बागलुङ — ठेकेदारले सम्झौताअनुरूप नियमित काम गरेको भए अहिलेसम्म ताराखोला जाने सडक कालोपत्र भइसक्नुपर्ने थियो । ताराखोला गाउँपालिकालाई केन्द्र बनाएर गलकोट नगरपालिका र म्याग्दी जोड्ने उक्त रणनीतिक सडक म्याद सकिएको २ वर्षमा पनि अझै अलपत्र अवस्थामा छ ।

झन्डै ४० किमि लामो रणनीतिक सडकमध्ये २० किमीको मात्रै डीपीआर बनेको थियो । उक्त खण्डको पनि आधामात्रै सडक कालोपत्र गर्न ठेक्का लगाइएकामा त्यो समेत आधा मात्रै काम भएको हो । ठेकेदार कम्पनीले ढिलाइ गरेको पूर्वाधार विकास कार्यालय बागलुङका प्रमुख गणेश सुवेदीले बताए । ठेक्का लिएको १० किमिमध्ये साढे ५ किमि सडकमा बेस राखेर ग्राभेल भरे पनि बाँकी खण्डमा काम सुरु नै नभएको सुवेदीले बताए । ‘अनुगमन गर्दा अहिलेसम्म ५० प्रतिशत रकम भुक्तानी भइसकेको छ, काम ५० प्रतिशत पनि भएको छैन’ उनले भने ।

एपेक्स खड्का कृष्ण संयुक्त निर्माण कम्पनीले यो सडक बनाउन ठेक्का लिएको म्यादसमेत दुई पटक थपेको छ । आगामी मंसिर मसान्तसम्मका लागि थपेको म्यादमा पनि काम सक्ने लक्षण नदेखिएको सुवेदीले बताए । कम्पनीले २४ करोड ७८ लाख रुपैयाँमा यो सडकको १० किमि खण्ड कालोपत्र गर्न ठेक्का लिएको हो । अहिलेसम्म १२ करोडभन्दा धेरै रकम भुक्तानीसमेत भइसकेको छ ।

सडक अलपत्र पर्दा गलकोट नगरपालिका–५ र ६ तथा ताराखोला–१ र ३ का बासिन्दाले बढी सास्ती खेपेका छन् । निर्माणाधीन सडकमा असरल्ल छाडिएका निर्माण सामग्री र खाल्डाखुल्डीले दुर्घटनाको जोखिम बढाएको स्थानीय वसन्त विकले बताए । ‘खाल्डाखुल्डी र धूलोले ताराखोला पुग्ने सडकमा हिउँदमै समस्या छ, वर्षातमा के होला ?’ विकले भने, ‘सडकको काम अहिले ठप्पै छ, सक्ने सुरसार नै छैन ।’ ठेकेदार कम्पनीका प्रतिनिधि रामु कँडेलले विद्युत्का पोल हटाउनुपर्दा प्रक्रियामा ढिला भएको दाबी गरे ।