पहिरोले कुलो बगेपछि ढोरपाटन १० दिनदेखि विद्युत्‌विहीन- गण्डकी - कान्तिपुर समाचार

पहिरोले कुलो बगेपछि ढोरपाटन १० दिनदेखि विद्युत्‌विहीन

प्रकाश बराल

बाग्लुङ — अबिरल वर्षातपछि खसेको पहरोले ढोरपाटन नगरपालिका–७ मा विद्युत्‌को कुलो बगाएको छ । कुलो बग्दा यहाँको भुजीखोला लघु जलविद्युत् आयोजनाको कुलो बगाएको हो ।

१ सय किलोवाट क्षमताको विद्युत्‌को कुलो बग्दा वडा नंं ७ का ३ सय ५० घरले बिजुली बाल्न पाएका छैनन् । अन्धकारमा बस्नु पर्दा उनीहरुको दैनिकी कष्टकर भएको स्थानीयले गुनासो गरे । ‘बिजुली नभएपछि बालबालिकाले पढ्न लेख्न पाएका छैनन्, गृहकार्य दिएपनि बिहान बेलुकी अँध्यारो हुँदा त्यसै आएका छन्,’ ज्ञानोदय माविका प्रधानाध्यापक यामबहादुर कायतले भने, ‘मोबाइल समेत चार्ज गर्न सकिएको छैन ।’ चाडपर्वको बेला देश–विदेशमा बसेका आफन्तलाई सम्पर्क गर्न समेत नसकिएको उनले गुनासो गरे ।

ढोरपाटन नगरपालिकाको वडा नं. ५, ६, ७, ८ र ९ मा अहिले पनि राष्ट्रिय प्रसारण लाइनको बिजुली पुगेको छैन । गाउँलेकै चन्दाको भरमा दशकअघि बनेको यो लघु विद्युत्‌को भरमा स्थानीयले कुटानी पिसानी तथा विद्यालयमा कम्प्युटर कक्षा समेत चलाएका थिए । ‘भत्के/बिग्रेको काम पनि चन्दा उठाएरै गरिरहेका थियौं, अहिले त पहिरो खसेर बर्बादै बनायो,’ नगरपालिकाका उपप्रमुख धनबहादुर कायतले भने, ‘चापपर्वमा बत्ती समेत नभए कसरी खुसी हुने ?’ कायतले स्थानीय युवाहरु परिचालन गरेर अस्थायी रुपमा पानी चलाउने प्रयास भएको बताए ।

भुजी खोलाको पानीबाट निकालिएको विद्युत्‌को झन्डै २० मिटर खण्ड कुलो पहिरोले बगाएको हो । बगेको पहिरो तीन सय मीटर उचाइको छ । भीरमा गएर काम गर्न समेत कठिन भएपछि स्थानीयले जस्तापाता र पाइपबाट पानी कटाएर कुलो चलाउने प्रयास गरिरहेको कायतले जानकारी दिए । दिगो व्यवस्थापनका लागि भने स्थानीयले नगरपालिकामा सहयोग मागेका छन् । वर्षात नरोकिएकोले तत्काल दिगो व्यवस्थापन गर्न नसकिने अवस्था देखिएको उनले बताए । ‘पहिरो अझै खस्ने जस्तो देखियो, त्यसैले मौसम सुख्खा भएपछि मात्रै धेरै लगानी गर्ने लक्ष राखिएको छ,’ कायतले भने, ‘अस्थायी रुपमा पानी चलाउन पनि स्थानीयको १० लाख बढी खर्च हुने भयो ।’

प्रकाशित : आश्विन ४, २०७९ १२:४१
प्रतिक्रिया
पठाउनुहोस्

तीन महिनादेखि सडकमा सास्ती

प्रकाश बराल

बागलुङ — गत असारमा खसेको पहिरोले बन्द भएको बागलुङको मालढुंगादेखि कुश्मीसेरा जाने सडक भदौ पहिलो सातामा अस्थायी रुपमा तीन दिन खुल्यो ।

भदौ ७ गतेको वर्षात्‌ले गर्दा सडक फेरि अवरुद्ध भयो । त्यसपछि अझैिसम्म कहिले खुल्ने भन्नेबारे निश्चित छैन । गलुवा भन्ने स्थानमा खसेको पहिरोले गर्दा चार वर्षअघि कालोपत्रे गरिएको यो सडक हरेक वर्ष तीन महिनासम्म अवरुद्ध हुने गरेको छ । अघिल्लो वर्षदेखि खस्न थालेको पहिरोले गत वर्ष पनि तीन महिना सवारी चल्न सकेनन् । यो वर्ष पनि असारदेखि सञ्चालनमा आउन नसकेको यो सडक कहिले खुल्छ भन्ने अन्योल हुँदा दक्षिण बागलुङबासीले सास्ती खेपेका छन् ।

