पर्वतका हरेक पालिका अस्पतालमा शल्यक्रियासहितका सेवा दिन्छौं : स्वास्थ्यमन्त्री- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

पर्वतका हरेक पालिका अस्पतालमा शल्यक्रियासहितका सेवा दिन्छौं : स्वास्थ्यमन्त्री

अगन्धर तिवारी

पर्वत — स्वास्थ्यमन्त्री पदम गिरीले हरेक स्थानीय तहका पालिकास्तरीय अस्पतालमा शल्यक्रियासहितको जनशक्ति व्यवस्थापन गर्ने दाबी गरेका छन् । पर्वत उद्योग वाणिज्य संघले कुश्मामा बुधबारदेखि आयोजना गरेको सातौं पर्वत महोत्सवको उद्घाटनका अवसरमा मन्त्री गिरीले यस्तो बताएका हुन् । 


स्वास्थ्यमन्त्रीको जिम्मेवारी सम्हालेपछि पहिलोपटक गृहजिल्ला आएका गिरीले उपचार अभावकै कारण अब कोही नेपालीहरूले अकालमै मृत्युवरण गर्नुपर्ने अवस्थाको अन्त्य हुने बताए । ‘पर्वतमा मात्रै होइन; चाहे डोडी, दार्चुला र बझाङका जनता किन नहुन्,’ उनले भने, ‘मुलुकभरका स्वास्थ्य संस्थाहरूमा जनशक्ति र उपकरणको व्यवस्था गर्नु हाम्रो मुख्य काम हुनेछ ।’

भइरहेको स्वास्थ्य बिमा पनि व्यवस्थित र जनतामैत्री हुन नसकेको गुनासो आइरहेको भन्दै उनले स्वास्थ्य बिमालाई व्यवस्थित र विपन्नका लागि निःशुल्क गर्न आफ्नो पहल हुने बताए । ‘मैले केही समय मेरो मन्त्रालयसँग सम्बन्धित समस्या के-के हुन् भनेर गम्भीर अध्ययन गरिरहेको छु । अध्ययनमा केहि समय लाग्नेछ । अध्ययन सकिसकेपछि मात्रै मैले गति लिने गरी काम थाल्नेछु ।’

हरेक व्यक्तिले काम गर्ने छोटो समय हुने र उक्त समयको महत्त्व चिनेर अघि बढ्न सकेमा मात्रै इतिहासमा नाम रहनेबारे आफूलाई राम्रो ज्ञान भएको उल्लेख गर्दै मन्त्री गिरीले इतिहासमा नाम लेख्ने गरी आफूले काम गरेर देखाउने दाबी गरे । ‘जो कोहीले पनि उपचार नपाएर अकालमा ज्यान जानुपर्ने अवस्था आएमा मलाई सिधै खबर गर्नुस् । त्यो व्यवस्थाको अन्त्य गर्न मैले सुरु गरिसकेको छु । अब उपचारकै लागि कसैले पनि अकालमा ज्यान फाल्नुपर्ने अवस्था आउनेछैन ।’

मन्त्री गिरीले आफूलाई मत दिएर बहुदलीय व्यवस्थापछि पर्वतको पहिलो मन्त्री बनाउने मतदाताहरूप्रति आभार व्यक्त गर्दै यो पाँच वर्षभित्रमा सबै पर्वतवासीले महसुस गर्ने गरी विकासको गति अघि बढाउने दाबी गरे । मन्त्री गिरीले आगामी पाँच वर्षभित्रमा पर्वतका सबै ६१ वटै वडामा कालोपत्रे सडक पुर्‍याउने बताए ।

कार्यक्रममा संविधानसभा सदस्यहरू अर्जुनप्रसाद जोशी, विकास लम्साल तथा गण्डकी प्रदेशसभाका सदस्य मित्रलाल बस्याल, भक्तबहादुर कुँवरलगायतले बोलेका थिए । स्थानीय उत्पादन तथा पर्यटनको प्रवर्द्धन गर्ने उद्देश्यले आयोजित महोत्सव आगामी २१ गतेसम्म सञ्चालन हुने संघका अध्यक्ष गोपी अधिकारीले बताए ।


प्रकाशित : माघ ११, २०७९ १८:४६
प्रतिक्रिया
पठाउनुहोस्

१७ वर्षमै व्यावसायिक मूर्तिकार

अगन्धर तिवारी

पर्वत — कक्षा ४ पढ्दैदेखि सेतो कागज भेट्यो कि चित्र कोरिहाल्ने बानी थियो पर्वतका विक्रम अधिकारीको । फुर्सद हुनासाथ अगाडि उभिएको मानिस वा विभिन्न देवीदेवताका चित्र उतार्न भ्याइहाल्थे । कहिलेकाहीँ शिक्षकले दिएको गृहकार्यसमेत नगरी चित्र कोरेकै कारण बाबुआमा र शिक्षकको गालीसमेत खान्थे ।

