रेसुंगा विमानस्थलमा परीक्षण उडान सफल

घनश्याम गौतम

गुल्मी — शिलान्यासको झन्डै १२ वर्षपछि निर्माण भएको रेसुंगा विमानस्थलमा शुक्रबार तारा एयरलाइन्सले परीक्षण उडान गरेको छ । रेसुंगा नगरपालिका–१० सिमीचौरस्थित विमानस्थलमा तारा एअरको नाइन एनएकेएल कल साइनको टीनअटर विमानले सफल उडान गरेको हो ।

गुल्मीको रेसुंगा विमानस्थलमा शुक्रबार सफल परीक्षण उडान गरेको तारा एयरलाइन्सको विमान । तस्विर : घनश्याम

विमानस्थलको प्राविधिक पक्षको परीक्षण गर्न गरिएको उडान सफल भएको क्याप्टेन सन्तोष साहले बताए । उनको नेतृत्वमा १८ सिटे विमान चालक दलका थप ४ सदस्यसहित धुले धावनमार्ग हुँदै अवतरण भएको थियो ।

नागरिक उड्डयन प्राधिकरणले बिहान १० बजे नै उडान गर्ने तयारी गरेको थियो । त्यसका लागि प्राधिकरणका महानिर्देशक सञ्जीव गौतम, परराष्ट्रमन्त्री प्रदीप ज्ञवाली, केबलकार व्यवसायी चन्द्र ढकालसहितको टोली मनाङ एयरको हेलिकप्टरमार्फत विमानस्थल पुगेको थियो । तर, मौसम प्रतिकूल भएपछि टोली दिउँसो फिर्ता भएको थियो । मौसम प्रतिकूल भएपछि विमानले बेलुकी पौने ४ बजे उडान गरेको थियो ।

विमानस्थलको ०६३ मा तत्कालीन पर्यटनमन्त्री रहेका ज्ञवालीले शिलान्यास गरेका थिए । ‘गुल्मीवासीको लामो समयदेखिको एउटा आकांक्षा पूरा भएको छ,’ उनले भने, ‘यससँगै विकास र समृद्धिका लागि जोडिन सक्ने योजना बनाएर कार्यान्वयन गर्नु जरुरी छ ।’ उनले जिल्लाको पर्यटकीय र धार्मिक महत्त्व बोकेको रेसुंगासम्म जाने केबलकार निर्माण योजनाको सम्भाव्यता अध्ययन सुरु भइसकेको बताए । '

विमान आउने खबरले हजारौं सर्वसाधारण स्वस्फूर्त रूपमा विमानस्थल पुगेका थिए । सदरमुकाम तम्घासबाट झन्डै ७ किमि दूरीमा रहेको विमानस्थल अझै निर्माणाधीन छ । विमानस्थल निर्माण समितिका अध्यक्ष मधुकृष्ण पन्तका अनुसार ७८ रोपनी १० आना क्षेत्रफलमा निर्माण भइरहेको विमानस्थलको अहिले ५ सय ५० मिटर लम्बाइमा धावनमार्ग निर्माण भएको छ । २ सय मिटर चौडाइ छ । तर, नियमित उडानका लागि वर्षापछिको समय कुनुपर्ने उनले बताए । ‘अहिले परीक्षण उडानमा हामी सफल भएका छौं,’ उनले भने, ‘नियमित उडानका लागि वर्षापछिको समय कुनुपर्ने बाध्यता छ ।’ विमानस्थल निर्माणमा अहिलेसम्म १४ करोड १७ लाख ८० हजार रुपैयाँ खर्च भएको उनले बताए ।

नागरिक उड्डयन प्राधिकरणका इन्जिनियर दिनेश परियारले तत्काल धुले धावनमार्ग निर्माण गरेर परीक्षण उडान गरिए पनि व्यवस्थापनका केही काम बाँकी रहेकाले नियमित उडान गर्न समय लाग्ने बताए । ‘अहिले परीक्षण मात्र गरिएको हो,’ उनले भने, ‘कन्ट्रोल टावर निर्माण, धावनमार्गको रेखांकन र भवन निर्माण नियमित उडानका लागि आवश्यक पूर्वाधार हुन् ।’ ती पूर्वाधार तयार भएपछि उडान नियमित हुने उनले बताए ।

परीक्षण उडानका लागि प्राधिकरणले भरतपुर विमानस्थलमा कार्यरत ट्राफिक एयर कन्ट्रोलर र प्राधिकरणकै इन्जिनियरलाई यहाँ खटाएको थियो । परराष्ट्रमन्त्री ज्ञवाली र महानिर्देशक गौतमले विमानस्थलको धावनमार्ग कालोपत्रे र अन्य आवश्यक संरचना निर्माण तत्काल सुरु हुने बताए । निर्माण उपभोक्ता समितिले विमानस्थलको पूर्वाधार निर्माणका लागि ३० करोड रकम आवश्यक रहेको जनाएको छ । रेसुंगा प्रदेश ५ का पहाडी जिल्लालाई हवाई सेवाबाट जोड्ने पहिलो विमानस्थल हो । यसबाट गुल्मीसँगै अर्घाखाँची, बाग्लुङ र प्यूठान जिल्ला जोडिनेछन । सबै जिल्लामा विमानस्थलसँग सडक पहुँच पुगेको छ ।

