चट्याङ लागेर एक महिलाको मृत्यु
बागलुङ — चट्याङ लागेर बागलुङको काठेखोला गाउँपालिका ४ मा एक महिलाको मृत्यु भएको छ । तंग्रामको फापरखेत घर भएकी २८ वर्षीया शुष्मा पुनको मंगलबार राति मृत्यु भएको हो ।
आफ्नै घरमा खाना बनाइरहेको अवस्थामा उनलाई चट्याङ लागेको थियो । गम्भीर घाइते भएकी पुनलाई उपचारका लागि धौलागिरि अस्पताल बागलुङ पुर्याउँदै गर्दा बाटोमै मृत्यु भएको प्रहरी नायव उपरीक्षक इन्द्र बहादुर रानाले बताए । चट्याङले उनको घरमा पनि क्षति पुर्याएको छ ।
बागलुङकै गलकोट नगरपालिकामा वर्षासँगै आएको बाढी र पहिरोका कारण एउटा घर भत्किएको छ । गल्कोट नगरपालिका ११ रिघाका ८३ वर्षीय कृष्णबहादुर कामीको घर पहिरोले भत्काएको हो ।
मंगलबार राति घरभन्दा ६० मिटर माथिबाट खसेको पहिरोले घर भत्काएको रानाले जानकारी दिए । वडाध्यक्ष डम्मबरबहादुर श्रीषका अनुसार उनको घरमा रहेका अन्नपात, लत्ताकपडा लगायत सामग्री पहिरोले पुरिएको छ ।
प्रकाशित : असार १५, २०७९ १८:५१