झिनो मतान्तरका हारजित- गण्डकी - कान्तिपुर समाचार

झिनो मतान्तरका हारजित

सबैभन्दा कम ६ मतान्तरमा एमालेका सुधीर पौडेल स्याङ्जा १ (२) बाट प्रदेशसभामा निर्वाचित 
प्रतीक्षा काफ्ले

कास्की — झिनो मतान्तरका कारण स्याङ्जा १ (२) को चुनावी नतिजा अन्यत्रभन्दा बढी चासोको विषय रह्यो । ६ मत बढी पाएर एमालेका सुधीर पौडेल प्रदेशसभा सदस्यमा निर्वाचित भए भने कांग्रेसका बुद्धिबहादुर रानाले पराजय व्यहोर्नुपर्‍यो । 


यहाँ पौडेलले १७ हजार ४ सय ४१ मत ल्याउँदा उनका निकटतम प्रतिस्पर्धी कांग्रेसका रानाले १७ हजार ४ सय ३५ मत ल्याएका थिए । यो प्रदेशमै सबैभन्दा कम मतान्तरको हारजित हो । मंसिर ४ मा सम्पन्न प्रतिनिधिसभा र प्रदेशसभा निर्वाचनको मत परिणाम सार्वजनिक भएको छ ।

चुनावी नतिजा सार्वजनिक भएअनुसार प्रतिस्पर्धीको हारजित थोरै मतान्तरमा भएको छ । गण्डकी प्रदेशमा प्रतिनिधिसभाका १८ निर्वाचन क्षेत्रमध्ये १७ वटामा चुनावी परिणाम आइसकेको छ । प्रदेशसभातर्फ ३६ मध्ये निर्वाचन क्षेत्रमध्ये ३४ वटाको मत परिणाम सार्वजनिक भइसकेको छ । स्याङ्जा २ को मतगणना भने १० दिनपछि सुरु हुने भएको छ । राजनीतिक दलका विवादका कारण मतगणना रोकिएको थियो । बुधबार मात्रै निर्वाचन आयोगले मतगणना गर्न निर्देशन दिएको हो ।

चुनावी नतिजा आएकामध्ये प्रतिनिधिसभातर्फ १ र प्रदेशसभातर्फ ५ क्षेत्रमा रोचक हारजित भएको छ । यी क्षेत्रमा झिनो अर्थात् ५ सयभन्दा कम मतान्तरले प्रतिनिधिसभा र प्रदेशसभा सदस्य चुनिएका छन् । कांग्रेस १ र एमाले ५ ठाउँमा ५ सयभन्दा कम मतले हारजित भएका छन् । झिनो मतान्तरले जित्नेमा माओवादीका पनि छन् ।

म्याग्दी प्रदेशसभा २ का माओवादी उम्मेदवार रेशम जुग्जालीले एमाले उम्मेदवार यामबहादुर गर्बुजालाई १ सय १ मतान्तरले पराजित गरे । रेशमले ९ हजार ४ सय ५४ मत ल्याउँदा एमालेका गर्बुजाले ९ हजार ३ सय ५३ मत ल्याए । प्रदेशसभातर्फ मुस्ताङ २ बाट कांग्रेसका विकल शेरचनले एमालेका चन्द्रमोहन गौचनलाई १ सय ५८ मतले जितेका थिए । शेरचनले २ हजार ७ सय २३ मत प्राप्त गर्दा एमालेका गौचनले २ हजार ५ सय ६५ मत पाए ।

यी दुई स्थानमा झिनो मतले विजयी हुनेमा कांग्रेसका उम्मेदवार छन् । हार्नेहरू एमाले उम्मेदवार हुन् । गुरुङले एमालेका उम्मेदवार इन्द्रधारा डादु विष्टलाई २५० मतले हराउँदै मुस्ताङ (१) मा कांग्रेसका नम्डु गुरुङ प्रदेशसभा सदस्य चुनिए । नम्डुले १ हजार ४८ मत पाउँदा एमालेका इन्द्रधाराले ७ सय ९३ मत ल्याएका थिए ।

मनाङ (१) मा पनि कांग्रेस उम्मेदवारले एमाले उम्मेदवारलाई थोरै मतान्तरले हराए । कांग्रेसका मुनीन्द्रजंग गुरुङ र एमालेका राजनबहादुर गुरुङको मतान्तर ३ सय ३० छ । ५ सयको झिनो मतान्तरले हार जित हुनेमा प्रतिनिधिसभातर्फ मनाङ छ । मनाङमा कांग्रेसका टेकबहादुर गुरुङले थोरै मतान्तरले जित हात पारे ।

प्रकाशित : मंसिर १५, २०७९ ०८:४३
प्रतिक्रिया
पठाउनुहोस्

गोरखामा समानुपातिकमा एक सय मत नकटाउने धेरै

हरिराम उप्रेती

गोरखा — प्रदेशसभा र प्रतिनिधिसभा निर्वाचनको प्रत्यक्ष र समानुपातिकतर्फको अन्तिम मत परिणाम सार्वजनिक भइसकेको छ । समानुपातिकतर्फ भाग लिएका ४८ मध्ये गोरखामा केही दलले ५० मत पनि कटाएका छैनन् ।

