टुँडिखेल अब ‘ग्रिनपार्क’

नगरले बगैँचा बनाउन त्यहाँबाट बसपार्कसमेत हटाइसकेको छ । बसलगायत यातायातका साधन पार्किङ नगरिएपछि टुँडिखेलमा हरियाली मौलाएको छ । नगरप्रमुख पूर्ण केसीले सदरमुकाम र जिल्लाकै आकर्षण बढाउन हिलाम्य र धुलाम्य टुँडिखेललाई ग्रिनपार्क बनाउने योजना अघि सारिएको बताए । तारको घेराभित्र रहेको टुँडिखेलमा सानो खालको खेल मैदान पनि रहने नगरले जनाएको छ ।

‘बिरुवा रोपेर टुँडिखेललाई हरियाली बनाउनु राम्रो काम हो,’ रोल्पा उद्योग वाणिज्य संघ अध्यक्ष विश्वकुमार चन्दले भने, ‘सबै मिलेर टुँडिखेलको गरिमा जोगाउनु पर्छ ।’ उनका अनुसार नगरलगायत सरोकारवालाको चासो वृद्धि गर्नुपर्छ । संघको आहानमा व्यवसायीले समेत बिरुवा रोपेका छन् । युवा व्यवसायी रमेश अधिकारले नगर हरियाली बनाउन स्वेच्छाले बिरुवा रोपिएको बताए । नगरले ग्रिनपार्क बनाउन उद्योगी व्यवसायीबाट सहयोग मागेको हो ।

टुँडिखेलमा नेपाली सेना र प्रहरीले समेत बिरुवा रोपेका हुन् । नगरले आह्वान गरेपछि विद्यार्थीले समेत दुवो रोपेका थिए । वृक्ष र दुवो रोप्ने काम अझैसम्म जारी छ । विभिन्न चासो र चर्चा चलेपछि जनप्रतिनिधिको पहलमा टुँडिखेललाई हरियाली बनाउने प्रयास थालिएको हो ।

दुई वर्ष लगाएर टँुडिखेलको स्वरूपसमेत फेरेको छ । नगरले टुँडिखेल सम्याउन, घेराबार गर्न तथा वृक्षरोपण गर्न अहिलेसम्म करिब १ करोड बजेट खर्च गरिसकेको छ । नगरले विभिन्न चरणमा टुँडिखेलको स्वरूप फेर्न विभिन्न योजना सञ्चालन गरेको हो ।

नगर प्रमुख केसीले सबैको सुझाव र सल्लाहअनुसार टुँडिखेललाई हरियाली बनाउन थालिएको बताए । तर, नगरले सदरमुकामकै लागि गरेको ठूलो रकम खर्चबारे अन्य वडाबासीले असन्तुष्टि व्यक्त गरेका छन् । ‘जे गर्नुछ टुँडिखेललाई मात्र गरिएको छ । यसबाहिरका कैयौं गाउँ आधारभूत सुविधाबाट बन्चित छन् ।’