस गरेको छ ।

अहिले रहेको चिराघाटबाट वडा नं. ४ को जुम्लेकुलामा सार्ने निर्णय शान्तिनगर गाउँपालिकाको गाउँसभाले गरिसकेको छ ।

स्थानीय तहको केन्द्र परिवर्तनका लागि गाउँ/नगरसभाको दुई तिहाई सहितको निर्णय, प्रदेश सरकारको सिफारिस भए संघीय सरकारको सिफारिसको आधारमा गाउँपालिकाको केन्द्र परिवर्तन गर्न सक्ने संवैधानिक व्यवस्था छ ।

प्रकाशित : श्रावण २३, २०७५ १८:५२
प्रतिक्रिया
पठाउनुहोस्

सुत्केरी व्यथा लागेको तीन दिनपछि अस्पताल पुर्‍याइयो

हरि गौतम

रुकुम पूर्व — सुत्केरी व्यथा लागेको तीन दिनपछि एक गर्भवती महिलालाई अस्पताल पुर्‍याइएको छ । पुथाउत्तरगंगा गाउँपालिका–६, मयाङकी १९ वर्षीया मानिका दमाइलाई तीन दिनपछि अस्पताल पुर्‍याइएको हो ।

नेपाली सेनाको हेलिकप्टरमार्फत बुधबार उनलाई नेपलागञ्जको भेरी अस्पताल पुर्‍याइएको छ । व्यथा लागेको लामो समयसम्म बच्चा नजन्मिएपछि हेलिकप्टर बोलाइएको थियो । हेलिकप्टरमार्फत दुई पटकको प्रयासमा उनको उद्धार गरिएको थियो ।

सुत्केरी व्यथा लागेको लामो समयसम्म बच्चा नजन्मेपछि जिल्ला प्रशासन कार्यालयको पहलमा हेलिकप्टर मगाइएको थियो । बुधबार पहिलोपटक मयाङ पुगेको हेलिकप्टर खराब मौसमका कारण अवतरण हुन नसकेपछि सदरमुकाम रुकुमकोट फर्किएको थियो । त्यसपछि पुन: मयाङ गएको हेलिकप्टरले मानिकालाई नेपालगञ्ज पुर्‍याएको प्रमुख जिल्ला अधिकारी मित्रलाल शर्माले बताए ।
सरकारी खर्चमै मानिकालाई अस्पताल पुर्‍याइएको हो । हेलिकप्टरमा नेपालगञ्ज गएबापत उनको परिवारले कुनै शुल्क तिर्नु नपरेको प्रजिअ शर्माले बताए । उनको उपचार सुरु भइसकेको पनि प्रजिअ शर्माले जानकारी दिए ।

२१ गते बेलुकी सुत्केरी व्यथा लागेको उनको २३ गते बेलुकीसम्म पनि बच्चा जन्मेको थिएन । नजिकै स्वास्थ्य चौकी नभएको तथा स्वास्थ्य चौकीमा स्वास्थ्यकर्मी पनि नभएपछि उनलाई स्वास्थ्य संस्था लगिएको थिएन । व्यथाले च्याप्दै गएपछि उनको बोली र आँखा बन्द भएका थिए । गरिब परिवारकी दमाईको उद्धार भएको ६ नम्वर वडाध्यक्ष टोपे सेनले बताए । उनका श्रीमान् कामको सिलसिलामा मुस्ताङ छन् ।

प्रकाशित : श्रावण २३, २०७५ १८:४७
पूरा पढ्नुहोस्
प्रतिक्रिया
पठाउनुहोस्