गोरखा — चुमनुव्री गाउँपालिका–२  ल्हो को हिनाङ पुङ्जे गुम्बा पुनर्निर्माणका लागि प्रधानमन्त्री पुष्पकमल दाहालसमक्ष गाउँपालिकाले माग गरेको छ । 

माघ १० गते आगलागीले करिब दुई सय वर्ष पुरानो ऐतिहासिक हिनाङ पुङ्जे गुम्बामा पूर्णरुपमा क्षति पुगेको छ । उक्त गुम्बा पुनर्निर्माणका लागि आवश्यक बजेट व्यवस्थाका लागि प्रधानमन्त्ती दाहालसँग माग गरिएको चुमनुव्री गाउँपालिकाका अध्यक्ष निमा लामाले बताए । लामाले दाहालाई बालुवाटारमा भेटेर आगलागीबाट गुम्बामा पुगेको क्षति जानकारी गराएका हुन् ।

भौगोलिक रुपमा अति विकट भए पनि प्राकृतिक, धार्मिक, सांस्कृतिक र पुरातात्विक सम्पदाले उत्तरी भेग भरिपूर्ण रहेको उनले बताए । ‘बौद्ध धर्मालम्बीहरुको बाहुल्यता रहेको गाउँपालिकाभित्र हिमालका काखमा ध्यान र ज्ञान केन्द्रका रुपमा परिचित गुम्बाहरु छन्,’ उनले भने,‘१० गते आगलागीले क्षति पुगेको ऐतिहासिक गुम्बाको पुनर्निर्माणमा आवश्यक बजेट व्यवस्थापनका लागि अनुरोध गरेका हौं ।’

प्रधानमन्त्री दाहालले नेपाल सरकारको तर्फबाट सक्दो सहयोगको प्रतिबद्धता जनाएको लामाले जानकारी दिए ।