लमजुङ — लमजुङको सुन्दरबजारस्थित कृषि र पशु विज्ञान अध्ययन संस्थान (लमजुङ क्याम्पस)को स्वतन्त्र विद्यार्थी युनियन (स्ववियु) निर्वाचनमा नेकपा एमाले निकट अनेरास्ववियुको प्यानलै निर्वाचित भएको छ । कूल ४ सय ८४ मत खसेकोमा आइतबार साँझको मतपरिणामअनुसार अनेरास्ववियुका वीरेन्द्र जिसी २ सय ६४ मत ल्याएर स्ववियु सभापतिमा निर्वाचित भएका हुन् ।

प्रतिद्वन्द्वी कांग्रेसनिकट नेविसंघका पारस अवस्थीले २ सय १८ मत ल्याए ।

सचिवमा अनेरास्ववियुका विराज सुवेदीले २ सय ६३ मत ल्याएर निर्वाचित भए । निकटतम प्रतिद्वन्द्वी नेविसंघका जगतबहादुर बोहराले २ सय ११ मत ल्याए । प्रतिद्वन्द्वी अनेरास्ववियु (क्रान्तिकारी)का विवेक भट्टले ९ मत ल्याए । कोषाध्यक्षमा अनेरास्ववियुका गौरव जोशी २ सय ७१ मत ल्याएर विजयी भए । नेविसंघका अमृत सुनार २ सय ११ मत ल्याएर पराजित भए ।

खुला सदस्यहरुमा अनेरास्ववियुका चेतना राना, रसिक खनाल, विराज खड्का, धनकुमारी गुरुङ र विनिता कार्की निर्वाचित भए । समानुपातिकतर्फ सदस्यमा अनेरास्ववियुकै अर्जुन ढकाल, अनिषा कार्की, कृति खरेल, कल्पना पौडेल, सोलिना कार्की डोली, अनुपा शर्मा र पूर्णबहादुर बुढाथोकी निर्वाचित भए ।