‘उल्लेख्य काम गर्न सकिएन’- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

‘उल्लेख्य काम गर्न सकिएन’

प्रतीक्षा काफ्ले

कास्की — गण्डकी प्रदेशसभाको पहिलो कार्यकालका सांसदहरूले उल्लेख्य रूपमा काम गर्न नसकिएको बताएका छन् । एकापसमा आरोप–प्रत्यारोपले पनि काम गर्न नसकिएको उनीहरूको भनाइ थियो । कांग्रेसका निवर्तमान सांसद एवं संसदीय दलका प्रवक्ता प्रकाशचन्द्र दवाडीले ५ वर्षसम्म सोचेजस्तो काम गर्न नसकिएको बताए ।


‘साढे ३ वर्ष प्रतिपक्षमै बसेर काम गरियो’, उनले भने, ‘सरकारमा नभएपछि सोचेअनुसार काम हुने कुरै भएन । त्यसपछिका डेढ वर्ष सरकारमा गइयो तर हामीबीचकै साथीहरू एकापसमा आरोप–प्रत्यारोप गर्न थाल्नुभयो । आपसी मनमुटाबले काममा तगारो बन्यो ।’

उनले आफ्ना अधुरा काम पूरा गर्नको लागि पुनः प्रदेशसभा सदस्यको उम्मेदवार हुने बताए । प्रदेशसभा सदस्यको ५ वर्षे (पहिलो) कार्यकाल शनिबार मध्यरातदेखि सकिएको हो । संघीयता कार्यान्वयनसँगै स्थापित भएको प्रदेश संरचना भएकाले पहिलो कार्यकाल सिकाइमै बितेको उनीहरूको भनाइ छ । भन्छन्, ‘सपना ठूलो राखिएछ त्यसैले धेरै काम अधुरा रहे ।’

आफ्नो कार्यकाल सकिएपछि अधिकांश निवर्तमान सांसद सामाजिक सञ्जाल (फेसबुक) मा स्टाटस राख्दै आफ्नो निर्वाचन क्षेत्र र मतदातालाई धन्यवाद दिएका छन् । सिकाइका बाबजुद पनि पहिलो कार्यकाल सन्तोषजनक रहेको उनीहरूको दाबी छ ।

सुरुका वर्ष कानुन निर्माणमा नै बितेको पूर्वसांसद भागवतप्रकाश मल्लले बताए । स्याङ्जा क्षेत्र नम्बर २ को ‘ख’ बाट गण्डकी प्रदेशसभामा सहभागी हुँदै गर्दा यहाँका जनताका समस्या संसद्मा बोल्न पाएको र सरकारका तर्फबाट धेरथोर मल्हम लगाउन सकिएको बताए । ‘मेरो निर्वाचन क्षेत्र जिल्लाकै पश्चिम अर्थात दुर्गम हो,’ उनले भने, ‘प्रदेशसभा हुनाले नै यहाँका जनताका आवाज छिटो सुनियो । थोरैधेरै सम्बोधन भए । तर, धेरै काम बाँकी नै छ । दुर्गम भएकाले सोचेअनुसार काम हुन सकेन ।’ उनले जनताका दुःखमा ५ वर्षसम्म नजिक बसेर काम गर्दा आफूलाई पनि जिम्मेवारी महसुस भएको बताएका छन् । प्रदेश सरकार भएकै कारण जनताले विकासमा पनि नजिकबाट नियाल्न पाएको उनीहरूको भनाइ छ । उनले भने, ‘संसद विघटन, सरकार परिवर्तन, गठबन्धनका नयाँ सरकार धेरै बुझ्ने र सिक्ने अवसर पनि पाए । तर, समय छोटो त्यसैमाथि सरकार उथलपुथलले गर्दा सोचे अनुसार काम हुन सकेन ।’ उनले देखिने गरी काम गर्न नसकिएको बताए । गठबन्धनभित्र भए पनि ठूलो दुई पार्टीका मन्त्रीको द्वन्द्वले आफूले विकास निर्माणमा राम्रोसँग अनुभव लिन नपाएको गुनासो उनको छ । ‘मन्त्रीहरूबीचको द्वन्द्व असर सांसदलाई पर्‍यो,’ उनले भने, ‘नेतृत्व तहले नबुझ्दा समस्या भएको हो ।’

समानुपातिकबाट प्रतिनिधित्व गरेकी पूर्वसांसद दीपा रोका मगरले पनि जनताले प्रदेशलाई नजिकबाट बुझ्ने अवसर पाएको बताइन् । ‘प्रदेश सरकार जनतासँग बढी ठोकियो,’ उनले भनिन, ‘म सांसद भइरहँदा पनि आफ्नो निर्वाचन क्षेत्रबाट कहिलै टाढा भइन् । यहाँका दुःख संसदमा लगेर पोखे । जतिसक्दो सम्बोधन गरेकी छु ।’