खुल्दा पनि अस्थायी ट्य्राकमा जोखिम मोलेरै यात्रा गर्नुपर्ने बाध्यता छ । यहाँको पहिरोले मालढुंगा कुश्मीसेरा सडक खण्डको दुईवटा घुम्ती पूरै बगेको छ । सडक भित्ताको तारजालीसमेत बगेपछि सडकको नयाँ ट्य्राक खोल्नै सास्ती हुने भएको हो । झन्डै ५० मिटर चौडाको दुईवटा घुम्ती बग्दा पैदलयात्री पनि हिँड्न नसकी पर्वतको कुश्मादेखि घुमाउरो बाटो हिँड्न बाध्य छन् ।

पहिरोले करिडोरमा समेत जोखिम बढाएको छ । दैनिक उपभोग्य सामग्री ढुवानीदेखि बिरामी बोक्ने एम्बुलेन्स पनि हिँडाउन नसकेपछि बागलुङको बलेवा क्षेत्र, जैमिनी नगरपालिका र बरेङ गाउँपालिकाबासीले सास्ती खेपेका हुन् । बलेवा क्षेत्रका विद्यार्थी र शिक्षकसमेत आफ्नै सवारी साधन भएर पनि पैदलै हिँड्न बाध्य छन् । ‘घरैसम्म कालोपत्रे सडक छ तर आफ्नो सवारी सदरमुकाममै छाडेर पैदल यात्रा गर्न बाध्य छौं‚’ बागलुङ नगरपालिका-१३ का बालकृष्ण शर्माले भने, ‘यो सास्ती कहिलेसम्म ?’ बिरामी भएकी आमालाई बोकाएर अस्पताल लाने ल्याउने गर्न बाध्य भएको उनले गुनासो गरे ।

यो सडकको विकल्पको रुपमा रहेको कालीगण्डकी करिडोरसमेत पटक पटक अवरुद्ध भैरहेको छ । पानी पर्दा निरन्तर ढुंगा खस्ने समस्याले करिडोरको बाटो सवारी चल्न सकेका छैनन् । गलुवादेखि नेपानेतर्फको भीरमा निरन्तर ढुंगा खस्ने समस्या हुँदा विकल्पको बाटो पनि प्रयोग गर्न नसकिएको बागलुङ नगरपालिका- १४ का अध्यक्ष चक्रबहादुर खत्रीले बताए ।

तीन वर्षअघि गलुवादेखि भकुण्डे जाने नयाँ ट्रयाक खोल्ने क्रममा खसेको पहिरो अहिले बस्ती र सयौं रोपनी खेतसमेत बगाएको छ । यहाँका चार घर विस्थापित भैसकेका छन् भने कतिपय घरगोठ जोखिममा छन् ।

गत वर्ष दसैँमा पनि बागलुङ नगरपालिकाले २० लाख रुपैयाँ खर्चेर सडकको ट्य्राक खोलेको थियो । उक्त ट्य्राकमा हिउँदमा समेत जोखिम थियो । ‘पानी पर्नासाथ पहिरो खस्छ, सडक त बँच्दै बँच्दैन‚’ स्थानीय उमाकान्त रिजालले भने, ‘घर जाने छोटो बाटो छाडेर घुमाउरो हिँडेका छौं ।’

लाखौं खर्चेर पनि सडक बनाउन कठिन हुने उनले बताए । बागलुङ नगरपालिकाले दसैँका लागि सडकको अस्थायी ट्य्राक खोल्ने पहल गरेको प्रमुख प्रशासकीय अधिकृत पुरुषोत्तम सापकोटाले बताए । ‘जनताले चाडपर्वमा घर जान पाउनुपर्छ भनेर केही खर्चेर अस्थायी ट्य्राक बनाउन खोजेका छौं‚’ सापकोटाले भने, ‘त्यसका लागि पनि ५ लाख खर्च होला ।’

स्थायी संरचना बनाउनुपरेमा करोडौं खर्च लाग्ने उनले बताए । पहिरो संरक्षणका लागि भने बिरुवा रोप्ने काम नगरपालिकाले गर्ने भन्दै उनले यो पहिरो पन्छाएर सडक सडक सञ्चालन गर्ने जिम्मा सडक डिभिजनको भएको बताए ।

प्रकाशित : भाद्र ३०, २०७९ १५:०६
पूरा पढ्नुहोस्
प्रतिक्रिया
पठाउनुहोस्
×