काठमाडौँ — म्याग्दीको मंगला गाउँपालिकास्थित मंगला शिक्षा क्याम्पसमा एमाले निकट अनेरास्ववियुको भिममाया रोका नेतृत्वको प्यानल विजयी भएको छ । रोकाले एक सय ३० मत पाइन् भने सत्ता गठबन्धनका कांग्रेस र माओवादी केन्द्रका विद्यार्थी संगठनको गठबन्धनबाट उम्मेदवार रहेका नेपाल विद्यार्थी संघका गौरव आचार्यले १५ मत प्राप्त गरे । 

त्यस्तै सचिवमा अनेरास्ववियुका रिवन शाहीले एक सय ३०, कोषाध्यक्ष तारा राना मगरले एक सय २६ मत पाएर निर्वाचित भएको मंगला शिक्षा क्याम्पस निर्वाचन अधिकृतको कार्यालयले जनाएको छ । सचिवमा माओवादी केन्द्र निकट अखिल (क्रान्तिकारी)की पस्मिता रोकाले १३ र नेविसंघका प्रविना क्षत्रीले १७ मत प्राप्त गरिन् ।

त्यस्तै, क्याम्पस निर्वाचन अधिकृतको कार्यालयका अनुसार सदस्यहरुमा अनेरास्ववियुका मेघबहादुर घर्तीले (१३२), विन्दा रोका (१३५), सजिना सुवेदी (१३५), किशोरी फगामी (१३४), युमायाँ दर्जी (१३२) पाएर विजयी भएका छन् ।

क्याम्पसमा २ सय १२ मतदाता रहेकोमा जम्मा एक सय ४३ मत खसेको थियो । स्ववियु निर्वाचनमा नेकपा निकट अनेरास्ववियू क्रान्तिकारीले बहिस्कार गरेको थियो । स्ववियु निर्वाचनमा समानुपातिकतर्फ नेविसंघले १२ मत प्राप्त गरेको छ । समानुपातिक मतअनुसार १५ सदस्यीय मंगला शिक्षा क्याम्पस स्वतन्त्र विद्यार्थी युनियनमा नेविसंघबाट एक जना सदस्य प्रतिनिधित्व हुनेछ ।