कान्तिपुर वेबसाईट
AdvertisementAdvertisement
२२.१२°C काठमाडौं
काठमाडौंमा वायुको गुणस्तर: १५५

हिउँदे सडक पक्की बनाउँदै गलकोट

सडक बनाएको भन्दा वर्षात्‌मा पहिरो नियन्त्रणमा लाग्ने खर्च बढी आउन थालेपछि यस्तो नीति
प्रकाश बराल

बागलुङ — ग्रामीण सडकले हिउँद र बर्खा दुवै याममा दुःख दिइरहन थालेपछि गलकोट नगरपालिका पछिल्लो समय त्यस्ता सडकलाई पक्की बनाउने अभियानमा छ ।

हिउँदे सडक पक्की बनाउँदै गलकोट

ग्रेड नमिलेका सडकका घुम्ती ढलान गर्ने, पक्की नाली, कल्भर्ट र कजवे बनाएर वर्षैभर सवारी चल्न सक्ने सडक बनाउने काम सुरु भएको नगर प्रमुख भरत शर्मा गैरेले बताए ।

‘हरेक वडाध्यक्ष, जनप्रतिनिधि र कर्मचारीलाई समेत सोही अनुसारको निर्देशन गरेका छौं,’ गैरेले भने, ‘सडक बनाएको भन्दा वर्षात्मा पहिरो नियन्त्रणमा लाग्ने खर्च बढी आउन थालेपछि यो नीति लिइएको हो ।’ अधिकांश ग्रामीण सडकमा पहिरो खसेर बालीनालीसमेत नष्ट हुने क्रम रोक्न यो विधि अपनाइएको उनले बताए ।

पक्की पर्खाल र नाली बनाएपछि पहिरो नियन्त्रण गर्न सकिने वडा ६ का अध्यक्ष रामप्रसाद कँडेलले सुनाए । उनले आफ्नो वडाका सबै सडकलाई पक्की बनाउने काम गरेको जानकारी दिए । ‘डोजर लगाएर मात्र छाड्ने काम कतै पनि गरेका छैनौं, बरु ट्र्याक खुल्नासाथ पक्की बनाएका छौं,’ उनले भने, ‘वर्षातमा पहिरोको प्रकोप पनि कम हुनेछ ।’ जंगरा लामीडाँडा दरम सडकको १ किमि खण्ड सडकमा ढलानको काम थालेको उनले बताए । नौबिसेदेखि जामुनडाँडा जाने सडक पूरै पक्की र ढलान भएपछि नियमित सबारी चल्न थालेको छ ।

‘गाडी नचल्दा सामान ढुवानीमा सास्ती खेपेका थियौं, अहिले सहज भयो,’ स्थानीय भक्तबहादुर नेपालीले भने, ‘ढलान गर्दा पानीले पनि असर गरेन ।’ यो सडकले यहाँका ६० घरधुरीलाई सामान ढुवानीमा सहज भएको उनले बताए । यहाँको चरौंदी नेपाने हुँदै कापससम्मको सडक पनि ढलान गरिएको छ । १ किमि सडक ढलान गर्ने लक्ष्यसाथ चालु वर्ष आधा खण्ड काम भइसकेको हो । वडाध्यक्ष कँडेलले अधिकांश सडकमा ४० लाख बजेट विनियोजन गरेर सबै संरचना पक्की बनेको छ । वडा २ को तोरखीखोलादेखि बतासे हुँदै ठाना पुग्ने सडक पनि ढलान गरेर वर्षातमा अवरोध नआउने बनाएको वडाध्यक्ष हिमबहादुर भण्डारीले बताए । ‘वडा ६ र २ जोड्ने नाकामा दुवै वडाले सहकार्य गरेर काम गर्दा पहिरो नियन्त्रणमा सहयोग पुगेको छ । ‘कालोपत्रभन्दा ढलान महँगो पर्छ, तर दिगो हुन्छ,’ इन्जिनियर बलविक्रम दाहालले भने, ‘वर्षातको भेल बगे पनि ढलानमा असर गर्दैन, कालोपत्र भए पूरै भत्किन्छ ।’ उनले भिरालो जमिनमा कालोपत्रको काम सम्भव नहुने भएपछि थोरै सडक बनाउने, तर पक्की बनाउने लक्षले स्टिमेट गराएको बताए ।

दुइ वर्षअघि यहाँ आएको बाढी र पहिरोले अधिकांश वडाका ग्रामीण सडक बगेपछि पुनःसंरचनाका लागि मात्रै करोडौं खर्च भएको थियो । त्यसपछि नगरपालिकाले दिगो सडकको रूपमा योजना बुन्न थालेपछि धेरै ट्र्याक खोल्ने तथा डोजर लगाउने क्रम घटेको हो । डोजर जान छाडेपछि सडक भत्कने दर पनि घटेको छ ।

‘अहिले नयाँ ट्र्याक खोल्ने काम गरिएको छैन, बरु पुरानालाई व्यवस्थित बनाउन लागियो,’ गैरेले भने, ‘भएका संरचना पक्की बनाउन संघ र प्रदेशमा पनि साझेदारी गरिएको छ ।’ वडा ५ देखि वडा ७ को भैंसे जोड्ने पुरानो सडक पनि कालोपत्र तयारी भएको उनले बताए ।

प्रकाशित : चैत्र ३, २०७९ ०८:०९
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?