कान्तिपुर वेबसाईट
AdvertisementAdvertisement
२५.१२°C काठमाडौं
काठमाडौंमा वायुको गुणस्तर: १३४

बस्तीमा पसेको चितुवाको उद्धार 

प्रकाश बराल

बागलुङ — बुधबार बिहान यहाँको बस्तीमा पसेको चितुवा प्रहरी र जिल्ला वनको टोलीले उद्धार गरेको छ । बागलुङ नगरपालिका वडा नम्बर–३ को गुठीस्थित रप्ता खड्काको घरमा चितुवा पसेको थियो ।

छिमेकी जुटेर हल्लाखल्ला गरेपछि फेरि उक्त चितुवा स्थानीय रामु खड्काको घरमा पुगेको थियो । प्रहरी र वनका प्राविधिक आएपछि चितुवालाई सकुसल समातेर लगेका छन् ।

‘हामीले चितुवा सकुशल समातेका छौं, प्रक्रिया पुर्‍याएर सुरक्षित स्थानमा छाड्छौं,’ प्रहरी नायब उपरप्क्षक गंगाबहादुर थापाले भने, ‘समयमा खबर भएकोले कुनै क्षति नभइ चितुवा समात्न सकियो ।’ बच्चाहरू खेल्नेक्रममा देखेपछि चिच्याएर भागेका थिए । तत्काल घरका ढोका बन्द गरेर स्थानीयले प्रहरीमा खबर गरेका थिए ।

पछिल्लो समय बागलुङ नगरपालिका वडा नम्बर १, २, ३ र ४ रहेको बजार क्षेत्रमै चितुवा नियमितजसो देखिन थालेको छ । कुखुरा खाइदिने समस्या त नियमित भइरहेको स्थानीयले बताए । कालिका मन्दिर रहेको जंगल तथा स्थानीय रामरेखा सामुदायिक वन र कैलमपोखरी सामुदायिक वनमा नियमित चितुवा भेटिने गरेको हो । कालिका मन्दिरमा बेलाबेला बाघसमेत प्रवेश गरेको त्यहाँ जडान गरिएको सीसी क्यामेरामा कैद हुने गरेको छ ।

पोखरा–बागलुङ सडकखण्डको मालढुंगादेखि बागलुङ बजार आउने क्रममा पनि साँझको समयमा नियमित चितुवा देखिने गरेको यात्रीले बताए । साँझको समयमा मोटरसाइकलमा यात्रा गर्न डर लाग्ने गरेको स्थानीय महेन्द्र आचार्यले बताए । ‘घरमा नियमित आएर कुखुरा खाइदिएर हैरान बनाएको छ,’ आचार्यले भने, ‘कति पटक थाहा पाएर लखेट्छौं, बजारमा पसेको चितुवा घरभित्र, खोरमा र सडकमै पनि भेटिन्छ ।’

प्रकाशित : माघ ४, २०७९ १२:३४
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?