कुश्मा नगरपालिका–१० पीपलटारीका १७ वर्षीय विक्रम अधिकारीको उतिबेलादेखिको लगाव देखेर तिनै शिक्षक, अभिभावक र छिमेकी भने अहिले दंग छन् ।

सिसाकलमले कापीका पानामा उतार्ने गरेको चित्रलाई विक्रमले पछिल्लो दुई वर्षयता ढुंगामा फलामका किलाले कोतरेर दुरुस्तै बनाउन थालेका हुन् । सुरुसुरुमा घर वरपर पाइने ढुंगा र किलाले कोतरेर मूर्ति बनाउन सुरु गरेका अधिकारी अहिले भने व्यावसायिक मूर्तिकार भइसकेका छन् । उमेरले उनी १७ वर्ष पुग्दैछन् ।

कक्षा १२ मा अध्ययनरत उनले पढाइबाट बचेको समयमा मूर्ति बनाएर करिब तीन लाख रुपैयाँ कमाइसके । सुरुमा बनाएका मूर्ति देखेर अभिभावक र छिमेकले प्रोत्साहन गर्न थालेपछि उनलाई हौसला मिल्यो । ‘सुरुमै बनाएको मूर्ति गाउँकै एक जना अंकलले १० हजार दिएर लैजानुभयो । यस्तो बनाउँदा बिक्री हुँदोरहेछ । अलि राम्रो बनाउन सके अझै धेरै मूल्य पर्छ भन्ने लाग्यो,’ विक्रमले भने, ‘त्यो पैसाले मूर्ति बनाउन आवश्यक साधन किनें । त्यसयता निरन्तर मूर्तिको अर्डर आउन थालेको छ ।’

अहिले उनलाई मूर्ति बनाउन म्याग्दी, स्याङ्जा, कास्की, बागलुङलगायतबाट अर्डर आउन थालेको छ । पछिल्लो समय उनले बनाएको एउटै मूर्ति ५० हजार रुपैयाँभन्दा बढीमा समेत बिक्री हुन थालेको छ ।

विक्रम आफ्नै हातले कुँदेका मूर्ति लिन सोमबार स्याङ्जाको अर्जुनचौपारी गाउँपालिकाको एक टोलीले अकल्पनीय मूर्ति बनेको भन्दै उनलाई प्रोत्साहनस्वरूप बोलकबोलभन्दा बढी रकम दिएर फर्किए । ‘कलिलो केटोले बनाउँछ भनेपछि उसैलाई प्रोत्साहन गर्नुपर्छ भनेर यहाँ अर्डर गरेका थियौं,’ अर्जुनचौपारी गाउँपालिका–१ का डिलबहादुर अधिकारीले भने, ‘हामीले सामान्य भए पनि चल्छ भनेर अर्डर दिएका थियौं । यहाँ आएर हेर्दा अचम्म लाग्यो । हामीले अपेक्षा गरेभन्दा कैयौं गुणा आकर्षक मूर्ति बनेछन् ।’ डिलबहादुरसहित अधिकारी काश्यप गोत्रीय ऋषि, गेटपाले र बिन्दबासिनीको मूर्ति अर्डर गरेको उनले बताए । अर्डर गरेको दुई महिनाको अवधिमै आकर्षक मूर्ति बनाएको उनले बताए ।

पछिल्लो समय विक्रमले देवीदेवताका साथै विभिन्न ऋषिमुनिका मूर्तिसमेत निर्माण गर्न थालेका छन् । ग्राहकको माग र साइजअनुसारका ढुंगा कालीगण्डकी किनार तथा विभिन्न खोलाकिनारबाट ल्याएर फलामे छिनो, किल्लालगायतको सहायताले हातबाटै मूर्ति बनाउँदै आएका छन् । ग्राहकको माग र आवश्यकताअनुसारको रङ भरेर उनले हरेक देवीदेवता तथा ऋषिमुनिका मूर्ति उतार्न थालेका छन् ।

‘सुरुसुरुमा नपढेर केकेमा भुल्यो भनेर गाली पनि गरें,’ आमा शारदा अधिकारीले भनिन्, ‘पछि मूर्तिको आकार निकाल्न थालेपछि केही गर्छ भन्ने लाग्यो । उसले मागेका सरसामान किनेर ल्याइदिन थाल्यौं । उसको काम देखेर अहिले खुसी लाग्छ ।’ स्थानीय अगुवा ख्यामनारायण अधिकारीले कलिलो उमेरमै हस्तकलामा निखारिएको प्रतिभाको संज्ञा दिन्छन्, विक्रमलाई । ‘केही व्यक्तिमा यस्तो प्रतिभा त हुन्छ,’ उनले भने, ‘यति कलिलो उमेरमा निखारिएको प्रतिभा मैले कतै देखेको छैन । यस्तो प्रतिभालाई राज्यले प्रोत्साहन गर्नुपर्छ ।’

प्रकाशित : माघ ११, २०७९ ०८:५५
पूरा पढ्नुहोस्
प्रतिक्रिया
पठाउनुहोस्
×