हिलो र खाल्टाखुल्टीले मध्यपहाडी लोकमार्गमा सास्ती- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

हिलो र खाल्टाखुल्टीले मध्यपहाडी लोकमार्गमा सास्ती

प्रकाश बराल

बागलुङ — मध्यपहाडी लोकमार्गको बागलुङ घोषबाँधे खण्डमा हिलाम्मे सडकका कारण जोखिम मोलेर यात्रा गर्नुपर्ने बाध्यता छ । समयमा गन्तव्यमा नपुग्ने समस्या एकातर्फ छ भने खाल्डा हिलो र चिप्लो सडकले जोखिम थप बढाएको छ । बागलुङ बजारदेखि बिहुँसम्मको २० किमि सडकखण्डको अवस्था उस्तै जोखिमपूर्ण छ । 


राजधानीदेखि बागलुङ हुँदै पूर्वी र पश्चिम रुकुमसम्मका सवारी पटक-पटक सडकमै फस्दा यात्रुले सास्ती खेपेका हुन् । ‘समयमा गन्तव्यमा पुग्नै सकिएन; गाडी फसेपछि दुई दिनको बाटो पनि तीन दिन लाग्यो’ रुकुमपूर्वका रामबहादुर बुढामगरले भने, ‘दूरी छोटो भनेर मध्यपहाडीको बाटो रोजियो तर दु:ख पाइयो ।’ सडकमा चिया खाने ठाउँसमेत नपाएको यात्रुको गुनासो छ । एक कोसा केराको ३५ रुपैयाँसम्म तिरेर खानु परेको यात्रुहरूले गुनासो गरे । वर्षात्‌मा काम परेर हिँड्दा सधैं जोखिम र सास्ती बेहोर्नुपरेको भन्दै उनीहरूले सडकमा आक्रोशसमेत पोखिरहेका थिए ।

अघिल्लो दिन दिउँसो काठमाडौंबाट छुटेका बस भोलिपल्ट बेलुकी रुकुमको चौरजहारी पुग्ने गरेकोमा लगातार परेको झरी र लोकमार्गको सास्तीले गर्दा तेस्रो दिनमा मात्रै गन्तव्यमा पुग्न सकिएको चालकहरूले बताए । लामो दूरीबाहेक सदरमुकामदेखि गलकोट हुँदै बुर्तिवाङ जाने यात्रुले पनि यो सडकमा दु:ख पाएका छन् । ‘हिलाम्मे सडकमा गाडी जोतिन्छ; न पानीको निकास छ न नाली छ’ चालक ज्योति नेपालीले भने, ‘राष्ट्रिय गौरवको राजमार्गमा दोहोरो गाडी आउँदा साइडसमेत पुग्दैन ।’ उनले ४५ किमि पार गरेर गलकोट पुग्न ५ घण्टा लागेको बताए ।

गलकोट र पश्चिम बागलुङबासी दैनिक रुपमा यस्तो सास्ती बेहर्न बाध्य छन् । ‘समयमा कहिले सदरमुकाम पुग्न सकिँदैन । सानो काम परे पनि उतै बास बस्नुपर्छ’ गलकोट नगरपालिका-७ का थमनबहादुर थापाले भने, ‘कुनैबेला बिहान हिँडेर कार्यालयको काम पनि नभ्याएर उतै बस्न बाध्य छौं ।’ बाटो देखेर यात्रा गर्न डर लाग्ने उनले बताए ।

लोकमार्गको ठेक्का लगाएको दशक बितेपनि यहाँका दुई खण्डमा अहिलेसम्म सडक बनेको छैन । ठेकेदारहरुले पटक-पटक म्याद थपेर काम अलपत्र पारे पनि लोकमार्ग आयोजना कार्यालयले अहिलेसम्म यस विषयमा पहल गरेको छैन । बरु ठेकेदारको पक्षमा कार्यालयका कर्मचारी वकालत गर्न पछि पर्दैनन् । ‘धेरै वर्षात् भएकाले काम गर्न अप्ठ्यारो भएको हो; अब पानी रोकिएपछि गएर हेर्छौं‚’ लोकमार्ग आयोजना कार्यालयका प्रमुख नारायणदत्त भण्डारीले भने, ‘केही गुनासो आएको छ तर म पनि पोखरातिर छु; हेर्न पाएको छैन ।’ केही खण्डमा सडक अप्ठ्यारो भएको गुनासो आएको उनले बताए ।

प्रकाशित : आश्विन ५, २०७९ १८:०३
प्रतिक्रिया
पठाउनुहोस्

दस‌ैंलाई १५ स्थानमा यात्रु सहायता कक्ष

कान्तिपुर संवाददाता

काठमाडौँ — यातायात व्यवस्था विभागका अनुसार नयाँ बसपार्क, बल्खु, कलंकी, कोटेश्वर, गौशाला, चाबहिललगायत १४ स्थानमा यात्रु सहायता कक्ष स्थापना गरिएको छ ।

दसैं-तिहारका बेला यात्रु नठगिउन् भनेर उपत्यकाका विभिन्न स्थानमा यात्रु सहायता कक्ष स्थापना गरिएको छ । चाडपर्व मनाउन घर जाने यात्रुसँग मनपरी भाडा असुल्ने गरेको गुनासा आउने गरेका छन् ।

पूर्व जाने यात्रुलाई मध्यनजर गर्दै यसपटक काभ्रेको साँगामा यात्रु सहायता कक्ष स्थापना गरिएको यातायात व्यवस्था विभागका महानिर्देशक टोकराज पाण्डेले बताए । उनका अनुसार उक्त सहायता कक्षमा ट्राफिक प्रहरी, विभागका कर्मचारी र उपभोक्ता अधिकारकर्मी बसेर यात्रुलाई टिकट काट्नेदेखि घर जानसम्म सहजता प्रदान गर्ने काम गर्ने छन् । टिकट बुकिङकालागि अहिले नयाँ बसपार्क, कलंकी, कोटेश्वर, गौशाला, चाबहिललगायत स्थानका काउन्टरमा यात्रुको भीड छ ।

विभागले यात्रुवाहक सवारीलाई घटस्थापनादेखि पूर्णिमासम्म नेपालभर लागू हुनेगरी रुट परमिट खुल्ला गर्ने निर्णय गत भदौ २२ गते नै गरिसकेको छ । ‘अहिले गाडी भाडा बढेको छैन, पहिला जति गाडी भाडा तोकिएको थियो, त्यही नै कायम छ,’ महानिर्देशक पाण्डेले भने, ‘तोकिएको भन्दा बढी भाडा नतिर्न यात्रुलाई आग्रह गर्छौं, दसैंमा यात्रु ठगिने भएकाले त्यसलाई मध्यनजर गर्दै ठाउँ–ठाउँमा यात्रु सहायता कक्ष स्थापना गरिएको हो ।’ उनले परिचय पत्र लगाएका कर्मचारीसँग मात्र टिकट काट्न यात्रुलाई आग्रह गरेका छन् । साथै, कसैले बढी भाडा लिए यात्रु सहायता कक्षमा रहेका प्रहरी र कर्मचारीलाई खबर गर्न उनले सुझाव दिएका छन् । घटस्थापनापछि उपत्यकाबाट बाहिरिने यात्रुको चाप बढी हुन्छ ।

प्रकाशित : आश्विन ५, २०७९ १७:४५
पूरा पढ्नुहोस्
प्रतिक्रिया
पठाउनुहोस्
x
×