‘प्रदेश सरकारले नै प्रदेशसभालाई छायामा राख्यो’

आइतबार प्रदेशसभाको पाँचौं वार्षिकोत्सवका अवसरमा उनले प्रदेशसभाले बजेट छुट्याए पनि प्रदेश सरकारले बजेट नदिएको भन्दै सरकारले नै छायामा राखेको बताएका हुन् । ‘प्रदेशसभालाई भौतिक रूपमा बलियो बनाउन प्रदेश सरकार नै जवाफदेही हुनुपर्छ,’ उनले भने, ‘हामीले योजना बनायौं सरकारले बजेटले सम्बोधन नगरेपछि सफल कसरी भइन्छ ?’

उनले प्रदेश संरचना बलियो भए मात्रै संघीयता बलियो हुने बताए । संघीयता बलियो बनाउन प्रदेशसभा र प्रदेश सरकारको एकैमत हुनुपर्ने उनको तर्क थियो । अधिकारीले कतिपय कानुन दबाब र अभावमा बन्दा कार्यान्वयनमा समस्या भएको बताए । संघीय सरकारले प्रदेश सरकारलाई अधिकार दिन नखोज्दा पनि प्रदेशमा चाहेर पनि काम हुन नसकेको उनको भनाइ थियो । ‘५ लाखदेखि ५० लाखसम्मका बजेट संघले नै छुट्याउँछ,’ उनले भने, ‘यसरी प्रदेश सरकार कसरी बलियो हुन्छ त ?’

कांग्रेस संसदीय दलका नेता सुरेन्द्रराज पाण्डेले संघीय गणतन्त्र व्यवस्था नयाँ अभ्यासमा रहेकाले अघिल्ला ५ वर्ष अनुभवमा नै बितेको बताए । उनले प्रदेश संरचना संस्थागत गर्न सबै लाग्नुपर्ने बताए । मुख्यमन्त्री खगराज अधिकारीले संस्थागत व्यवस्थाका लागि सधैं एकै ठाउँमा उभिने प्रतिबद्धता जनाए । उनले भने, ‘हामी प्रदेशमा दलहरू सत्ता र प्रतिपक्ष त हौंला, तर प्रदेश संस्थागत गर्ने विषयमा प्रतिपक्ष कोही छैनौं । हामी संघीय सरकारको प्रतिपक्ष भएर एक ठाउँमा उभिएका छौं ।’