२३.१२°C काठमाडौं
लमजुङ — करिब ४ लाख रुपैयाँ नगद चोरेर भागेको आरोपमा लमजुङ प्रहरीले एक युवकलाई रंगेहात पक्राउ गरेको जनाएको छ । पाल्पाको तानसेन नगरपालिका ३ घर भएका ३९ वर्षीय हरि रानालाई पक्राउ गरी कारबाही प्रक्रिया अघि बढाएको प्रहरीले बताएको छ ।
बेंसीसहर नगरपालिका ११, चिती तीनपिप्लेस्थित गणेशप्रसाद श्रेष्ठको घरबाट नगद चोरी गरेर भागेको उजुरीपछि खोजीका क्रममा प्रहरीले ती युवकलाई फेला पारेको थियो । श्रेष्ठको घरबाट बुधबार बिहान साढे १० बजेतिर नगद चोरेर भागेको खबरपछि खोजीको क्रममा प्रहरी चौकी श्रीमन्ज्याङबाट खटिएको टोलीले दोर्दी गाउँपालिका २, अर्चलबोट नजिकैबाट लुकिछिपी हिँडिरहेको अवस्थामा ती युवकलाई साँझ ६ बजेतिर पक्राउ गरेको प्रहरीले जनाएको छ ।
जिल्ला प्रहरी कार्यालय लमजुङका प्रहरी निरीक्षक थानेश्वर चपाईंले ती युवकको साथबाट नगद ३ लाख ७५ हजार १ सय ६० रुपैयाँ बरामद गरिएको बताए । ती युवकविरुद्ध लमजुङ जिल्ला अदालतबाट बिहीबार ७ दिनको म्याद थप अनुमति लिई चोरी सम्बन्धी कसूरमा थप अनुसन्धान कार्य भइरहेको उनले बताए ।
प्रहरीका अनुसार ती युवक केही वर्षदेखि ज्याला मजदुरी काम गर्दै आएका थिए । श्रेष्ठको घरमा १२ दिनदेखि मिल चलाउने काम गर्दै आएका उनी एक्कासी हराउनुका साथै नगदसमेत हराएपछि पीडितले प्रहरीमा खबर गरेका थिए ।
प्रकाशित : श्रावण २४, २०८१ १७:५१
