दुई केन्द्रमा सयभन्दा कम मतदाता
गोरखा — जिल्लाका दुईवटा मतदान केन्द्रमा एक सयभन्दा कम मतदाता रहेका छन् । चुमनुव्री गाउँपालिका–४ को स्वास्थ्य चौकी नामरुङ लार्के बजार मतदान केन्द्रमा ८३ मतदाता छन् । ४६ पुरुष र ३७ महिला मतदाता रहेको जिल्ला निर्वाचन कार्यालयले जनाएको छ ।
त्यस्तै चुमनुव्री गाउँपालिका–१ को साम्दो आधारभूत विद्यालय मतदान केन्द्रमा ५६ पुरुष र ४२ महिला गरी ९८ मतदाता छन् । चुमनुव्री गाउँपालिका–४ क्वाक आधारभुत विद्यालयमा एक सय १ मतदाता छन् । क्वाक आधारभुत विद्यालयमा ४८ पुरुष र ५३ जना महिला मतदाता रहेको निर्वाचन कार्यालयका सूचना अधिकारी रविलाल सुवेदीले जानकारी दिए ।
चुमनुव्री–४ कै हिमालचुली आधारभूत विद्यालय छाकमा १ सय ९, बारपाक सुलिकोट गाउँपालिका–३ को स्तुल आधारभूत विद्यालय स्तुलखोलामा १ सय २३, चुमनुव्री गाउँपालिका–३ को बौघ हिमाली आधारभूत विद्यालय न्याकमा १ सय ३५, उक्त वडाको सिदुङ आधारभुत विद्यालय सरस्यूमा १ सय ४४ मतदाता छन् । जिल्लाका ३ सय १७ मतदान केन्द्रका कर्मचारी पुगेर मतदान केन्द्र व्यवस्थापनको काम सकेका छन् ।
दुई प्रतिनिधिसभा र ४ प्रदेश निर्वाचन क्षेत्र रहेको गोरखामा ३ सय १७ मतदान केन्द्र छन् । मुख्य निर्वाचन अधिकृत तेजेन्द्रप्रसाद शर्माका अनुसार आइतबार मतदान सकिएपछि मतपेटिका संकलन सुरु हुनेछ । गोरखा क्षेत्र नं. २ को आइतबार रातभरि र हेलिकोप्टरको व्यवस्था भएमा क्षेत्र नं. १ को मंसिर ५ को साँझसम्म मतपेटिका संकलन सक्ने योजना रहेको उनले सुनाए । ‘मतपेटिका संकलनको आन्तरिक तयारी पनि भइरहेको छ,’ उनले भने ।
मतदानको दिन उम्मेदवार र प्रतिनिधि मतदान केन्द्रका जाँदा पाँच सय मिटर परिधिभित्र स्थिर रूपमा बस्ने कार्य नगर्न पनि आग्रह गरिएको छ । मतदानको दिन मतदान केन्द्रमा मतदान गर्ने मतदाताबाहेक अन्य बाह्य अनाधिकृत व्यक्तिको प्रवेशमा रोक लगाइएको छ ।
चुमनुव्री गाउँपालिकाअन्तर्गतको २२ वटा मतदान केन्द्रका मतपेटिका संकलनका लागि निर्वाचन आयोगसँग हेलिकोप्टरको माग गरिएको छ । तर शनिबार साँझसम्म कुनै निर्णय भइसकेको छैन । हेलिकोप्टरको व्यवस्थापन भए संकलन केन्द्र तोकेर सदरमुकामको मतगणना स्थलसम्म मतपेटिका ल्याउने गरी आन्तरिक तयारी गरिएको छ ।
मतगणनाका लागि तारजाली र सीसीटीभी क्यामेरासहित व्यवस्थापनको काम पनि सकिएको छ । गोरखा क्षेत्र नं. १ को जिल्ला समन्वय समितिको भवन तथा क्षेत्र नं. २ को भू तथा जलाधार व्यवस्थापनको कार्यालयमा मतगणना स्थल निर्माण भएको छ ।
प्रकाशित : मंसिर ४, २०७९ ०९:०३