तीन महिनादेखि सडकमा सास्ती- गण्डकी - कान्तिपुर समाचार

तीन महिनादेखि सडकमा सास्ती

प्रकाश बराल

बागलुङ — गत असारमा खसेको पहिरोले बन्द भएको बागलुङको मालढुंगादेखि कुश्मीसेरा जाने सडक भदौ पहिलो सातामा अस्थायी रुपमा तीन दिन खुल्यो ।

भदौ ७ गतेको वर्षात्‌ले गर्दा सडक फेरि अवरुद्ध भयो । त्यसपछि अझैिसम्म कहिले खुल्ने भन्नेबारे निश्चित छैन । गलुवा भन्ने स्थानमा खसेको पहिरोले गर्दा चार वर्षअघि कालोपत्रे गरिएको यो सडक हरेक वर्ष तीन महिनासम्म अवरुद्ध हुने गरेको छ । अघिल्लो वर्षदेखि खस्न थालेको पहिरोले गत वर्ष पनि तीन महिना सवारी चल्न सकेनन् । यो वर्ष पनि असारदेखि सञ्चालनमा आउन नसकेको यो सडक कहिले खुल्छ भन्ने अन्योल हुँदा दक्षिण बागलुङबासीले सास्ती खेपेका छन् ।

खुल्दा पनि अस्थायी ट्य्राकमा जोखिम मोलेरै यात्रा गर्नुपर्ने बाध्यता छ । यहाँको पहिरोले मालढुंगा कुश्मीसेरा सडक खण्डको दुईवटा घुम्ती पूरै बगेको छ । सडक भित्ताको तारजालीसमेत बगेपछि सडकको नयाँ ट्य्राक खोल्नै सास्ती हुने भएको हो । झन्डै ५० मिटर चौडाको दुईवटा घुम्ती बग्दा पैदलयात्री पनि हिँड्न नसकी पर्वतको कुश्मादेखि घुमाउरो बाटो हिँड्न बाध्य छन् ।

पहिरोले करिडोरमा समेत जोखिम बढाएको छ । दैनिक उपभोग्य सामग्री ढुवानीदेखि बिरामी बोक्ने एम्बुलेन्स पनि हिँडाउन नसकेपछि बागलुङको बलेवा क्षेत्र, जैमिनी नगरपालिका र बरेङ गाउँपालिकाबासीले सास्ती खेपेका हुन् । बलेवा क्षेत्रका विद्यार्थी र शिक्षकसमेत आफ्नै सवारी साधन भएर पनि पैदलै हिँड्न बाध्य छन् । ‘घरैसम्म कालोपत्रे सडक छ तर आफ्नो सवारी सदरमुकाममै छाडेर पैदल यात्रा गर्न बाध्य छौं‚’ बागलुङ नगरपालिका-१३ का बालकृष्ण शर्माले भने, ‘यो सास्ती कहिलेसम्म ?’ बिरामी भएकी आमालाई बोकाएर अस्पताल लाने ल्याउने गर्न बाध्य भएको उनले गुनासो गरे ।

यो सडकको विकल्पको रुपमा रहेको कालीगण्डकी करिडोरसमेत पटक पटक अवरुद्ध भैरहेको छ । पानी पर्दा निरन्तर ढुंगा खस्ने समस्याले करिडोरको बाटो सवारी चल्न सकेका छैनन् । गलुवादेखि नेपानेतर्फको भीरमा निरन्तर ढुंगा खस्ने समस्या हुँदा विकल्पको बाटो पनि प्रयोग गर्न नसकिएको बागलुङ नगरपालिका- १४ का अध्यक्ष चक्रबहादुर खत्रीले बताए ।

तीन वर्षअघि गलुवादेखि भकुण्डे जाने नयाँ ट्रयाक खोल्ने क्रममा खसेको पहिरो अहिले बस्ती र सयौं रोपनी खेतसमेत बगाएको छ । यहाँका चार घर विस्थापित भैसकेका छन् भने कतिपय घरगोठ जोखिममा छन् ।

गत वर्ष दसैँमा पनि बागलुङ नगरपालिकाले २० लाख रुपैयाँ खर्चेर सडकको ट्य्राक खोलेको थियो । उक्त ट्य्राकमा हिउँदमा समेत जोखिम थियो । ‘पानी पर्नासाथ पहिरो खस्छ, सडक त बँच्दै बँच्दैन‚’ स्थानीय उमाकान्त रिजालले भने, ‘घर जाने छोटो बाटो छाडेर घुमाउरो हिँडेका छौं ।’

