आदिकवि भानुभक्त क्याम्पसको स्ववियु निर्वाचन स्थगित
तनहुँ — तनहुँको व्यास नगरपालिका-१ विज्ञानचौरस्थित आदिकवि भानुभक्त क्याम्पसमा स्ववियु निर्वाचन स्थगित भएको छ । क्याम्पसले शुक्रबार सूचना जारी गरेर अर्को सूचना नआएसम्मका लागि निर्वाचन स्थगित गरिएको जनाएको छ ।
चैत ५ गते हुने भनिएको निर्वाचन स्थगित भएकाले उक्त दिन अध्ययन अध्यापन कार्य यथावत नियमित रुपमा संचालन हुने क्याम्पस प्रमुख महाप्रसाद हड्खलेले जानकारी दिएका छन् ।
स्ववियु निर्वाचनलाई लिएर विद्यार्थी संगठनहरूबीच विवाद भएपछि निर्वाचन स्थगित गरिएको क्याम्पसले जनाएको छ ।
स्वतन्त्र विद्यार्थी युनियनको निर्वाचनका सन्दर्भमा विवाद भएपछि गत आइतबार विद्यार्थीहरूले क्याम्पस र निर्वाचन अधिकृतको कार्यालयमा ताला लगाएका थिए ।
स्ववियु सभापतिका उम्मेदवार गौरव पन्थ र सुनिल मिश्रउपर दाबी विरोधमा क्याम्पसको तर्फबाट कुनै सुनुवाइ नभएको भन्दै नेकपा एकीकृत समाजवादी र नेत्रविक्रम चन्द निकट विद्यार्थी संगठनले तालाबन्दी गरेका हुन् । अनेरास्ववियु र अखिल क्रान्तिकारीले दुवै जनाविरुद्ध उजुरी दिएका थिए ।
प्रकाशित : चैत्र ३, २०७९ १५:२४
