मासु अड्किएर लमजुङमा ४९ वर्षीय पुरुषको मृत्यु- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

मासु अड्किएर लमजुङमा ४९ वर्षीय पुरुषको मृत्यु

आश गुरुङ

लमजुङ — राँगोको मासु खाँदा घाँटीमा अड्किएर लमजुङमा एक पुरुषको मृत्यु भएको छ । मासुसहितको ह्याकुला निल्ने क्रममा घाँटीमा अड्किएर मर्स्याङ्दी गाउँपालिका ९ सिम्पानी तबैका ४९ वर्षीय शम्शेरबहादुर परियारको मृत्यु भएको डीएसपी प्रकाश श्रीमलले बताए ।

प्रतिकात्मक तस्बिर ।

सोमबार अष्टमीको दिउँसो राँगो काटेको र घरमा चौटा खाने क्रममा घाँटीमा अड्किएपछि परियारलाई खुदीस्थित स्थानीय मेडिकलमा लगिएको थियो । त्यहाँ उपचार हुन नसकेपछि उनलाई बेंसीसहरस्थित जिल्ला अस्पताल लमजुङमा ल्याएको थियो ।

चिसित्सकले उपचार गर्नका लागि जाँच गराउने क्रममा उनको मृत्यु भएको घोषणा गरेको जिल्ला प्रहरी कार्यालयका इन्स्पेक्टर विष्णु विकले बताए । प्रहरीका अनुसार मृतकको पोस्टमार्टमपछि मंगलबार परिवारलाई बुझाइएको छ ।

सोमबार साँझ चितवन कालिका नगरपालिका–८ गैरिबारीका ५० वर्षीय धनबहादुर दानी क्षेत्रीको पनि घाँटीमा मासु अड्किएर मृत्यु भएको थियो ।


प्रकाशित : आश्विन १८, २०७९ १७:३१
प्रतिक्रिया
पठाउनुहोस्

पाल्पाको भुवनपोखरीमा जिप दुर्घटना, ४ जना घाइते 

माधव अर्याल

पाल्पा — पाल्पाको रैनादेवीछहरा गाउँपालिका–३, भुवनपोखरीस्थित गोखुंगामा मंगलबार भएको जिप दुर्घटनामा ४ जना घाइते भएका छन् । 

रैनादेवी मन्दिर रहेको गोखुंगामा भुवनपोखरीको छचुवाबाट नवमी पूजा गर्न पन्चबलीको सामग्रीसहित मन्दिरतर्फ गएको लु १ ज २५८३ नम्बरको जिप दुर्घटनामा परेको हो । दुर्घटनामा भुवनपोखरी छचुवाका दुर्गाबहादुर कुमाल, सरिता कुमाल साथै भुवनपोखरी अमिलेका रितिक परियार, सुनिल परियार घाइते भएको जिल्ला प्रहरी कार्यालयका सूचना अधिकारी वीरेन्द्र थापाले जानकारी दिए । प्रहरीका अनुसार घाइतेमध्ये दुई जनाको अवस्था गम्भीर छ ।

दुर्घटना हुनासाथ तत्काल स्थानीयको सहयोगमा उद्धार गरी घाइतेलाई तानसेन पठाइएको रैनादेवीछहरा–३ का वडाध्यक्ष प्रदीप पौडेलले जानकारी दिए । उकालोमा पछाडि हटेर जिप दुर्घटना भएको प्रहरीको प्रारम्भिक अनुसन्धानमा देखिएको छ । जिपमा १६ यात्रु रहे पनि अन्यलाई केही नभएको इलाका प्रहरी कार्यालय मुझुङले जनाएको छ । दुर्घटनाका सम्बन्धमा थप अनुसन्धान भइरहेको प्रहरीले जनाएको छ ।

प्रकाशित : आश्विन १८, २०७९ १७:२०
पूरा पढ्नुहोस्
प्रतिक्रिया
पठाउनुहोस्
×