बझाङकी कुपोषित बालिकालाई आर्थिक सहयोग
कास्की — पुस १६ गते कान्तिपुर दैनिकमा बझाङ रिपोर्टरको डायरी ‘जब धर्मपुत्री ‘अयोग्य’ बनिन्’ शीर्षकमा समाचार प्रकाशित भएपछि त्यसैको आधारमा पोखरा महानगरपालिका ५ पस्याङका ८९ वर्षीय दीनबन्धु कोइरालाले उनलाई १५ हजार रुपैयाँ आर्थिक सहयोग गरेका छन् ।
कान्तिपुर पब्लिकेसनको प्रदेश कार्यालय सिमलचौरस्थित पोखरामा आएर आइतबार १५ हजार रुपैयाँ कान्तिपुरकर्मीलाई हस्तान्तरण गर्दै उनले भने‚ ‘समाचार पढेपछि थोरै भए पनि सहयोग गर्न मन लागेर अफिसमा नै आएँ । यतिबेला मसँग पनि पैसा छैन । जति थियो त्यति लिएर आए ।’
२०५२ सालमा खाद्य संस्थानबाट सेवा निवृत्त भएका कोइराला अवकाशपछि विभिन्न लेख लेख्दै आएका छन् । ८४ वर्ष पुगेपछि धार्मिक परम्पराअनुसार चौरासीको पूजा लगाउने चलन भए पनि उक्त पूजामा लाग्ने रकम विपन्नको सहयोगमा लगाउने गरेको उनले बताए ।
बझाङको मस्ता गाउँपालिकाकी ती बालिकालाई कसैले धर्मपुत्री बनाउन काठमाडौं लगेको र पछि कुपोषणले ग्रस्त भएकी ती बालिकालाई दुई साता राखेर फिर्ता पठाइदिएका थिए । बालिका (मनकला)का बुबा छैनन् । उनका ६ दिदीबहिनी छन् । खानाको अभावले जमना (आमा) ले मनकलालाई धर्मपुत्री बनाएर पठाएकी थिइन् ।
प्रकाशित : पुस २४, २०७९ १३:४३
