कान्तिपुर वेबसाईट
AdvertisementAdvertisement
२०.१२°C काठमाडौं
काठमाडौंमा वायुको गुणस्तर: १५७

अटोमा दैनिकी चलाएका महिला

सम्झना रसाइली

तनहुँ — ब्यास नगरपालिका–२ की ४५ वर्षीया रामकुमारी मजकोटी बिहान ६ बजेभित्रै उठ्छिन । घरकोठा सफा गर्छिन्, खाना पकाउँछिन् । अनि अटो रिक्सा लिएर बजार निस्किन्छिन् । विद्यालय समयमा घरमा गएर छोरीलाई स्कुल पुर्‍याउँछिन् । खाना खान्छिन् र फेरि अटो लिएर यात्रुको सेवामा हाजिर हुन्छिन् । 

अटोमा दैनिकी चलाएका महिला

उनले सिलाइकटाइ व्यवसाय गर्दै आएकी थिइन् । तर स्वास्थ्यमा समस्या देखिएपछि अटो रिक्सा चलाउन सिकिन् । अहिले त्यही अटो उनको घरव्यवहार चलाउने माध्यम बनेको छ । २ छोरीकी आमा रामकुमारीको दाम्पत्य जीवन सुखद नभएपछि अहिले उनको सहारा अटो बनेको छ । उनी पछिल्लो एक महिनादेखि सदरमुकाम दमौली आसपासका क्षेत्रमा अटो चलाउन थालेकी हुन् । खुट्टामा आएको समस्याले सिलाई मेसिन चलाउन नसक्दा आम्दानी सुकेपछि उनले विकल्पमा अटो चलाउन थालेकी हुन् ।

‘श्रीमान्सँग सम्बन्धविच्छेद भएपछि घरखर्च चलाउन निकै समस्या पर्‍यो,’ उनले भनिन्, ‘त्यसैले अटो चलाउन थालेकी हुँ ।’ दुई छोरीमध्ये कान्छी आफैंसँग रहेको र उनको पढाइ र घरव्यवहार चलाउनुपर्ने दायित्व छ । उनी दैनिक १२ घण्टा पुरुष चालकसँग प्रतिस्पर्धा गर्दै अटो चलाउँछिन् । महिलालाई काम गर्न जता पनि गाह्रो हुने उनले सुनाइन् । ‘यात्रुले पनि महिलाभन्दा पुरुष चालकलाई नै बढी विश्वास गरेको पाएँ,’ उनले दुखेसो पोखिन् । मनग्य आम्दानी नभए पनि घरखर्च चलाउन समस्या नभएको उनको भनाइ छ । दैनिक १ हजार ५ सयदेखि २ हजार रुपैयाँसम्म आम्दानी हुने उनले बताइन् ।

यसैगरी व्यास–१ भादगाउँकी ३१ वर्षीया श्रीधरा थापामगर पनि ३ महिनादेखि अटो चलाउँदै आएकी छन् । पहिला सिलाइकटाइ गर्दै आएकी उनी सोचेजस्तो आम्दानी नभएपछि अटो चलाउन सुरु गरेकी हुन् । श्रीधरा जिल्लाकै पहिलो महिला अटोचालक हुन् । उनकै सिको गरेर रामकुमारी पनि यसमा आँट गरेकी हुन् । श्रीधराका श्रीमान् नेपाल आर्मीबाट सेवा निवृत्त भएपछि काठमाडौंको एक होटलमा सेक्युरिटीको काम गर्छन् । उनी भन्छिन्, ‘सुरुमा अटो चलाएर हिँड्न लाज लाग्थ्यो । अझ यात्रुहरू अटो महिलाले चलाउने भन्ने थाहा पाएपछि चढ्न अप्ठ्यारो मान्दा नमज्जा लाग्थ्यो ।’ आफूले अटो चलाएर हिँड्दा यात्रुहरू फर्कीफर्की हेर्ने गरेकोमा अहिले भने त्यो हटेको उनले बताइन् । ‘अटो चलाउँछु भनेर सिक्न हिँड्दा छरछिमेकले छोरी मान्छे भएर गाडी चलाउने ? सबै पुरुषहरू मात्रै छन्, त एक्लै के गर्छेस् भन्थे,’ उनले भने, ‘अहिले परिवर्तन भएको छ । मसँग यात्रा गर्न कोही पनि डराउँदैन । पहिले कुरा काट्ने पनि अहिले राम्रो काम गरेकी छौं भनेर प्रशंसा गर्दा हौसला थपिएको छ ।’

उनी बिहान ८ बजेदेखि साँझ ७ बजेसम्म राजमार्गको छेउछाउमा अटो चलाउँछिन् । कहिलेकहीं फोन आउँदा बिहानको ६/७ बजे नै निस्किने तर बेलुका भने ननिस्कने उनले जनाइछन् । उनको २ छोरी छन् । उनले अटो चलाएरै छोरीहरूलाई पठनपाठन र घरखर्च चलाउने गर्छिन् । ‘सिलाइकटाइबाट राम्रो आम्दानी हुँदैनथ्यो । २/४ रुपैयाँ चाहिए पनि श्रीमान्सँग माग्नुपर्दथ्यो,’ उनले भनिन्, ‘अहिले अटो चलाएर आफू र नानीको खर्च उठाउन सक्छु । आफ्नो आम्दानी भएपछि आफ्नै हिसाबबाट नै खर्च पनि गर्न सक्छु ।’

दमौलीका अटो व्यवसायीले दमौली अटो चालक समिति गठन गरेका छन् । उक्त समितिभित्र ३२ वटा अटो र समिति बाहिर ८ वटा अटो गरी दमौली आसपासका क्षेत्रमा ४० वटा अटो सञ्चालनमा छन् । यी चालकमध्ये २ जना मात्र महिला छन् ।

प्रकाशित : पुस ३, २०७९ ०८:३८
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?