प्रकाशित : जेष्ठ २७, २०७५ १०:५८
प्रतिक्रिया
पठाउनुहोस्

हुलाकी सडक बेहाल

कमल पन्थी

बर्दिया — ठेकेदार कम्पनीको लापरबाहीले आउजाउमा समस्या आएको भन्दै स्थानीयले नेपाल–भारत जोड्ने गुलरिया–मूर्तिहा सडकखण्ड शनिबार करिब दुई घण्टा ठप्प पारे । भारतीय सीमा मूर्तिहा हँुदै भुरीगाउँ जोड्ने सडक खनेर अलपत्र छोडिएपछि पानी जमेर हिलाम्मे भएको छ ।

पप्पु कन्स्ट्रक्सनअन्तर्गत पेटी ठेकेदार कम्पनी गणपति निर्माण सेवाले ठेक्का लिएको उक्त सडकमा आइतबारदेखि नै ग्राभेल सुरु गर्ने वचनबद्धतापछि स्थानीयले चक्काजाम फिर्ता लिएका छन् ।

पानी पर्नासाथ सडक हिलाम्मे भई आउजाउ गर्न समस्या भएपछि ठेकेदार कम्पनीलाई कारबाही माग्दै चक्काजाम गरिएको गुलरियाका व्यवसायी मोविन अहम्मदले बताए । चक्काजामका कारण दर्जनांै सवारीसाधन अलपत्र परे । ठेकेदार कम्पनीका सञ्चालक तुलसी भण्डारीले आइतबारबाट ग्राभेल सुरु हुने जनाएपछि चक्काजाम एक दिनका लागि फिर्ता लिइएको हो ।

प्रमुख जिल्ला अधिकारी रामबहादुर कुरुम्बाङले ठेकेदार कम्पनीले आइतबार सडक ग्राभेल गर्ने बताए । ‘सडकमा ग्राभेल नराखी लापरबाही गरे कडा कारबाही गर्नेछु,’ उनले भने, ‘ठेकेदार कम्पनीलाई नै नियन्त्रणमा लिई कारबाही गर्नुपरे पनि पछि हट्ने छैनौं ।’ ०७३ माघ ८ गते गुलरिया–भुरिगाउँ–राजापुर खण्डअन्तर्गत हुलाकी सडक शिलान्यास भएको थियो । तीन प्याकेजअन्तर्गत निर्माण भएको सडक ०७६ असार मसान्तभित्र सम्पन्न गर्ने लक्ष्य छ । बेलवा(मूर्तिहा सडक खण्डअन्तर्गत तीनवटा पुल निर्माणाधीन छन् । ती पुल वर्षातअगावै सम्पन्न हुने सम्भावना छैन । यसै गरी वेलवा–राजापुर सडक खण्डअन्तर्गत गमक्कामा दुईवटा पुल निर्माणाधीन छन । आशिषकुमार जेभीले असार पहिलो सातासम्म दुवै पुल ढलान गरिसक्ने दाबी गरेको छ ।

भुरीगाउ–वेलवा सडक खण्डमा ठेकेदार कम्पनी शर्मा राजेन्द्र जेभीले अधिकांश ठाउँ ग्राभेल गरेको छ । यसैबीच हुलाकी सडक आयोजना प्रमुख सौरभ बज्राचार्यलाई मन्त्रालयले फिर्ता बोलाएको छ । उनको ठाउ‘मा कृष्णकान्त ओझालाई सरुवा गरिए पनि अहिलेसम्म कार्यालयमा उपस्थित भएका छैनन् । हुलाकी आयोजनाको कार्यालय नेपालगन्जमा छ । कार्यालय प्रमुख नआउँदा ठेकेदार कम्पनीको लापरबाही रोक्न समस्या भएको स्थानीय प्रशासनको गुनासो छ ।

भारत सरकारले हुलाकी सडक निर्माणको जिम्मा यसअघि भारतीय कम्पनीलाई दिएको थियो । ०६५ सालदेखि काम गर्दै आएको भारतीय ठेकेदार बेपत्ता भएपछि निर्माण अलपत्र परेको थियो । उक्त सडक ०७० फागुनमा भारतले नेपाल सरकारलाई हस्तान्तरण गर्नुपर्ने सम्झौता थियो । तर, काम अलपत्र छाडेपछि दुई वर्षअघि भारतीय ठेकेदार कम्पनीसँग सम्झौता तोडी नेपाली ठेकेदारलाई जिम्मा दिइएको थियो ।

प्रकाशित : जेष्ठ २७, २०७५ १०:५६
पूरा पढ्नुहोस्
प्रतिक्रिया
पठाउनुहोस्
ADVERTISEMENT
×