पूर्वी नवलपरासीमा कारागार नहुँदा समस्या
पूर्वी नवलपरासी — पूर्वी नवलपरासीमा व्यवस्थित कारागार नहुँदा कैदी बन्दीहरूलाई बेजिल्ला पठाउनु पर्ने बाध्यता देखिएको छ । यहाँ विभिन्न अभियोगमा मुद्दा चलाइने कैदी बन्दीलाई हिरासतमा राख्न चितवन र पश्चिम नवलपरासी कारागार पठाउनुपर्ने बाध्यता छ ।
गत आर्थिक वर्षमा जिल्ला प्रहरीमा दर्ता भएका ७ सय ४७ अभियुक्तलाई चितवन र पश्चिम नवलपरासी कारागारमा पठाइएको तथ्यांक जिल्ला प्रहरी कार्यालयमा देखिन्छ । हरेक जिल्लामा कारागार हुनुपर्ने गृह प्रशासनको नियम भए पनि यो जिल्लामा कारागार छैन ।
पहिलेको नवलपरासी जिल्ला दुई जिल्लामा विभाजित भएपछि पूर्वी नवलपरासीमा कारागार छैन । कारागार नएभका कारण सामान्य थुनुवाको चाप बढेसँगै प्रहरीलाई सधै पिरलो हुने गरेको छ । गत आर्थिक वर्ष जिल्लाका विभिन्न प्रहरी कार्यालयमा दर्ता भएका ७ सय ४७ जना अभियुक्तलाई परासी र चितवन कारागार पठाइएको प्रहरीको तथ्यांकमा देखिन्छ ।
साउनयता पश्चिम नवलपरासी कारागारमा १८ जना, चितवन कारागारमा ३२ जना कारागार पठाइएको प्रहरीले जानकारी दिएको छ ।
यस्तै १४ वर्षभन्दा कम उमेरका बालबालिकालाई बालसुधारगृह पोखरा र भैरहवामा पठाउनु पर्ने बाध्यता छ । साउनयता त्यसरी ६ जनालाई ति दुई जिल्लामा पठाइएको छ । पक्राउ परेकामध्ये अधिकांशको मुद्दा लागूऔषधसँग सम्बन्धित रहेको छ । लागूऔषधको मुद्दाका अभियुक्तलाई ३ महिना अनुसन्धान म्याद हुने भएको र संख्या समेत बढ्ने गर्दा बेजिल्लामा लैजान र ल्याउन समस्या भएको प्रहरीले जनाएको छ ।
आफ्नै जिल्लामा कारागार नहुँदा प्रहरीको गाडीमा राखेर सुरक्षाकर्मीको निगरानीमा बेजिल्ला पठाउनु पर्दा ओसारपसार खर्च समेत बढेको प्रहरीको भनाइ छ ।
प्रकाशित : चैत्र ४, २०७९ १९:०९
