कोरोना संक्रमण बढेपछि भिमसेन थापा गाउँपालिकाका ५ विद्यालय बन्द- गण्डकी - कान्तिपुर समाचार

कोरोना संक्रमण बढेपछि भिमसेन थापा गाउँपालिकाका ५ विद्यालय बन्द

गोरखा जिल्लाभर सक्रिय संक्रमित ८३ पुगे
हरिराम उप्रेती

गोरखा — कोरोना संक्रमण फैलिएपछि भिमसेन थापा गाउँपालिकाका ५ वटा विद्यालयको पठनपाठन बन्द गरिएको छ । भिमसेन थापा गाउँपालिका–१ को दुल्लभ मावि घ्याम्पेसाल, विन्द्रवती मावि, कनकामना आधारभूत विद्यालय, चण्डेश्वरी आधारभूत विद्यालय र वडा नम्रब ६ को नवजागृती चण्डी मावि अश्राङको पठनपाठन बन्द गरिएको हो ।

एन्टिजेन विधिबाट गरिएको परीक्षणमा पाँच विद्यालयका ३८ जना विद्यार्थीमा कोरोना संक्रमण पुष्टि भएको थियो । कोरोना जाखिम न्यूनिकरणका लागि स्वास्थ्यकर्मीको सुझाव अनुसार विद्यालय व्यवस्थापन समितिबाट निर्णय गराएर विद्यालय बन्द गरिएको हो । दुल्लभ माविमा ६४ जनामा गरिएको परीक्षण गरिएकोमा १४ जनामा कोरोना संक्रमण पुष्टि भएको गाउँपालिकाका स्वास्थ्य शाखा प्रमुख भेषराज खनालले बताए ।

त्यस्तै बिन्द्रवतीको ५० जनामा कोरोना परीक्षण गर्दा ७ जना, कनकामना आधारभूत विद्यालयको ४० जनाको कोरोना परीक्षण गर्दा दुइ जना, चण्डेश्वरी आधारभूत विद्यालयको ३३ जनाको कोरोना परीक्षण गर्दा ५ जनामा संक्रमण पुष्टि भएको छ । त्यस्तै नवजागृति चण्डी मावि अश्राङमा ५६ जनाको कोरोना परीक्षण गर्दा १० जनामा संक्रमण पुष्टि भएको खनालले बताए । ‘सामान्य रुघाखोकीको लक्षण देखिएपछि कोरोना परीक्षण गरेका हौँ,’ उनले भने ।

संक्रमण पुष्टि भएकाहरूको स्वास्थ्य अवस्था सामान्य रहेको पनि उनले बताए । भिमसेन थापा गाउँपालिकामा मात्र कोरोना संक्रमितको संख्या ४१ पुगेको छ ।

जिल्लाभर हाल ८३ जना सक्रिय संक्रमित छन् । गोरखा नगरपालिकामा ५ जना, पालुङटार नगरपालिकामा ७ जना, सहिद लखन गाउँपालिकामा १ जना, अजिरकोट गाउँपालिकामा १३ जना, सिरानचोक गाउँपालिकामा ८ जना, आरुघाट गाउँपालिकामा ७ जना र धार्चे गाउँपालिकामा १ जना सक्रिय संक्रिमित रहेको स्वास्थ्य कार्यालयको अभिलेखमा छ । साउन महिनामा मात्र ६ सय ३७ जनाको कोरोना परीक्षण गर्दा १ सय ४१ जनामा संक्रमण पुष्टि भइसकेको छ । तीमध्ये ५८ जना संक्रमणमुक्त भएका छन् ।

प्रकाशित : श्रावण ३०, २०७९ २०:३६
प्रतिक्रिया
पठाउनुहोस्

राप्तीसोनारीले सुरु गर्‍यो स्थानीय पाठ्यक्रम

रुपा गहतराज

नेपालगन्ज — बाँकेको राप्तीसोनारी गाउँपालिकाले स्थानीय स्तरका विषयवस्तु समावेश गरी विद्यालयमा नियमित पठनपाठन गर्ने उद्देश्यले स्थानीय पाठ्यक्रम तयार गरेको छ ।

पालिकाभित्रका कक्षा १ देखि ८ सम्मका सबै विद्यालयमा स्थानीय पाठ्यक्रम लागू गरिएको हो । राप्तीसोनारी गाउँपालिकाको ५४ विद्यालयमा आधारभूत तहको स्थानीय पाठ्यक्रम लागू भएको हो ।

‘हाम्रो राप्तीसोनारी’ पाठ्यक्रममा हाम्रा संस्कृति र सम्पदा, हाम्रो पेसा व्यवसाय र प्रविधि, हाम्रो वातावरण, हाम्रो राप्तीसोनारीको परिचय, खुसीका लागि शिक्षा, जीवनोपयोगी सीप र विपद् व्यवस्थापनसहित गाउँपालिकाको विशेषता'लाई उच्च प्राथमिकता राखिएको छ ।

‘हाम्रो राप्तीसोनारी’ नयाँ शैक्षिक सत्रदेखि लागू भएको गाउँपालिकाका अध्यक्ष तप्त पौडेलले बताए । 'पाठ्यक्रममा विशेषगरी गाउँपालिका क्षेत्रको सेरोफेरोलाई समेट्ने प्रयास गरेका छौं,’ अध्यक्ष पौडेलले भने,‘जनप्रतिनिधि निर्वाचित हुनुअघि नै उक्त पाठ्यक्रम तयार भएकाले त्यसलाई अहिले लागू गरिएको हो।’

विभिन्न सात विषय समेटेर निर्माण गरिएको पाठ्यक्रम राप्तीसोनारीका सबै आधारभूत विद्यालयमा लागू गरिएको गाउँपालिकाका शिक्षा शाखा प्रमुख जीवन न्यौपानेले बताए । ‘अहिले पाठ्यक्रम मात्रै हो तर हामीले पाठ्यपुस्तकको पनि तयारी थालेका छौं’, शिक्षा शाखा प्रमुख न्यौपानेले भने, ‘कक्षा, ६, ७ र ८ को लागि पाठ्यपुस्तक बनाउने र आधारभूत तहका लागि स्रोत पुस्तकको रुपमा रहने छन्।’

गत वैशाखमा पाठ्यक्रम विकास केन्द्रका पाठ्यक्रम विशेषज्ञ युवराज अधिकारी र शिक्षा केन्द्र, विज्ञान तथा प्रविधि मन्त्रालयका पूर्वउपसचिव जितबहादुर शाहको प्राविधिक सहयोग तथा गाउँपालिका शिक्षा शाखाका प्रमुख जीवन न्यौपानेको संयोजकत्वमा ३० सदस्यीय समिति निर्माण भएको थियो। सो समितिले ६ महिनाको अवधिमा पाठ्यक्रम तयार गरेको हो।

प्रकाशित : श्रावण ३०, २०७९ २०:२९
पूरा पढ्नुहोस्
प्रतिक्रिया
पठाउनुहोस्
x
×