रोगले घट्यो आलु उत्पादन- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

रोगले घट्यो आलु उत्पादन

घनश्याम खड्का

म्याग्दी — म्याग्दीका लेकाली बस्तीमा आलु थन्क्याउने चटारो सुरु भएको छ । किसानका अनुसार यस वर्ष आलु उत्पादन घटेको छ । लेकाली वस्तीमा असार र साउन आलु थन्क्याउने मुख्य समय हो । ‘यो वर्ष ढोठा (साउने संक्रान्ती मेला राम्चे) मा आउने पाहुनालाई खुवाउने आलु पनि नहुने भयो । राम्चे र वरपरका बस्तीमा आलु उत्पादन कम भयो,’ अन्नपूर्ण गाउँपालिका–८ राम्चेका राजु गर्बुजाले भने । 

अन्नपूर्णको शिख, हिस्तान र राम्चे आलु उत्पादनको पकेट क्षेत्र हुन् । जिल्लाको कृषी ज्ञान केन्द्रका अनुसार राम्चे, नागी, हिस्तानबाट गतवर्ष १० हजार २ सय ८१ मेट्रिक टन बर्खे आलु बिक्री गरी कृषकले करिब २० करोड रुपैयाँ बढी पाएका थिए । जिल्लाका उपल्लो भेगका बस्तीसम्म कच्ची सडक पुगेपछि लेकाली क्षेत्रका आलुसमेत तरकारी बजार फस्टाएका थियो ।

जिल्लामा बर्खे आलुमा रैथाने बीउ प्रयोग गरिने र कुनै पनि रासायनिक मल र औषधि प्रयोग गरिँदैन । राम्चेका अर्का कृषक फासबहादुर गर्बुजाका अनुसार सडक पुगेपछि कृषकले आलु उत्पादन र क्षेत्रफल बढाएका थिए । तर यो वर्ष बोट राम्रो भए पनि दाना भने कम र त्यही पनि साना लागेको उनले बताए ।

‘म्याग्दीले आलु ठूला सहरमा समेत बिक्रीका लागि पठाउँथ्यो । यस वर्ष आलु पकेट क्षेत्रमै उत्पादन भएन । आलु खन्न भर्खर सुरु भएकाले कुनकुन बस्तीमा उत्पादन घट्यो, लेखाजोखा भइरहेको छ,’ कृषि ज्ञान केन्द्रका कृषि प्रसार अधिकृत गोविन्द पाण्डेले भने, ‘राम्रो मल, बीउ, सिँचाइको व्यवस्था र उन्नत खेती गर्ने हो भने उत्पादन दोब्बर बढी बनाउन सकिन्छ । अहिले भइरहेको खेती जिल्लाका लेकाली क्षेत्रमा परम्परागत प्रणालीमा आधारित छ ।’ जिल्लाको अधिकांश लेकाली बस्तीको मुख्य खेती आलु हो । विषादीरहित तथा स्वादिलो हुने भएकाले बेनी, बागलुङ, पोखरा र काठमाडौंसम्म लेकाली आलुको माग छ ।

प्रकाशित : असार १९, २०७९ ११:३३
प्रतिक्रिया
पठाउनुहोस्

साझा मुद्दामा दुई नगरको सहकार्य

कान्तिपुर संवाददाता

रामेछाप — सीमा क्षेत्रमा रहेका पर्यटकीय स्थल र अन्य साझा महत्त्वका विकासका पूर्वाधार खडा गर्न रामेछाप र मन्थली नगरपालिकाले सहकार्य गर्ने भएका छन् । सामरिक महत्त्वको तिल्केस्थानमा पूर्वाधार निर्माण गर्दा २ नगरबीच तिक्तता बढेको थियो । यसअघिका जनप्रतिनिधिले उक्त स्थानलाई आ–आफ्नै दाबी गरेर पूर्वाधार विकासमा बजेट छुट्याउने गरेका थिए ।

‘अब त्यस्तो हुने छैन । सीमाको कुरा एउटा भयो, दुवै नगरले आवश्यक पूर्वाधार निर्माण र विकासका लागि मिलेर काम गर्ने सोच बनाएका छौं,’ रामेछाप नगर प्रमुख लवश्री न्यौपानेले भने, ‘तिल्केस्थान अब दुवै नगरको गहनाको रूपमा विकास हुनेछ ।’ पृथ्वीनारायण शाहले अंग्रेज फौजसँग लड्दा सिन्धुलीगढी किल्ला हारेमा विकल्पका रूपमा तिल्केस्थान किल्ला बनाउन लगाएका थिए । यो गढी मन्थलीको दक्षिणी सीमामा पर्छ । गढीमा मन्थली नगरले केही पूर्वाधार निर्माण गरिसकेको छ ।

तिल्केस्थानका अतिरिक्त सीमा क्षेत्रमा पर्ने सुकाजोर खोलामा स्पर निर्माण, पानी पोखरी, पकेट बालीको अवधारणा पनि अघि सारिएको न्यौपानेले जनाए । सिँचाइ अभावमा सुकाजोर किनारस्थित खेतीयोग्य जमिन १५ वर्षदेखि बाँझो छ । ‘पहिले सुकाजोरमा धान र रणजोरमा भुस फल्छ भन्थे,’ न्यौपाने भन्छन्, ‘सिँचाइ अभावमा त्यस्तो जग्गा बाँझै छ ।’ अहिले दुवै नगर तामाकोसीको पानी लिफ्ट गरी वा वर्षाको पानी संकलन गरी सिँचाइ पुर्‍याउनेमा एकमत बनेका हुन् ।

पर्यटनका अलावा सडक पूर्वाधार, विपद् व्यवस्थापन र सरसफाइका योजनामा पनि सहकार्य गर्न दुवै नगर अग्रसर भएका छन् । दुवै भेगका जनताले प्रयोग गर्ने सेलेघाट–रामेछाप खण्ड तथा ओख्रेनी–भालुखोप खण्डको स्तरोन्नति तथा विस्तारमा पनि दुवै पालिकाले चासो दिनेमा नगर प्रमुखहरूको एकमत बनेको छ ।

प्रकाशित : असार १९, २०७९ ११:२३
पूरा पढ्नुहोस्
प्रतिक्रिया
पठाउनुहोस्
×