ड्युटीका प्रहरी कुटपिट गर्ने दुई शिक्षक पक्राउ
गोरखा — ड्युटीमा खटिएका प्रहरीलाई कुटपिट गरेको आरोपमा दुई शिक्षक पक्राउ परेका छन् ।
गोरखा सिरानचोक गाउँपालिका–४ का रामेश्वर पोखरेल र रामशरण पोखरेललाई प्रहरीले पक्राउ गरेको हो । शनिबार राति मादक पदार्थ सेवन गरेर मोटरसाइकल चलाउँदै गर्दा लडेपछि उद्धार गर्न पुगेका प्रहरीमाथि उनीहरूले कुटपिट गरेका थिए ।
कुटपिटबाट अस्थायी प्रहरी पोष्ट चोरकाटेमा कार्यरत प्रहरी हवल्दार अर्जुनबहादुर सेन र प्रहरी जवान अनन्त रोका घाइते भएका छन् । अनुहार र टाउकोमा चोट लागेका रोकाको गोरखा अस्पतालमा सामान्य उपचारपछि थप उपचारका लागि चितवनस्थित पुरानो मेडिकल कलेज रेफर गरिएको छ ।
उनीहरूको स्वास्थ्य अवस्था सुधारोन्मुख रहेको प्रहरीले जनाएको छ । प्रहरी कुटपिटको आरोपमा पक्राउ परेका दुवै जना शिक्षक हुन् ।
रामशरण मण्डली मावि छोप्राक र रामेश्वर रत्नराज्य मावि विरेन्चोकमा अध्यापनरत शिक्षक हुन् । ‘मादक पदार्थ सेवन गरेर मोटरसाइकल चलाएका उनीहरू चोरकाटे नजिकैको एउटा घुम्तीमा लडेछन्, आज बाइक लैजान मिल्दैन भोलि आउनुस् भन्दा सुरुमा मुक्का र पछि ढुंगाले हानेछन्,’ प्रहरी स्रोत भन्छ । आरोपित पोखरेलद्धय विरुद्ध सार्वजनिक शान्ति विरुद्धको कसुरमा मुद्दा दर्ता गरी कारबाही प्रक्रिया अघि बढाइएको प्रहरीले जनाएको छ ।
प्रकाशित : असार १९, २०७९ २०:११