प्रतिनिधिसभा क्षेत्र नं. १ को समानुपातिकतर्फ ३४ वटा पार्टीले सामानुपातितर्फ ५० मत कटाएनन् । प्रतिनिधिसभा गोरखा क्षेत्र नं. २ को सामानुपातिकमा पनि ३१ दलले ५० मत पनि प्राप्त गरेनन् । प्रदेश समानुपातिकतर्फ गोरखा–१ मा भाग लिएका ३१ मध्ये १८ वटा पार्टीले एक सय मत कटाएका छैनन् ।

गोरखा–२ को प्रदेशसभाको समानुपातिकतर्फ ३१ मध्ये १९ दलले समानुपातिकतर्फ सय भन्दा कम मत पाएका छन् । समानुपातिकमा माओवादीले सबैभन्दा धेरै मत प्राप्त गरेको छ । माओवादीले सामानुपातिकतर्फ ३७ हजार ४ सय ७१ मत प्राप्त गरेको छ । कांग्रेसले २७ हजार ५ सय ५३, एमालेले १८ हजार ४ सय ४१ मत प्राप्त गरेको छ ।

२०६४ र ०७० को संविधानसभा निर्वाचनको तीनवटै क्षेत्र माओवादीले जितेको थियो । २०७४ को निर्वाचनमा प्रतिनिधिसभा गोरखा–२ मा कांग्रेसको गठबन्धनबाट तत्कालीन नयाँ शक्ति पार्टीका बाबुराम भट्टराईले जित हात पारे । उक्त क्षेत्रको प्रदेशसभा १ मा पनि नयाँ शक्तिकै हरिशरण आचार्य विजयी बनेका थिए भने २ मा कांग्रेसका प्रकाशचन्द्र दवाडी विजयी बनेका थिए ।

०७४ मा प्रतिनिधिसभा गोरखा–१ मा कांग्रेसका चिनकाजी श्रेष्ठ वाम गठबन्धनबाट उम्मेदवार बनेका माओवादीका हरिराज अधिकारीसँग पराजित बनेका थिए । गोरखा १ अन्तर्गतको दुवै प्रदेशसभा निर्वाचन क्षेत्र वाम गठबन्धनका उम्मेदवार विजयी बनेका थिए । यसपल्टको निर्वाचनमा भने नेपाली कांग्रेसले दुईवटा प्रदेशसभा र एउटा संघीय निर्वाचन क्षेत्रमा जित हात पारेको छ ।

प्रतिनिधिसभातर्फ गोरखा–१ मा निर्वाचित कांग्रेस उम्मेदवार राजेन्द्र बजगाईंले प्रदेश हारको बदला संघमा लिएका हुन् । २०७४ को निर्वाचनमा गोरखा १ (२) प्रदेशसभामा एमालेका रामशरण बस्नेतसँग पराजित बनेका बजगाईंले पाँच वर्षपछि प्रतिनिधिसभामा भारी मतान्तरसहित उनै बस्नेतलाई हराएका हुन् । १६ हजार ६ सय ४३ मतसहितको फराकिलो मतान्तरले बजगाईं विजयी बने ।

बजगाईंले ३३ हजार ४ सय २८ मत प्राप्त गर्दा उनका निकटतम प्रतिद्वन्द्वी एमाले उम्मेदवार बस्नेतले १६ हजार ७ सय ८५ मत ल्याएर पराजित बने । १ लाख १५ हजार ३ सय ९७ मतदाता रहेको गोरखा–१ मा ६० हजार २ सय ८२ मत खसेको थियो । सदर मत ५७ हजार २ सय ३१ रहेको गोरखा–१ मा ३ हजार ५१ मत बदर भएका थियो ।

२०७४ को निर्वाचनमा वाम गठबन्धनन्धनको तर्फका उम्मेदवार बस्नेतलाई प्रदेशमा सहज बनेको थियो । बजगाईंले पाँच वर्षपछि भने माओवादीको साथले पुरानो प्रतिस्पर्धी बस्नेतलाई पराजित गरे ।

यद्यपि उम्मेदवारी दर्ताको एक दिनअघि मात्र बजगाईंको टिकटको टुंगो लागेको थियो । माओवादीसँग तालमेल गरेपछि उनी आशावादी थिए । गोरखा १ (२) प्रदेशसभा पनि कांग्रेसका उम्मेदवार नन्दप्रसाद न्यौपाने र २ (२) मा कांग्रेसका सुरेन्द्रराज पाण्डे विजयी बनेका छन् । प्रतिनिधिसभा गोरखा–२ मा माओवादी केन्द्रका अध्यक्ष पुष्पकमल दाहाल, गोरखा १ (१) प्रदेशसभामामा माओवादीका कृष्ण धिताल विजयी वनेका छन् भने २ (२) मा नेपाल समाजवादी पार्टीका फणीन्द्र देवकोटा विजयी बनेका छन् ।

प्रकाशित : मंसिर १५, २०७९ ०८:२२
पूरा पढ्नुहोस्
प्रतिक्रिया
पठाउनुहोस्
×