उनले समानुपातिक सांसद भइरहँदा सरकार र प्रत्यक्ष निर्वाचित सांसदबाट भने हेपिएको महसुस गरेकी छन् । सभामुख नेत्रनाथ अधिकारी ५ वर्षको अन्तरालमा आगामी पुस्ताले सम्झनलायक गरी काम गरिएको दाबी गरे । ‘ऐन कानुन निर्माण र कार्यान्वयन नै मुख्य उपलब्धि रह्यो,’ अधिकारीले भने, ‘सांसद भएको छोटो समयमा प्रदेशको नाम र राजधानी तय गर्न पनि सफल भयौं । सरकारले ल्याएका विधेयक सहमति र सर्वसम्मत पारित गरेका छौं । यही नै हाम्रा उपलब्धि हुन् ।’ उनले सरकार परिवर्तन हुँदा पर्ने असर, राष्ट्रिय राजनीतिको असरबाट पनि प्रदेश अछुतो नरहेको बताए । प्रदेशसभाको बैठकबाट पारित भएका विधेयकमध्ये जनप्रतिनिधिको सेवासुविधाको विधेयकबाटै सर्वोच्च अदालतबाट खारेज भए पनि अन्य विधेयक समय सापेक्ष र जनताको माग अनुसार आएको उनले बताएका छन् ।

प्रकाशित : आश्विन ४, २०७९ ११:४३
प्रतिक्रिया
पठाउनुहोस्

‘प्रज्ञा नेपाली बृहत् शब्दकोश’ सार्वजनिक

कान्तिपुर संवाददाता

काठमाडौँ — नेपाल प्रज्ञा प्रतिष्ठानले ‘प्रज्ञा नेपाली बृहत् शब्दकोश’ प्रकाशित गरेको छ । उक्त कोश राष्ट्रपति विद्यादेवी भण्डारीले राजधानीमा आयोजित एक समारोहमा सार्वजनिक गरेकी हुन् । प्रतिष्ठानले पहिलो पटक २०१९ सालमा ‘नेपाली शब्दकोश’ प्रकाशित गरेको थियो । त्यसपछि उक्त कोशलाई लिएर २०४० सालमा ‘नेपाली बृहत् शब्दकोश’ को पहिलो संस्करण प्रकाशित गरेको थियो ।

उक्त शब्दकोश २०७५ सालसम्म दसौं संस्करण प्रकाशित थियो । प्रतिष्ठानले सोही कोशलाई पहिलो संस्करणका रूपमा ‘प्रज्ञा नेपाली बृहत् शब्दकोश’ (२०७९) प्रकाशित गरेको हो ।

प्रतिष्ठानका कुलपति गंगाप्रसाद उप्रेती प्रधान सम्पादक, विशेष सम्पादकमा चूडामणि बन्धु, माधवप्रसाद पोखरेल, तुलसीप्रसाद भट्टराई, जगतप्रसाद उपाध्याय र हेमनाथ पौडेल तथा सम्पादक यज्ञश्वर निरौला छन् । यो संस्करणमा १ लाख ३० हजार मूल शब्दसहित प्रकाशनमा ल्याएको जनाएको छ । कुलपति उप्रेतीका अनुसार मुलुकभित्रका विभिनन मातृभाषाका प्रचलित शब्दहरू, नेपाली भाषाको भाषिका तथा मुलुक बाहिर बोलिने नेपाली भाषाका शब्दसमेत समेटिएका छन् ।

‘विशेष गरी मुलुकका मातृभाषा, नेपाली भाषाकै विभिन्न भाषिका तथा मुलुकबाहिर नेपालीभाषी रहेका ठाउँका प्रचलनमा रहेका भाषाहरूसँगको संसर्गले नेपाली भाषाले आर्जन गरेका शब्दहरू समेटिएका छन्,’ करिब बाह्र वर्षको प्रयासमा कोश नयाँ संस्करण प्रकाशनमा आएको उल्लेख गर्दै कुलपति उप्रेतीले भने, ‘अझै पनि सोचेजति प्राविधिक शब्दहरू समेट्न सकिएको छैन ।’ विगतको भन्दा ठूलो आकारमा २ हजार २८ पानाको रहेको छ । कोशलाई मोबाइल एपमा राखिने र प्रयोगकर्ताले न्युनतम शुल्क बुझाएर हेर्न मिल्ने व्यवस्था गरिएको समेत जनाए ।

प्रकाशित : आश्विन ४, २०७९ ११:४२
पूरा पढ्नुहोस्
प्रतिक्रिया
पठाउनुहोस्
×