गोरखामा ३४ उम्मेदवारको जमानत जफत- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

गोरखामा ३४ उम्मेदवारको जमानत जफत

कान्तिपुर संवाददाता

गोरखा — निर्वाचनमा उम्मेदवारी दिएकामध्ये ३४ जनाको जमानत जफत भएको छ । जिल्लामा प्रतिनिधिसभातर्फ २ र प्रदेशसभातर्फ ४ क्षेत्रमा गरी ४९ जनाले उम्मेदवारी दिएका थिए । जिल्ला निर्वाचन कार्यालय सूचना अधिकारी रविलाल सुवेदीका अनुसार सदर मतको १० प्रतिशत मत नल्याउने उम्मेदवारको धरौटी जफत भएको हो ।

प्रतिनिधिसभातर्फ दुवै क्षेत्रमा विजयी भएका सत्ता गठबन्धनका उम्मेदवार, एमाले तथा राष्ट्रिय स्वतन्त्र पार्टीका उम्मेदवारको मात्रै धरौटी सुरक्षित छ । क्षेत्र–१ मा कुल सदर मत ५७ हजार २ सय ३१ थियो । जसमध्ये १० प्रतिशत मत नपाउने ८ जनाको धरौटी जफत भएको छ ।

यहाँ सत्ता गठबन्धनबाट कांग्रेसका उम्मेदवार राजेन्द्र बजगाईं विजयी भएका थिए । निकटतम प्रतिद्वन्द्विमा एमालेका रामशरण बस्नेत थिए । उनीहरू दुवैको जमानत रकम सुरक्षित हुँदा रास्वपाका उम्मेदवार सुवर्ण रोकायालगायतको भने जफत भएको हो ।

क्षेत्र–२ मा सत्ता गठबन्धनबाट माओवादी केन्द्रका अध्यक्ष पुष्पकमल दाहाल विजयी भएका थिए । रास्वपाका कविन्द्र बुर्लाकोटी र एमालेका अब्दुससलाम मियाँ क्रमशः दोस्रो र तेस्रो स्थानमा रहे । यी ३ बाहेक अन्य ९ जनाको धरौटी जफत भएको छ । यहाँको सदर मत ५० हजार ९१८ थियो ।

प्रदेशसभा सदस्यतर्फ क्षेत्र–१ (१) मा ५ उम्मेदवारको धरौटी जफत भएको छ । यो क्षेत्रमा २९ हजार ४ सय ४४ मत सदर भएको थियो । त्यस्तै, क्षेत्र–१ (२) मा सदर भएको २८ हजार ४ सय ८७ मतमध्ये ४ जनाले १० प्रतिशत मत कटाउन सकेनन् ।

क्षेत्र–२ (१) मा उम्मेदवारी दिएका ५ जना र क्षेत्र–२ (२) मा ४ जनाले धरौटी जोगाउन सकेनन् । प्रतिनिधिसभा सदस्यमा उम्मेदवारी दिन १० हजार र प्रदेशसभा सदस्यमा उम्मेदवारी दिन ५ हजार रुपैयाँ धरौटी राख्नुपर्ने प्रावधान छ ।

प्रकाशित : मंसिर १४, २०७९ ०७:४६
प्रतिक्रिया
पठाउनुहोस्

प्रायोजकले छाडेपछि प्रतियोगिता स्थगित

विनोद भण्डारी

विराटनगर — सगरमाथा कप क्रिकेट प्रतियोगिता विराटनगरमा स्थगित भएको छ । प्रायोजक पछि हट्दा प्रदेश १ क्रिकेट संघको आयोजना र लेभिन स्पोर्टस कमर्सियल पाटर्नरको व्यवस्थापनमा विराटनगरको बैजनाथ रंगशलामा भइरहेको प्रतियोगिता बिचैमा स्थगन भएको हो ।


प्रतियोगिताको स्थगनसँगै होटल र यातायात व्यवसायीले बसेको, खाएको र गाडीमा गुडेको रकम असुलीका लागि आयोजक तथा व्यवस्थापकलाई सोमबार दिनभर खोजी गरेका थिए ।

