परासी — नेत्रविक्रम चन्द‘विप्लव’ नेतृत्वको नेकपाका कार्यकर्ताले  पश्चिम नवलपरासीको सुस्ता गाउँपालिकाका अध्यक्ष रामप्रसाद पाण्डेलाई दुर्व्यवहार गरेका छन् ।

सोमबार विहान कार्यालय समयमा चार जनाको समूहमा पुगेका विप्लव कार्यकर्ताले अध्यक्ष पाण्डेलाई कालो मोसो लगाएर दुर्व्यवहार गरेका हुन् ।

कामको बहाना बनाएर पुगेका उनीहरुले अध्यक्ष पाण्डेलाई कालो मोसो दलेका थिए । नेकपाको जनपरिषद्ले सबै स्थानीय तहका जनप्रतिनिधिले राजीनामा गर्न पत्रचार गरेपनि राजिनामा नगरेकाले कारबाही गर्न सुरु गरिएको जनाएको छ ।

तीन महिनाअघि नेकपाको जनपरिषद्को नामबाट नगरपालिका र गाउँपालिकाका प्रमुखहरुलाई पत्र पठाएर राजीनामा गर्न भनेको थियो । अध्यक्ष पाण्डेले स्थानीय तहमा चर्को कर लगाएको, कमिशन लिएर प्राकृतिक स्रोत साधनको दोहन गर्न लगाएको, आफैले विद्यालय चलाएको आरोप लगाएको छ ।