१८.१२°C काठमाडौं
काठमाडौंमा वायुको गुणस्तर: १२४

मर्स्याङ्दीमा खादाको सट्टा फूल

आश गुरुङ

लमजुङ — मर्स्याङ्दी गाउँपालिकाले सार्वजनिक कार्यक्रममा स्वागत गरिँदा प्रयोग गरिने जुनसुकै प्रकारको खादालाई रोक लगाएको छ । धार्मिक तथा व्यक्तिगत कार्यक्रममा भने रोक लगाइएको छैन । खादाको सट्टा फूलमाला प्रयोगमा जोड दिइने गाउँपालिका अध्यक्ष अर्जुन गुरुङले बताए । उनका अनुसार सरकारी पैसाबाट खादा किन्न गतवर्ष नै रोक लगाइएको थियो । 

मर्स्याङ्दीमा खादाको सट्टा फूल

पालिकामा व्यावसायिक रूपमा फूल खेती पनि सुरु भएको छ । केही स्थानीयले मौसमी फूलको खेती थालेका छन् । स्थानीय स्तरमै उत्पादन गरिएका फूललाई प्रवर्द्धन गर्न पनि पालिकाले सार्वजनिक कार्यक्रम, बैठक तथा भेलामा खादा प्रयोगमा रोक लगाएको हो । ‘खादा किन्दा पैसा लाग्छ । त्यो बाहिरबाट ल्याउनुपर्छ । हामीले फूल किन्दा यो रकम स्थानीय व्यवसायीलाई जान्छ । यसले स्थानीयलाई फाइदा पुर्‍याउँछ,’ उनले भने ।

स्थानीयस्तरमा उत्पादित वस्तुको प्रवर्द्धन र बजारीकरण साथै वातावरणीय असर न्यूनीकरण गर्न पालिकाभित्र सार्वजनिक कार्यक्रममा खादा प्रयोगमा प्रतिबन्ध लगाएको प्रमुख प्रशासकीय अधिकृत प्रेमचन्द्र अर्यालले बताए । उनका अनुसार कार्यपालिका बैठकले स्थानीयस्तरमा उत्पादित फूलको प्रयोग, यसको बिक्रीवितरण तथा बजारीकरण गरी आयआर्जनमा वृद्धि र स्थानीय उत्पादनमा प्रोत्साहन गर्ने निर्णयसमेत गरेको छ । आइतबार एक सार्वजनिक सूचना जारी गरी निर्णय कार्यान्वयन गर्न पालिकाले सबै सरोकारवालासँग अपिलसमेत गरेको छ ।

मर्स्याङ्दी कृषि फार्मका प्रवर्द्धक नवीनराज कुइँकेलले पालिकाको निर्णयबाट फूल खेती गर्दै आएका किसानमा उत्साह छाएको बताए । ‘गाउँपालिकाको निर्णयले अब स्थानीयस्तरमा उत्पादित फूलले स्थानीयस्तरमै बजार पाउनेमा ढुक्क छौं,’ उनले भने । उनका अनुसार मर्स्याङ्दी कृषि फार्मले वडा ९ मा ३ रोपनी र भलामचौर मृचे नमुना कृषि फार्मले १० रोपनीमा सयपत्री फूल खेती गरेको छ । दुवै फार्ममा बाह्रै महिना उत्पादन हुने गरी फूल खेती गरिएको उनले बताए ।

दुवै फार्मले गतवर्षबाट फूल खेती गरेको हो । उक्त फूल सदरमुकाम बेंसीसहरका औपचारिक तथा अनौपचारिक कार्यक्रममा समेत प्रयोग हुने गरेको छ । फूलको माग बढ्दै गएको र फूल खेतीले राम्रो बजार लिएको कुइँकेलले दाबी गरे । ‘हामीले खादाको विरोध गरेका होइनौं । तर, खादा किन्ने पैसा फूलमा लगानी गर्दा यसले स्थानीय किसानलाई फाइदा पुग्छ । व्यवसायीकरणमा थप टेवा पुग्छ । वातावरण प्रदूषण हुनबाट रोकिन्छ । पुँजी गाउँमै रहन्छ भन्ने हो,’ उनले भने ।

प्रकाशित : आश्विन १२, २०७९ ११:११
प्रतिक्रिया
पठाउनुहोस्
जनताको राय

त्रिभुवन विश्वविद्यालयमा बारम्बार परीक्षार्थीको उत्तरपुस्तिका हराउने गरेको छ। यसको समाधान कसरी हुन्छ?