जेठो पुस्तकालय ब्युँताउने प्रयास- गण्डकी - कान्तिपुर समाचार

जेठो पुस्तकालय ब्युँताउने प्रयास

प्रजातन्त्र स्थापनापछि खुलेको पुस्तकालयको जीर्ण भवन ४८ लाख खर्चेर पुनर्निर्माण
कान्तिपुर संवाददाता

गोरखा — जिल्लाकै जेठो पुस्तकालय ब्युँताउन स्थानीय अग्रसर बनेका छन् । यतिबेला जीर्ण भवन मर्मत गरी नयाँजस्तै बनाइएको छ । २००७ सालमा प्रजातन्त्र स्थापनापछि २००८ मा खुलेको त्रिभुवन पुस्तकालय नेपालकै पुरानोमध्येमा पर्छ ।

प्रतिनिधि तस्बिर ।

गोरखा नगरपालिका–६ तिनधारेमा रहेको पुस्तकालयको भवनलाई २०७२ वैशाख १२ को भूकम्पले क्षति पुर्‍याएपछि पुनर्निर्माण गरीएको हो । स्थानीयको पहलमा २ वर्षदेखि भवन पुनर्निर्माण भइरहेको थियो । ऐतिहासिक पुस्तकालय ३ दशकयता पटक–पटक बन्द हुँदै फेरि सञ्चालन हुँदै आएको थियो । स्थानीयको अग्रसरतामा स्थापना भएको यो पुस्तकालय सुरुदेखि नै जिल्लाकै अध्ययन गर्ने प्रमुख केन्द्रका रूपमा परिचित थियो । पुस्तकालयमा विद्यार्थी भेला भएर अध्ययन गर्थे । ‘त्यो बेला किताब कम पाउने, कुनै कक्षाको परीक्षा दिनुपरे पनि विद्यार्थी यहीं आएर पुस्तक पढ्थे,’ स्थानीय मोहनलाल श्रेष्ठले भने ।

उनका अनुसार पुस्तकालय सुरुमा ठूलो आँगनको पाटीबाट सञ्चालित थियो । पुस्तकालय लोकप्रिय बनेपछि तीनधारेमा भवन नै बनाएर सारिएको थियो । पुस्तकालय बन्द हुने र खुल्ने क्रम भइरहँदा यहाँ रहेका कतिपय महत्त्वपूर्ण पुस्तक हराइसकेका छन् । ‘त्यो बेला किताब पढ्ने चलन थियो । उपन्यास, कथा पढ्ने धेरै हुन्थ्यौं,’ स्थानीय पुरुषोत्तम अर्याल सम्झन्छन्, ‘पुस्तकालयमा छैटौं शताब्दीको ‘शब्द कल्पद्रुम’ भन्ने किताबसमेत थियो । अहिले त्यो किताब पाउनै गाह्रो छ । दुर्लभ र महत्त्वपूर्ण कतिपय किताब पानीले खत्तम बनायो, कतिपय हराए ।’

पुस्तकालयमा पौराणिक ग्रन्थ पनि थिए । ‘त्यो बेला इमेल इन्टरनेट थिएन । पुस्तक पढ्न रजिस्टरमा नामा दर्ता गराएर पनि घरमा लग्थे । अन्यत्र कम पाइने र अभाव हुने दुर्लभ पुस्तक संग्रहित थिए,’ उनले भने । सुरुमा गोरखा सदरमुकामको आधार स्कुलका रूपमा यसलाई लिइने गरेको उनी सुनाउँछन् । पुरानो र ऐतिहासिक पुस्तकालय भएकाले यसको संरक्षणको आवश्यकता रहेको उनले बताए । ‘समय सुहाउँदो पुस्तकहरू राख्ने । इन्टरनेट र कम्प्युटरको प्रयोग बढाउने गरी पुस्तकालय नयाँ ढंगले सञ्चालन गरिनुपर्छ,’ उनले भने, ‘पुस्तकालयमा बाँकी बचेका पुस्तकको पनि व्यवस्थापन गर्न सके यसको संरक्षणमा सहयोग पुग्छ ।’

