विद्यार्थीलाई शशांकको सुझाव : पढाइ सकेपछि मात्रै राजनीतिमा लाग्नुपर्छ- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

विद्यार्थीलाई शशांकको सुझाव : पढाइ सकेपछि मात्रै राजनीतिमा लाग्नुपर्छ

नारायण शर्मा

पूर्वी नवलपरासी — नेपाली कांग्रेसका नेता डा शशांक कोइरालाले विद्यार्थीले पढाइ नसकेसम्म राजनीतिमा प्रवेश गर्न नहुने बताएका छन् ।

विद्यार्थीले राजनीति गर्ने होइन भन्ने कुरा आफूले कांग्रेसका नेता बीपी कोइरालाबाट सिकेको उनको भनाइ थियो । 'विद्यार्थीले राजनीति गर्ने होइन भन्ने कुरा मैले बीपी कोइरालाबाट सिकेको हो । पहिले पढ्ने अनि पढाइमा उत्कृष्ट बनेपछि मात्र राजनीतिमा लाग्नुपर्छ,' कोइरालाले भने ।

यसपटकको एसईई परीक्षा उत्तीर्ण विद्यार्थीलाई गैंडाकोटमा शनिबार आयोजित सम्मान कार्यक्रममा डा. कोइरालाले यस्तो बताएका हुन् । विद्यालय राजनीति गर्ने ठाउँ नभएको भन्दै पहिला विद्यार्थीहरू पढाइमा दक्ष हुन जरुरी रहेको सुझाव दिए।

आफूले पनि विद्यार्थी जीवनमा राजनीति नगरेको स्मरण गर्दै नेता कोइरालाले भने, 'मैले पहिला पढाइलाई उत्कृष्ट गराएँ । त्यसपछि राजनीतिमा लागेँ । अहिले पनि म राजनीतिमा उत्कृष्ट नै छु जस्तो लाग्छ ।'

यस सन्दर्भमा उनले जसले जे काम गर्छ त्यसलाई उत्कृष्ट बनाउनुपर्ने दायित्व पनि उसैको हुने भन्दै विद्यार्थीहरूलाई उनले पढाइमा अब्बल हुनुपर्ने सुझाव दिएका थिए ।

एसईई सकेका विद्यार्थीलाई बधाइ तथा सम्मान दिँदै कोइरालले पहिला पढाइलाई उत्कृष्ट गराएर मात्र राजनीतिमा आउन पटकपटक आग्रह गरेका थिए ।

गैंडाकोट नगरपालिकाभित्रका विद्यालयबाट यसपटक एसईई उत्तीर्ण गरेका करिब १३ सय विद्यार्थीमध्ये ६ सयभन्दा बढीलाई शनिबार सम्मान गरिएको थियो । एसईईमा सामेल हुने विद्यार्थीहरू अधिकांश आगामी मंसिरको निर्वाचनका मतदाता समेत हुनसक्ने अपेक्षा गरिएको छ । डा कोइराला पूर्वी नवलपरासी क्षेत्र नम्बर १ बाट लगातार तेस्रोपटक प्रतिनिधिसभा सदस्यको रुपमा विजयी भइसकेका सांसद हुन् ।

प्रकाशित : श्रावण २१, २०७९ १८:०७
प्रतिक्रिया
पठाउनुहोस्

रौतहटमा शिलान्यास भएका कार्यक्रमहरु बहुवर्षीय योजनाका : मन्त्रालय

कान्तिपुर संवाददाता

काठमाडौँ — सहरी विकास मन्त्रालयले पूर्वप्रधानमन्त्री माधवकुमार नेपालले रौतहटमा यसै साता शिलान्यास गरेको योजनाहरु बहुवर्षीय योजना भएको जनाएको छ । पूर्वमन्त्री रामकुमारी झाँक्रीले योजना र बजेटबिना कतिपय शिलान्यास गरिएको भनेपछि मन्त्रालयले विज्ञप्ति निकाल्दै खण्डन गरेको हो ।

पूर्वसहरी विकासमन्त्री झाँक्रीले नेकपा एकीकृत समाजवादी पार्टी अध्यक्ष माधवकुमार नेपालले एक अन्तर्वार्तामा बजेट र योजनाबिनाकै विकास निर्माणको काम गरेको बताएपछि त्यसको मन्त्रालयले विज्ञप्ति निकालेर खण्डन गरेको हो ।

