एटीएम मेसिन फोर्दै गर्दा युवा पक्राउ
कास्की — पोखरा महानगरपालिका–१७ विरौटमा रहेका एनआईएसिया बैंकको एटीएम मेसिन फोर्दै गरेको अवस्थामा युवा पक्राउ परेका छन् । कास्की प्रहरीले पवर्तको कुश्मा नगरपालिका–३ का २३ वर्षीय कृष्णबहादुर विकलाई शुक्रबार राति पक्राउ गरेको हो ।
मेसिन फोरेर रुपैयाँ चोरी हुँदै गरेको सूचना आएपछि प्रहरीले तत्कालै पक्राउ गरेको जनाएको छ ।
विकलाई जिल्ला अदालत कास्कीमा आइतबार चोरी उद्योग कसूर शीर्षकमा मुद्दा दर्ता गरी ७ दिनको म्याद थप गरिएको जिल्ला प्रहरी प्रवक्ता डीएसपी सुन्दर तिवारीले बताए । उनका अनुसार कृष्णबहादुर विक यसभन्दा अघि माछापुच्छ्रे बैंकको एटीएम मेसिन फोर्दै गरेको अवस्थामा पक्राउ परेका थिए ।
चोरी उद्योग मुद्दामा कास्की जिल्ला अदालतले एक लाख रुपैयाँ धरौटी माग गरेको थियो । धरौटी तिर्न नसक्दा पुर्पक्षका लागि थुनामा गएका विक पछि अदालतबाट मुद्दा फैसला हुँदा तोकिएको कैद भुक्तानी गरी छुटेको अभिलेखमा देखिएको छ ।
प्रकाशित : श्रावण २२, २०७९ २२:१०