चारतले पुस्तकालय भवन ४८ लाख रुपैयाँ खर्च गरेर पुनर्निर्माण गरिएको छ । वडा, नगरपालिका र स्थानीय दाताबाट रकम संकलन गरेर भवन पुनर्निर्माण गरिएको निर्माण समितिका संयोजकसमेत रहेका श्रेष्ठले बताए । पुस्तकालय सञ्चालनका लागि कुशललाल श्रेष्ठको संयोजकत्वमा समिति बनाएर मंगलबार भवन हस्तान्तरण गरिएको छ । ‘पुस्तकहरू जोड्नु छ । यसका लागि रकम संकलन गरेर पुस्तकालय सञ्चालनतर्फ अघि बढेको छ,’ उनले भने । आकर्षक भवन निर्माण भएपछि पुस्तकालय व्यवस्थापनका लागि सहयोगीहरूले रकम पनि घोषणा गर्न थालेका छन् ।

प्रकाशित : असार १७, २०७९ ११:१७
प्रतिक्रिया
पठाउनुहोस्

दोहोरो भुक्तानीपछि अख्तियारमा मुद्दा

कान्तिपुर संवाददाता

बागलुङ — काठेखोला गाउँपालिकाका तत्कालीन प्रमुख प्रशासकीय अधिकृत खिमबहादुर विक, प्राविधिक, उपभोक्ता समितिका पदाधिकारी र ठेकेदारसमेतलाई अख्तियार दुरुपयोग अनुसन्धान आयोगले भ्र्रष्टाचार मुद्दा दायर गरेको छ ।

एउटै योजनामा फरकफरक अनियमितता आरोपमा उनीहरूमाथि ३ वटा मुद्दा दर्ता भएको हो । अख्तियारका सहायक प्रवक्ता वेदप्रसाद भण्डारीले उनीहरूले नीतिगत, आर्थिक तथा गैरकानुनी काम र सामान तथा उपकरण प्रयोगमा अनियमितता गरेको बताए ।

काठेखोला–२ भीमापोखराको नालढुंगा खानेपानी आयोजनामा इस्टिमेटविपरीत भुक्तानी गरेको तथा डुडियादेखि तंग्राम जाने सडक खण्डमा ठेक्कासमेत नलगाई सार्वजनिक खरिद ऐनविरुद्ध काम गरेको र एउटै कामको दोहोरो भुक्तानी गरेको आरोप छ । ती आयोजनामा भ्रष्टाचार गरेको भन्दै विकसहित सबइन्जिनियर नवीन थापा, असिस्टेन्ट सब इन्जिनियर सनोज उपाध्याय र लेखापाल खडानन्द कँडेलविरुद्ध अख्तियारले विशेष अदालतमा बुधबार मुद्दा दायर गरेको हो । उक्त कामले सरकारलाई ७ लाख ९२ हजार रुपैयाँ गैरकानुनी रूपमा हानिनोक्सानी पुर्‍याएको भन्दै अख्तियारले अभियुक्तलाई सोही बिगो रकम जरिवाना गरी असुलउपर गर्न र कैद सजाय तोक्न माग गरेको छ ।

सेभेन स्टेट बिल्डर्सका प्रोप्राइटर दीपेन्द्रबहादुर खड्कालाई ३ लाख ५३ हजार, अर्गेजा निर्माण सेवाका प्रोप्राइटर मसुमन अर्गेजा, प्रतिनिधि काठेखोला कन्स्ट्रक्सनका प्रोप्राइटर टंकबहादुर कुँवरलाई १ लाख ५१ हजार र खुसु निर्माण सेवाका सूर्यबहादुर भण्डारीलाई पनि १ लाख ५१ हजार रुपैयाँ बिगो कायम गरी जरिवाना र कैद सजायको माग गरिएको अख्तियारले जनाएको छ ।

प्रकाशित : असार १७, २०७९ ११:१२
पूरा पढ्नुहोस्
प्रतिक्रिया
पठाउनुहोस्
x
×