नेपालले साउन १६ गते रौतहटको गौर बोर्डर टाउन सहरी पूर्वाधार निर्माणअन्तर्गत गौर सभाहल र रामजानकी विवाहमण्डप र राजदेवी नगरपालिकाअन्तर्गतका योजनाहरुको शिलान्यास गरेका थिए । मन्त्रालयले ती कार्यक्रमहरु बहुवर्षीय योजनाअन्तर्गत कार्यान्वयन गरिएको जनाएको छ ।

सभाहल निर्माणका लागि २० करोड र विवाह मण्डपका लागि ८ करोड गरी २८ करोड रुपैयाँको योजना भएको मन्त्रालयले जनाएको छ । त्यसैगरी गौर र राजदेवीमा बस्ती विकासका लागि योजना स्वीकृत भएको जनाएको छ ।

'अत: माथि स्वीकृत वार्षिक कार्यक्रमबिना माथि उल्लेख योजनाहरु शिलान्यास भएको भनि विभिन्न सञ्चारमाध्यममा प्रकाशित समाचार र व्यक्त भएको धारणामा नपर्नु सम्बन्धित सबैमा जानकारीका लागि यो विज्ञप्ति जारी गरिएको छ,' मन्त्रालयले भनेको छ ।

एकीकृत समाजवादीको सचिवसमेत रहेको पूर्वमन्त्री झाँक्रीले आफ्नै अध्यक्ष नेपालले गरेको शिलान्यास विषयमा गरेको टिप्पणीपछि उक्त विषय सामाजिक सञ्जाल र सञ्चारमाध्यममा समाचारहरु बनेका थिए ।

एक अन्तर्वार्तामा झाँक्रीले अध्यक्ष नेपालले रौतहटमा गरेको शिलान्यास कार्यक्रम, बजेट सुनिश्चित नभएको बताएकी थिइन् । 'हिजो उहाँ (माधवकुमार नेपाल)ले गरेको शिलान्यासमा न कार्यक्रम छ, न बजेट सुनिश्चितता भएको छ, न त टेण्डर नै आह्वान भएको छ । उहाँले २-३ वटा धर्मशाला र सभागृह शिलान्यास गरेर आउनुभयो । त्यो स्रोतको सुनिश्चितता पनि छैन, बजेटमा स्रोत पनि एलएमआइबिएस (मन्त्रालयगत बजेट सूचना प्रणाली) कोड पनि छैन,' झाँक्रीले भनिन्, 'ठेक्का पनि लागेको छ त्यसको प्रक्रियासमेत सुरु भएको छैन । अर्थले सुनिश्चितता पनि दिएको छैन । कुन स्रोतबाट काम गर्ने भन्ने थाहा छैन । तर उहाँले शिलान्यास गर्नुभयो ।'

झाँक्रीको अभिव्यतिसँगै एकीकृत समाजवादीभित्रको विवाद पनि सहतमा आएको छ । नेकपा एमालेबाट विभाजित भएर एकीकृत समाजवादी गठन भएको एक वर्ष पनि नपुग्दै विवाद देखिएको छ । प्रधानमन्त्री शेरबहादुर देउवा नेतृत्वको सरकारमा झाँक्री एकीकृत समाजवादीको तर्फबाट सहरी विकासमन्त्री बनेकी थिइन् । असारको दोस्रो साता झाँक्रीसहितका मन्त्रिपरिषद्मा‌ सदस्यलाई पार्टीले फिर्ता गरेको थियो । बजेट ल्याउनेवित्तिकै उनीहरुलाई फिर्ता गर्न बोलाउने निर्णय गरे पनि मन्त्रीहरुले आपत्ति जनाएपछि तीन साता ढिलो भएको थियो ।

मन्त्री फिर्ता बोलाउने पार्टी निर्णयसँगै झाँक्री तत्कालीन मन्त्रीहरु पार्टी नेतृत्वसँग असन्तुष्ट रहँदै आएका छन् । हाल सहरी विकासमन्त्री सोही दलका मेटमणि चौधरी रहेका छन् ।

प्रकाशित : श्रावण २१, २०७९ १७:४७
पूरा पढ्नुहोस्
प्रतिक्रिया
पठाउनुहोस्
x
×