यो प्रतियोगिताका लागि डाफा न्यूज, ड्रिम एलेभन र फ्यान कोडले हरेक म्याच टेलिभिजनबाट प्रत्यक्ष प्रसारण गर्ने सहमतिमा ७० हजार डलर प्रायोजन गरेका थिए । आइतबार भएको नेपाल प्रहरी र इस्टर्न रेल्वे पटनाबीचको १० औं म्याच टेलिभिजनबाट प्रत्यक्ष प्रसारण नभएको र अनलाइनमा क्रिकइन्फोबाट पनि लाइभ अपडेट नभएपछि असन्तुष्ट भएर प्रायोजक पछि हटेको बताइएको छ ।

यो प्रतियोगिताको प्रत्यक्ष प्रसारणको जिम्मेबारी ऐरिना टेलिभिजनलाई दिइएको थियो । गत आइतबार म्याच हुँदै गर्दा रंगशालामा राखिएको जेनेरेटरले काम नगरेपछि प्रत्यक्ष प्रसारण नहुँदा प्रायोजक पछि हटेर प्रतियोगिता स्थगित भएको व्यवस्थापक लेभिन स्पोटर्सका निर्देशक रोशन धितालले बताए । हरेक म्याच टेलिभिजनबाट प्रत्यक्ष प्रसारण हुँदा यूटुबबाट विश्वभर प्रसारण भएको थियो । त्यसकै आधारमा प्रायोजकले प्रतियोगिताको स्कोर बेटिङ एपलाई बिक्री गर्दै आएको थियो ।

प्रविधि र दक्ष प्राविधिकको अभावमा म्याचको प्रसारण हुन नसकेको स्वीकार्दै धितालले चाँडै प्रतियोगिता सञ्चालनका लागि पहल गर्ने बताए । प्रतियोगितामा १८ लिग म्याच र एक फाइनल म्याच हुने तय गरिएको थियो । विजेताले ३ लाख र उपविजेताले १ लाख रुपैयाँ पुरस्कार पाउने थिए ।

प्रतियोगितामा नेपालका तीन विभागीय टिम नेपाल प्रहरी, सशस्त्र प्रहरी र आर्मीसहित प्रदेश १ तथा भारतको इस्टर्न रेल्वे र ध्रुव क्रिकेट ऐकेडेमी लखनउको सहभागिता थियो । प्रायोजकको असन्तुष्टिका कारणले प्रतियोगिता बन्द भएको खबरसँगै खेलाडी र अफिसियल बसेका होटलवाला रकम असुलीका लागि प्रतियोगिताका व्यवस्थापक धिताललाई खोज्दै हिडे पछि यसको सर्वत्र चर्चा भएको थियो ।

प्रतियोगिताका आयोजक र व्यवस्थापकले खेलाडी तथा अफिसियल बसेका होटल र खेलाडी ओसारपसार गर्ने यातायात व्यवसायीलाई र अफिसियललाई करिब १५ लाख रुपैयाँ तिर्न बाँकी रहेको धितालले बताए । प्रतियोगिताका अफिसियल होटल इस्टर्न स्टार तथा खेलाडीहरू दिव्यरत्न, ड्राइगनलगायतका होटलमा बसेका थिए ।

धिताल सुरक्षाका लागि सोमबार साँझ आफै जिल्ला प्रहरी कार्यालय मोरङमा आएको मुद्दा शाखाका डीएसपी टीकाबहादुर कार्कीले बताए । मंगलबार होटल र यातायात व्यवसायीसहित आयोजक र व्यवस्थापकबीच मोरङ प्रहरी कार्यालयमा भएको सर्वपक्षीय सहमति पछि यसको विवाद तत्काल साम्य भएको छ ।

सहमतिअनुसार होटल र यातायात व्यवसायीलाई तिर्नुपर्ने रकमको ४० प्रतिशत १२ दिनभित्र र बाँकी रहेको ६० प्रतिशत रकम थप १८ दिनभित्र चुक्ता गर्ने सहमति भएको छ । सहमति पत्रमा आयोजकका तर्फबाट क्रिकेट संघ प्रदेश १ का सचिव मनोज कटुवाल र व्यवस्थापक धितालले हस्ताक्षर गरेको प्रहरीले बताएको छ । धितालले मंगलबार नै केही होटल र यातायात व्यवसायीलाई ब्याकडेटको चेक दिएको बताइएको छ ।

प्रकाशित : मंसिर १४, २०७९ ०७:४४
पूरा पढ्नुहोस्
प्रतिक्रिया
पठाउनुहोस्
×