लमजुङमा सुन लुट्ने भारतीय नागरिक पक्राउ- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

लमजुङमा सुन लुट्ने भारतीय नागरिक पक्राउ

आश गुरुङ

लमजुङ — सुन सफा गरिदिन्छु भन्दै ठगी गर्ने भारतीय नागरिकलाई लमजुङ प्रहरीले पक्राउ गरेको छ । सुनको गहनालाई सफा गरिदिने भनी रासायनिक पदार्थ प्रयोग गरेर ठगेको आरोपमा भारतको बेगुसराई जिल्ला, नावकोठी १०, बिहारका २४ वर्षीय विवेक कुमारलाई पक्राउ गरिएको प्रहरीले जनाएको छ ।


मर्स्याङ्दी गाउँपालिका ३ खुदीमा तीन जना महिलाले लगाएको सुनको सिक्री तथा ब्रासलेट खोल्न लगाएर विभिन्न रासायनिक पदार्थको प्रयोगबाट सुन सफा गर्ने नाममा ठगी गरेको आरोपमा उनी पक्राउ परेका हुन् ।

पक्राउ गरेर ल्याइएका ती युवकलाई बिहीबारदेखि लागू हुने गरी शुक्रबार जिल्ला अदालत लमजुङबाट ७ दिनको म्याद थप गरेर अनुसन्धान भइरहेको जिल्ला प्रहरी कार्यालयका सूचना अधिकारी प्रहरी निरीक्षक जगदिश रेग्मीले बताए । ती युवकका साथबाट प्लाष्टिकका बोत्तलहरूमा राखिएका विभिन्न रसायनहरू पनि बरामद गरेको प्रहरीले जनाएको छ ।

प्रहरीले विभिन्न बाहना बनाएर सुन तथा अन्य गरगहना सफा गरी टल्काइदिन्छु भनी ठगी गर्न जोकोही पनि आउनसक्ने भन्दै त्यस्ता व्यक्तिसँग सचेत रहन अनुरोध गरेको छ ।

प्रकाशित : मंसिर १०, २०७९ १५:२५
प्रतिक्रिया
पठाउनुहोस्

सेजन र आईआईडीएसबीच समझदारी

कान्तिपुर संवाददाता

काठमाडौँ — नेपाल आर्थिक पत्रकार समाज (सेजन) सर्वाङ्गीण विकास अध्ययन केन्द्र(आईआईडीएस) बीच आर्थिक अनुसन्धान तथा क्षमता विकासका कार्यक्रम सञ्चालन गर्ने समझदारी भएको भएको छ ।आईआईडीएसको ४४ औं वार्षिकोत्सको अवसरमा राखिएको समारोहमा बिहीबार सेजन अध्यक्ष जनार्दन बराल र आईआईडीएसका कार्यकारी निर्देशक विश्वास गौचनले समझदारी पत्रमा हस्ताक्षर गरेका हुन् ।

आर्थिक पत्रकारको क्षमता विकास, नीतिगत बहस तथा विभिन्न विषयहरूमा गरिने अध्ययन तथा अनुसन्धानमा सहकार्य गर्न समझदारी गरिएको हो । कार्यक्रममा आईआईडीएसका कार्यकारी निर्देशक विश्वास गौचनले सेजनसँगको सहकार्यले अनुसन्धानको काम तथा क्षमता विकासमा महत्वपूर्ण रहने बताए । ‘क्षमता विकास कार्यक्रम, अनुसन्धान काम गर्नको लागि दुई संस्थाबीच सहकार्य गरिनेछ’ गौचनले भने ।

सेजन अध्यक्ष बरालले सेजनले आर्थिक पत्रकारिताको उन्नयनमा महत्वपूर्ण भूमिका खेलेको बताए । निष्पक्ष र स्वतन्त्र पत्रकारिताको विकासका लागि क्षमतावान पत्रकारको उत्पादन गर्ने उद्देश्य राखेर सेजनले काम गरिरहँदा आईआईडीएससँगको सहकार्यले सेजनको यो उद्देश्यमा सहयोग पुर्‍याउने बताए ।

समझदारीअनुसार दुई संस्थाबीच वित्त, अर्थशास्त्र र विकासका क्षेत्रमा क्षमता अभिवृद्धि कार्यक्रमहरूको डिजाइन र कार्यान्वयनमा सहकार्य गर्ने, राष्ट्रिय महत्वका विभिन्न मुद्दाहरूमा सम्मेलन तथा कार्यक्रम गर्न सहकार्य गर्ने, आर्थिक विकासका क्षेत्रमा अनुसन्धानका कार्यक्रमहरूको तर्जुमा, कार्यान्वयनर प्रचारप्रसारमा सहकार्य गर्ने एवम् विकासका मुद्दाहरूमा नीतिगत पैरवी गर्ने लगायतका काम गरिने विज्ञप्तिमा उल्लेख छ ।

प्रकाशित : मंसिर १०, २०७९ १५:२२
पूरा पढ्नुहोस्
प्रतिक्रिया
पठाउनुहोस्
×