लाखौं खर्चेर पनि सडक बनाउन कठिन हुने उनले बताए । बागलुङ नगरपालिकाले दसैँका लागि सडकको अस्थायी ट्य्राक खोल्ने पहल गरेको प्रमुख प्रशासकीय अधिकृत पुरुषोत्तम सापकोटाले बताए । ‘जनताले चाडपर्वमा घर जान पाउनुपर्छ भनेर केही खर्चेर अस्थायी ट्य्राक बनाउन खोजेका छौं‚’ सापकोटाले भने, ‘त्यसका लागि पनि ५ लाख खर्च होला ।’

स्थायी संरचना बनाउनुपरेमा करोडौं खर्च लाग्ने उनले बताए । पहिरो संरक्षणका लागि भने बिरुवा रोप्ने काम नगरपालिकाले गर्ने भन्दै उनले यो पहिरो पन्छाएर सडक सडक सञ्चालन गर्ने जिम्मा सडक डिभिजनको भएको बताए ।

प्रकाशित : भाद्र ३०, २०७९ १५:०६
प्रतिक्रिया
पठाउनुहोस्

बल्ल बन्दै वडा र स्वास्थ्य चौकी

प्रकाश बराल

बागलुङ — बागलुङ नगरपालिका-७ कालीमाटीमा चालु वर्षभित्रै सक्ने गरी स्वास्थ्य कार्यालय र वडा भवन बन्ने भएको छ । दाताले जग्गा दिएपछि मात्रै वडा र स्वास्थ्य चौकी बन्न लागेको हो । 

पूर्वशिक्षक ८२ वर्षीय मेघराज पाण्डेयले ४ रोपनी जमिन दिएपछि कालीमाटीमा स्वास्थ्य चौकी भवन निर्माण सुरु भएको छ । सडकले नछोएको र पुरानो भवनमा सञ्चालित स्वास्थ्य चौकी पायक नपरेपछि नगरपालिकाले चालु वर्ष भवन बनाउन लागेको हो ।

बिरामीलाई लैजानै सास्ती हुने ठाउँको जीर्ण भवनमा स्वास्थ्य चौकी छ । यहाँ समस्यामा परेका बिरामी लैजानुपर्दा बोकाएर मात्रै पुर्‍याउन सकिन्छ । भिरालो र साँघुरो भएकाले स्ट्रेचरमा बोकाएर लैजानसमेत समस्या परेको स्थानीयले बताए ।

‘बिरामी पर्दा स्वास्थ्य चौकी पुग्नुभन्दा गाडी खोजेर सदरमुकाम कुद्न सजिलो थियो‚’ स्थानीय शारदा सापकोटाले भनिन्, ‘सडक अभावले बिरामीले दु:ख पाएका थिए ।’ पुरानो भवनमा उपकरण समेत नहुँदा सेवा बढाउनसमेत नसकिएको स्वास्थ्यचौकीका प्रमुख महेन्द्र शर्माले बताए ।

आगामी २०८० को जेठसम्ममा भवन बनाइसक्नुपर्ने सम्झौता छ । जुम्ली निर्माण सेवा प्रालिले १ करोड ७० लाख ५६ हजार रुपैयाँमा भवन निर्माणको जिम्मा लिएको वडाध्यक्ष मेघनाथ गैरेले बताए ।

पुरानो भवनमा शौचालयदेखि प्रशासनिक र उपचार सेवा दिनसमेत अप्ठ्यारो थियो । नयाँ बन्ने भवनमा स्वास्थ्यकर्मीको आवाससहित शौचालय, खानेपानी र आकस्मिक सेवा समेतको व्यवस्था हुनेछ । ‘सडकबाट बिरामी बोकेर ल्याउनै कठिन स्थानमा भवन छ; त्यसैले धेरै सास्ती थियो‚’ स्वास्थ्य चौकीका प्रमुख महेन्द्र शर्माले भने, ‘नयाँ भवन बनेपछि जनताले दु:ख पाउन पर्दैन ।’

केही समयमा वडा र स्वास्थ्य चौकी भवन निर्माण कार्य पूरा भयो भने आधारभूत सेवा सहजै दिन सकिने उनले बताए । गत साता एकीकृत घुम्ती शिविर सञ्चालन गर्दा भवन अभावमा विद्यालय बन्द गरेर सेवा दिनु परेको थियो । यो वडा कार्यालय सदरमुकामदेखि ८ किमि पश्चिममा पर्छ ।

प्रकाशित : भाद्र २९, २०७९ १२:२४
पूरा पढ्नुहोस्
प्रतिक्रिया
पठाउनुहोस्
×