राजनीतिक परिवर्तन खोस्ने प्रवृत्तिविरुद्ध गठबन्धन : मुख्यमन्त्री पोखरेल- गण्डकी - कान्तिपुर समाचार

राजनीतिक परिवर्तन खोस्ने प्रवृत्तिविरुद्ध गठबन्धन : मुख्यमन्त्री पोखरेल

प्रतीक्षा काफ्ले

कास्की — गण्डकी प्रदेशका मुख्यमन्त्री कृष्णचन्द्र नेपाली पोखरेलले पाँच दलीय गठबन्धनलाई बलियो बनाएर अघि बढ्न आग्रह गरेका छन् । कांग्रेस, माओवादी केन्द्रलगायत ५ दलीय गठबन्धन मजबुत भए मात्र व्यवस्था बलियो हुने बताए । उनले टिकट प्राप्त गर्नका लागि राजनीतिक दलभित्रका आकांक्षीबीच रस्साकस्सी हुनु स्वाभाविक भए पनि टिकट वितरण भएपछि भने सबै एकताबद्ध भएर लाग्नुपर्ने धारणा राखेका छन् । 

माओवादी केन्द्र पोखरा महानगरपालिका कमिटीले शनिबार आयोजना गरेको कार्यक्रममा मुख्यमन्त्री पोखरेलले गठबन्धनका दलहरू एकताबद्ध भएर अघि बढ्नुपर्ने बताएका हुन् । ‘राजनीतिक व्यवस्थामा आएको परिवर्तन र मुलुकको परिवर्तन जोगाउन र त्यसलाई खोस्ने प्रवृत्तिविरुद्ध गठबन्धन गरेका हौं,’ उनले भने ।

मुख्यमन्त्री पोखरेलले टिकटका लागि दलभित्रका नेताहरूबीच विवाद भए पनि टिकट वितरण भएपछि एकताबद्ध हुनुपर्ने बताए ।

टिकट वितरण भएपछि आकांक्षीहरूले अप्ठ्यारो नमानी गठबन्धनलाई जिताउनका लागि लाग्नुपर्ने उनको भनाइ थियो ।

‘चितवनमा जस्तै एकताको सन्देश दिनुपर्छ,’ स्थानीय तहमा भरतपुर महानगरपालिकाको उदाहरण दिँदै उनले भने, ‘टिकट पाउने क्रममा प्रतिस्पर्धा हुनु स्वाभाविक हो ।’

प्रकाशित : आश्विन १५, २०७९ १३:४७
प्रतिक्रिया
पठाउनुहोस्

रामेछाप–लुक्ला उडान सुरु

टीकाप्रसाद भट्ट

रामेछाप — निजी क्षेत्रका तीन वटा हवाई कम्पनीले रामेछापबाट सोलुखुम्बुको लुक्ला विमानस्थलका लागि शनिबारदेखि उडान सुरु गरेका छन् । नेपाल नागरिक उड्डयन प्राधिकरणले ती कम्पनीलाई काठमाडौंबाट उडान कटौती गरी रामेछापबाट लुक्कातर्फको उडान गर्न निर्देशन दिएको थियो ।

प्राधिकरणको निर्देशनअनुसार शनिबारदेखि वायुसेवा कम्पनीले रामेछाप–लुक्ला उडान थालेका हुन् । निजी क्षेत्रको तारा, सीता र समिट एयरले रामेछाप–लुक्लाका लागि उडान गर्न शुक्रबार नै केही जहाज रामेछाप विमानस्थलमा रात्रिकालीन पार्किङ गरेका थिए । लुक्लाका लागि उडान हुने सिजन भर अब रामेछाप भएरै उडान गर्ने तालिका ती कम्पनीको छ । त्यसका लागि जहाज र उडानसँग सम्बन्धित सबै कर्मचारीहरूलाई रामेछापमा नै राख्ने व्यवस्था वायुसेवा कम्पनीले मिलाएका छन् ।

रामेछाप विमानस्थल, नागरिक उड्डयन कार्यालयका एटिसी केदार सत्यालका अनुसार शनिबार तारा र समिटका २/२ र सीताको १ गरी ५ वटा जहाजले लुक्लाका लागि यात्रु ओसारेका थिए । काठमाडौंबाट सडक मार्ग हुँदै रामेछाप पुग्ने यात्रुलाई जहाजमा लुक्ला तर्फ लैजाने र त्यस तर्फबाट रामेछाप ओर्लिने यात्रुलाई सडक मार्गबाट काठमाडौं पठाउने गरी प्रबन्ध मिलाइएको छ ।

काठमाडौंबाट बीपी राजमार्ग हुँदै १ सय ३० किलोमिटर दूरीमा रामेछाप विमानस्थल छ । उक्त सडक यात्रा गर्न करिब ४ घण्टा समय लाग्छ । सडक मार्गबाट पुग्ने पर्यटकहरूलाई सोही दिन नै सकभर लुक्लातर्फ पठाउने गरिएको छ ।

त्रिभुवन अन्तर्राष्ट्रिय विमानस्थल काठमाडौंमा उडान र अवतरणका लागि होल्डमा बस्नुपर्ने भएकाले विकल्पको रुपमा रामेछाप विमानस्थललाई प्रयोगमा ल्याइएको हो । काठमाडौंभन्दा रामेछापबाट जहाज उडान गर्दा पर्यटकलाई भनेको समयमा गन्तव्यमा पुर्‍याउन सकिने नेपाल नागरिक उड्डयन प्राधिकरणले जनाएको छ । रामेछापमा उडान र अवतरणका लागि जहाज होल्डमा बस्नु पर्दैन ।

प्रकाशित : आश्विन १५, २०७९ १३:४६
पूरा पढ्नुहोस्
प्रतिक्रिया
पठाउनुहोस्
×